ވެކްސިން ޖެހުން “މަޖުބޫރު” ކުރި މައްސަލާގައި ޑޮކްޓަރުންނަށް ފާޑު ކިޔުމުން ޖަމިއްޔާ އިން ކަންބޮޑުވުން ފާޅުކޮށްފި

ކޮވިޑް ފެތުރުން ހުއްޓުވުމަށް ކަމަށް ބުނެ، ކޮވިޑް ވެކްސިން ޖެހުން “މަޖްބޫރު” ކުރި މައްސަލާގައި ޑޮކްޓަރުންނަށް ފާޑުކިޔުންތައް އަމާޒުވުމާއި ގުޅިގެން މޯލްޑިވްސް މެޑިކަލް އެސޯސިއޭޝަނުން ކަންބޮޑުވުންފާޅުކޮށްފިއެވެ.

ކޮވިޑް 19 ގެ ބަލިމަޑުކަމާއި ދެކޮޅަށް އިންޑިއާއިން އުފެއްދި ކޮވިޝީލްޑް ޖެހުމުން ލޭގަނޑުވާ ކަމަށް، އެ ވެކްސިންގެ މައި ކުންފުނި އެސްޓްރާޒެނެކާއިން އެއްބަސްވެ ވެކްސިން ވިއްކުން ހުއްޓާލަން ނިންމުމާއި ގުޅިގެން ރާއްޖޭގައި އެ ވެކްސިން ޖެހި މީހުންނާއި އާއްމުން އަންނަނީ ކަންބޮޑުވުން ފާޅު ކުރަމުންނެވެ.

ޚާއްސަކޮށް އެ ވެކްސިން ނުޖަހާ މީހުންނަށް ކުރީ ސަރުކާރުން ބޮޑެތި ދަތިތަކާއި ހުރަސްތައް ކުރިމަތިކުރުވާފައިވާ ކަމަށާ، ވެކްސިން ނުޖަހައި ނުވެގެން “މަޖުބޫރު” ވެގެންވެސް އެތައް ބަޔަކު ވެކްސިން ޖަހާފައިވާއިރު، ވެކްސިން ޖެހުމަށް ބާރު އަޅައި އެކަން ޕްރޮމޯޓް ކުރި ބައެއް ޑޮކްޓަރުންނަށްވެސް އާއްމުންގެ ނުރުހުން ވަނީ އަމާޒުވެފައެވެ.

މި ފަދަ ދަނޑިވަޅެއްގައި މޯލްޑިވިއަން މެޑިކަލް އެސޯސިއޭޝަނުން މިއަދު ނެރެފައިވާ ބަޔާނެއްގައި ވަނީ ޑޮކްޓަރުންނަށް އަމާޒުކޮށް، ސިއްހީ ޚިދުމަތްތެރިންގެ އަގު ވެއްޓޭހެން އެ މީހުންގެ ފޮޓޯ މީސްމީޑިއާގައި ޙިއްސާކުރުމާއި، ސިއްހީ ޚިދުމަތުގެ އިތުބާރު ގެއްލޭ ގޮތަށް މީސްމީޑިއާގައި ވާހަކަ ނުދެއްކުމަށް އިލްތިމާސް ކޮށްފައެވެ.

އަދި ސިއްޙީ ޚިދުމަތްތެރިންނާމެދު އެއްވެސް ހަގީގަތެއްނެތް ވާހަކަތައް ފެތުރުމުން އެކަމުގެ ނޭދެވޭ އަސަރުކުރާނީ މުޖުތަމައުގައި ސިއްހީ ޚިދުމަތް ބޭނުންވާ އާންމު ރައްޔިތުންނަށް ކަމަށާއި އަދި އެއީ ސިއްހީ ޚިދުމަތާމެދު އޮންނަ އިތުބާރު ގެއްލި، ރާއްޖެއިން ލިބޭ ފަރުވާ ހޯދަންވެސް ބޮޑު ޚަރަދުކޮށް ރާއްޖެއިން ބޭރަށް ދިއުމުގެ ސަގާފަތް ދިރުވޭ ކަމެއް ކަމަށްވެސް އެ ޖަމިއްޔާއިން ބުނެފައިވެއެވެ.

މިއާއެކު އެ ޖަމިއްޔާއިން ބުނީ މިހާރުވެސް ސިއްހީ ޚިދުމަތްތެރިންގެ މަސައްކަތަށް އެތައް ގޮންޖެހުމެއް ހުރި ކަމަށާ އެފަދައިން އާއްމުން ކަން ކުރުމުން އެ ޚިދުމަތްތެރިންގެ ހިތުގައި އިތުރު މާޔޫސްކަމެއް އުފެދި ރަނގަޅު ޚިދުމަތްތެރިން ޚިދުމަތުގައި ދަމަހައްޓަން ދަތިވާނެ ކަމަށެވެ.

"ވީމާ ސިއްހީ ފަރުވާއާ ގުޅުންހުރި ކަންކަމުގައި ރަނގަޅު މައުލޫމާތު އެނގިހުރެ، ހަގީގަތް ރަނގަޅަށް ބެލުމަށްފަހު މެނުވީ ސޯޝަލް މީޑިއާގައި ތަފާތު ވާހަކަތައް ނުފެތުރުމަށާއި ސިއްހީ ޚިދުމަތް ދޭ ފަރާތްތަކުން އެ މީހުންގެ ޚިދުމަތް ކުރިއަށް ގެންދިއުމަށް މުޖުތަމައުގެ ފަރާތުން ބޭނުންވާ އެހީތެރިކަން ދެއްވުމަށް ވެސް މި ފުރުސަތުގައި ގޮވައިލަމެވެ." އެ ބަޔާނުގައިވެއެވެ.