ޝެއިޚް އިސްމާއީލް އަކީ ރާއްޖޭގައި ދީނީ ޢިލްމުވެރީން އުފެއްދުމަށް އެންމެ ބޮޑު މަސައްކަތެއް ކުރެއްވި ބޭފުޅާ: ޝެއިޚް ސަމީރު

ފަޟީލަތުއްޝައިޚު އިސްމާޢީލް މުޙައްމަދަކީ ދިވެހިރާއްޖޭގައި ދީނީ ގިނަ ޢިލްމުވެރިންތަކެއް އުފެއްދެވުމުގައި އެންމެ އިސް ދައުރެއް އަދާކުރެއްވި ބޭފުޅާ ކަމުގައި ރާއްޖޭގެ ފުންނާބު އުސް ދީނީ ޢިލްމުވެރިޔާ ޝައިޚް އަޙްމަދު ސަމީރު ވިދާޅުވެއްޖެއެވެ.

ޝައިޚް އިސްމާޢީލް އަވަހާރަވުމާ ގުޅިގެން ޝައިޚް ސަމީރު މީސްމީޑިއާގައި ކުރެއްވި ޕޯސްޓެއްގައި ވިދާޅުވީ، އެބޭފުޅާއަކީ ރާއްޖޭގައި ދީނީ ޢިލްމުވެރިން އުފެއްދުމަށް އެންމެ ބޮޑު މަސައްކަތެއް ކުރެއްވި ބޭފުޅާ ކަމަށެވެ. އަދި ތަޢުލީމާއި ތަރުބިޔަތުގެ ދާއިރާއިން ޝެއިޚް ކޮށްދެއްވާފައިވަނީ އަގުނުކުރެވޭނެ ފަދަ މަތިވެރި މަސައްކަތްތަކެއްކަން ޝައިޚް ސަމީރު ފާހަގަކުރެއްވިއެވެ.

ޝައިޚް އިސްމާޢީލް މުޙައްމަދަކީ ސަޢުދީ ޢަރަބިއްޔާގެ މަދީނާ އިސްލާމިކް ޔުނިވަރސިޓީން ކިޔަވައި ނިންމެވި އެންމެ ފުރަތަމަ ދިވެހި ދަރިވަރެވެ. އެއީ ދުނިޔޭގެ މަޝްހޫރު ޢިލްމުވެރިޔާ ޝައިޚް އިބްނު ބާޒްގެ އަރިހުން އުނގެނިވަޑައިގަތް ދަރިވަރެއްވެސް މެއެވެ. ރާއްޖެ ދުށް ވަރުގަދަ ޢިލްމުވެރިއެއްގެ ގޮތުގައި ފާހަގަކުރެވޭ ޝައިޚް އިސްމާޢީލަކީ، ތަފާތު އެކި މައުޟޫޢުތަކަށް ޢިލްމީ ދަރުސްތައް ދެއްވުމުގެ އިތުރުން، ދީނީ ގިނަ ފޮތްތަކެއް ލިޔުއްވާފައިވާ ބޭފުޅެކެވެ.

އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވި ގޮތުގައި، ޝައިޚް އިސްމާޢީލަކީ ޢިލްމު ފެތުރުމާއި ޢިލްމީ ޖީލެއް ބިނާކުރެއްވުމުގެ ނަމޫނާ ޝަޚްޞިއްޔަތެކެވެ. ޝެއިޚް ކުރެއްވި އެންމެ މުހިންމު އެއް މަސައްކަތްޕުޅެއްގެ ގޮތުގައި މިނިސްޓަރު ފާހަގަކުރެއްވީ، މާތްވެގެންވާ ކީރިތި ޤުރުއާނުގެ ތަފްސީރު އެއްކޮށް ދިވެހި ބަހުން ލިޔުއްވުމެވެ.

ޝައިޚް އިސްމާޢީލަކީ އަނިޔާވެރިކަމުގެ ކުރިމަތީގައި ޙައްޤު ބަސް ވިދާޅުވުމުގައި ސާބިތުވެ ހުންނެވި، ކެތްތެރިކަން އިސްކުރެއްވި ހިތްވަރުގަދަ ލީޑަރެކެވެ.

ޝެއިޚް އަވަހާރަވުމުގެ ހިތާމައިގައި ގިނަ ޢިލްމުވެރިން ދަނީ ތަޢުޒިޔާ ފޮނުއްވަމުންނެވެ.

ޝައިޚް އިސްމާޢީލް މުޙައްމަދުގެ ޖަނާޒާ އޮންނާނީ މިއަދުގެ މެންދުރު ނަމާދަށްފަހު އިސްލާމީ މަރުކަޒުގައެވެ.