ހަންކެނޑެ މަޝްރޫޢޫ ކުރިއަށްގެންދަން އަދި ބަޔަކާ ހަވާލު ކޮށްފައެއްނެތް: ޓޫރިޒަމް މިނިސްޓަރު
ލިޔުންތެރިޔާ
އަބްދުﷲ ހުސައިން
ހަންކެނޑެ މަޝްރޫޢޫ ކުރިއަށްގެންދަން އަދި މިހާތަނަށް ބަޔަކާ ހަވާލު ކޮށްފައެއްނެތްކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެއެވެ.
އައްޑޫސިޓީ ހަންކެނޑެ މަޝްރޫޢުއަކީ އެ ސިޓީގައި ޓޫރިޒަމް ތަރައްޤީކުރުމަށް ހިންގާ އެންމެ ބިޔަމަޝްރޫޢުއެވެ. ސަރުކާރުން ހަންކެނޑެ ހަވާލުކޮށްފައިވަނީ ސަރުކާރުގެ 100 ޕަސެންޓް ހިއްސާ އޮންނަ މޯލްޑިވްސް ފަންޑް މެނޭޖްމަންޓް ކޯޕަރޭޝަން ލިމިޓެޑް (އެމްއެފްއެމްސީ) އާއެވެ
ރައްޔިތުންގެ މަޖިލީހުގައި މިއަދު މަރަދޫ ދައިރާގެ މެމްބަރު އަހުމަދުދީދީ ކުރެއްވި ސުވާލަކަށް ޖަވާބުދެއްވަމުން ޓޫރިޒަމް މިނިސްޓަރު ފައިސަލް ވިދާޅުވީ، މި ސަރުކާރު ވެރިކަމާ ހަވާލުވުމަށްފަހު ހަންކެނޑެ މަޝްރޫޢު ކުރިއަށްދާގޮތް ބެލުމަށް އެމްއެފްއެމްސީގެ މެނޭޖިންގ ޑިރެކްޓަރާ ބައްދަލުކޮށް މައުލޫމާތު ހޯދާފައިވާކަމަށާއި، އެ މައުލޫމާތުތަކުން އެނގުނު ގޮތުގައި އެ މަސައްކަތް ކުރިއަށްގެންދިއުމަށް ޕާޓީއަކު އައްޔަނކުރެވިފައި ނުވާއިރު، މިހާތަނަށް ފަންޑު ލިބިފައި ނުވާކަމަށްވެސް މިނިސްޓަރު ވިދާޅުވިއެވެ.
މި ސަރުކާރާ ހަވާލުވިއިރު ހަންކެނޑެ ތަރައްޤީކުރުމުގެ މަސައްކަތް ކުރާނެ ކުންފުންޏެއް ހަމަޖައްސައި ސޮއިކޮށްފައި ނުވާކަމަށާއި، އެކަމާ ގުޅޭގޮތުން ވާހަކަތައް ދެކެވިފައި ހުރިކަމަށް މިނިސްޓަރު ފާހަގަކުރެއްވިއެވެ.
ޗައިނާ ޕާޓީއަކާއެކު ވާހަކަ ދެކެވުނުކަން އެނގޭ. ދެން އަޅުގަނޑަށް މައުލޫމާތު ލިބެނީ، އިންޓްރަސްޓް ރޭޓާމެދު ގޮތެއް ނުނިމޭތީއޭ އެއްބަސްވުމުގައި ސޮއިނުކުރެވިވަނީ. އެހެން ނަމަވެސް މިވަގުތު ޗައިނާ ކުންފުނީގެ އެމްޑީއާއެކު ވަރަށް ގާތުން މަސައްކަތްކުރަމުން ދަނީ.
ފައިސަލް ވިދާޅުވިއެވެ
މަރަދޫ އާއި ހިތަދޫއާ ދެމެދު އޮންނަ ފަޅުރަށްތަކުގެ ތެރެއިން ހަންކެނޑެ ސަރަހައްދުގައި އެންމެ ފުރަތަމަ ރިސޯޓެއް ހެދުމަށް 2006 ވަނަ އަހަރު ބަޔަކާ ހަވާލުކުރި ނަމަވެސް އަދި މިހާތަނަށް އެކަން ކުރިއަކަށް ނުދެއެވެ. އެންމެފަހުން ނިމިގެންދިޔަ ރިޔާސީ އިންތިހާބުގައި އެމްޑޕީން ވަނީ ހަންކެނޑެ މަޝްރޫޢު އިފްތިތާހުކޮށް އެތަނުގައި ރިސޯޓެއް ތަރައްޤީކުރުމަށް މޯލްޑިވްސް ފަންޑް މެނޭޖްމަންޓް ކޯޕަރޭޝަން ލިމިޓެޑް (އެމްއެފްއެމްސީ) އާ ހަވާލުކޮށްފައެވެ.
އޭރު އެމްއެފްއެމްސީން ބުނީ ހަންކެނޑޭގައި ތަރައްޤީކުރާނީ 2082 އެނދު ހިމެނޭ 1041 ކޮޓަރީގެ ރިސޯޓެއް ކަމަށެވެ. މި މަޝްރޫޢުގެ އަގެއްގެ ގޮތުގައި ކަނޑައަޅާފައިވަނީ 142.9 މިލިއަން ޑޮލަރެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
