ޗާގޯސް ރަށްތައް އަނބުރައި ނުދޭން އިނގިރޭސި ސަރުކާރުން ނިންމައިފި

ޗާގޯސްގެ ރަށްތަކުގައި ދިރިއުޅުނު މީހުން އަލުން އެރަށްތަކަށް ގެންގޮސް ވަޒަންވެރިވާން ފުރުސަތުދޭން އިނގިރޭސި ސަރުކާރުން އުޅުނު އުޅުން ހުއްޓާލައި އެރަށްތައް ޗާގޯސިއަނުންނަށް ނުދޭން އިނގިރޭސި ސަރުކާރުން ނިންމައިފިއެވެ.

ޗާގޯސްގެ ރަށްތަކުގައި ދިރިއުޅުނު މީހުން އަލުން އެރަށްތަކަށް ގެންދިއުމަކީ އެއީ އިނގިރޭސި ސަރުކާރުން މިހާރު ނުކުރާނެ ކަމެއްކަމަށް ހާމަކުރީ އިނގިރޭސި ޚާރިޖީވަޒީރު ޑޭވިޑް ކެމެރަން އިގިރޭސި ގާނޫން ހަދާ މަޖިލީހުގެ ފޮރިން އެފެއަޒް ކޮމެޓީގައި ވާހަކަފުޅު ދައްކަވަމުނެވެ.

ޗާގޯސް ފަޅުރަށްތައް ފަރަންސޭސީންނާއި އިނގިރޭސިންގެ އިސްތިއުމާރީ ދުވަސްވަރު އެމީހުންގެ ބާރުގެ ދަށުގައި ބާއްވައިގެން އަޅުމަސައްކަތްކުރަން ގެންދިއަ މީހުންގެ އާއިލާތައް ބޮޑުވެ މީހުން ދިރިއުޅެމުންދަނިކޮށް ގަދަކަމުން އިނގިރޭސިން އެރަށްތަކުން އެމީހުން ބޭލީ 1960 އާއި 1970 އާ ދެމެދުގެ އަހަރު ތަކުގެތެރޭގައެވެ.

އެއަށްފަހު އެރަށްތަކަށް އެނބުރި އައުމުގެ ހައްގު ހޯދުމަށް ޗާގޯސިއަނުން ދުނިޔޭގެ ފެންވަރުގައި ކެމްޕޭން ކުރަމުންގޮސް އިނގިރޭސި ސަރުކާރުން މިދިޔަ އަހަރު ނިންމާފައި އޮތީ އެރަށްތަކުގައި އުޅުނު މީހުން އަނބުރާ އައުމަށް ހުއްދަ ދިނުމަށެވެ. އެހެންނަމަވެސް ޚާރިޖީ ވަޒީރުކަމާއި ޑޭވިޑް ކެމެރަން ހަވާލުވުމަށްފަހު ވަނީ މިސިޔާސަތު ބަދަލުކޮށް އިނގިރޭސި ސަރުކާރުގެ ބާރުގެ ދަށުގައި އޮންނަ ސަރަހައްދެއްގެ ގޮތުގައި ބާއްވަން ނިންމާފައެވެ.

ޑޭވިޑް ކެމެރަން ވިދާޅުވީ އިނގިރޭސިންގެ ބާރުގެ ދަށުގައި އެރަށްތައް ބާއްވަންޖެހެނީ ސަލާމަތީ ސަބަބުތަކަކާއި ޑިއަގޯގާސިއާގައި ހުރި އަސްކަރީ ބޭސްތަކުގެ ރައްކާތެރިކަމަށްޓަކައެވެ.

އިނގިރޭސިންގެ ބާރުގެ ދަށަށް އެރަށްތައް ގެންދިއައީ ފަރަންސޭސިންގެ ބާރު ކެނޑުމުން 1814 ވަނަ އަހަރުއެވެ. 1967 އާއި 1971 އާއި ދޭތެރޭގައި އިނގިރޭސިން އެރަށްތަކުގައި ތިބި 2000  ވަރަކަށް މީހުން މޮރިޝަސްއާއި ސީޝެލްސަށް ފޮނުވައިލިއެވެ. 1968 ގައި މޮރިޝަސްގައި ދައުލަތެއް އުފެދި މިނިވަންކަން ލިބުމުން އެގައުމުންދަނީ ޗާގޯސްއަކީ އެގައުމުގެ ރަށްތަކެއް ކަމަށް ދައުވާ ކުރަމުންނެވެ. އެހެންނަމަވެސް އެރަށްރަކަކީ މޮރިޝަސްގެ ރަށްތަކެއް ކަމަށް ބައިނަލް އަގުވާމީގޮތުން އަދި ނުނިންމައެވެ.

ދާދިފަހުން ރާއްޖޭގެ ރައީސުލް ޖުމްހޫރިއްޔާ އިބްރާހީމް މުޙައްމަދު ސާލިހްގެ ވެރިކަމުގައި އެމަނިކުފާނު ރާއްޖޭގެ ގާނޫން ހަދާ މަޖިލީހަށް ނާންގަވައި މޮރިޝަސްގެ ރައީސަށް ސިޓީފުޅެއް ފޮނުއްވައި ޗާގޯސްއަކީ މޮރިޝަސްގެ ރަށްތަކެއްކަމަށް ދިވެހި ސަރުކާރުން ގަބޫލުކުރާކަމަށް ވިދާޅުވުމުން މޮރިޝަސްއިން އިޓްލޮސްއަށް އެސިޓީ ހުށަހަޅައިގެން ޗާގޯސްއަކީ މޮރިޝަސްގެ ތަނެއްކަމަށް ބަލައި ދިވެހި ރާއްޖޭގެ ކަނޑުގެ ސަރަހައްދުގެ ބައެއް މޮރިޝަސްއާއި ރާއްޖެއާއި ދެމެދުވަނީ ބަހައިފައެވެ.

ރައީސް ޑޮކްޓަރ މުހައްމަދު މުއިއްޒު ވެރިކަމާ ހަވާލުވެވަޑައިގެންފައި މިހާރުގެންދަވަނީ ދިވެހިރާއްޖެއިން ގެއްލުނު ސަރަހައްދު އަލުން އަނބުރައި ހޯދުމަށް ކުރަންޖެހޭ މަސައްކަތް ކުރައްވަމުންނެވެ.