މަކުނުދޫގެ ފުރަތަމަ "ޝައިޚް"އަކަށް އަޙްމަދު ރިފްޢަތު؛ މުޅި ރަށް ފަޚުރުވެރިވާ ދަރިއެއް

ސައުދީ އަރަބިއްޔާގެ މަދީނާ އިސްލާމީ ޔުނިވަރސިޓީން މަތީ ތަޢުލީމު ހާސިލުކުރައްވައި، "ޝައިޚް" ކަމުގެ ލަގަބު ހދ. މަކުނުދޫ، އަޙްމަދު ރިފްޢަތު ހޯއްދަވައިފިއެވެ.

މިއީ މަކުނުދޫގެ ތާރީޚުގައި އެ ރަށުގެ ދަރިއަކު މިފަދަ ޝަރަފުވެރި ލަގަބެއް ހާސިލުކުރި ފުރަތަމަ ފަހަރެވެ.

އުމުރުން 33 އަހަރުގެ އަޙްމަދު ރިފްޢަތު ހޯއްދެވި މި ތާރީޚީ ކާމިޔާބީއާ ގުޅިގެން، މަކުނުދޫ ކައުންސިލާއި އެ ރަށުގެ އެންމެހާ ރައްޔިތުން އަންނަނީ ތަހުނިޔާ ފޮނުވަމުންނެވެ.

ކައުންސިލުން ހާމަކުރި ގޮތުގައި، ރިފްޢަތު ހޯއްދެވި މި ޝަރަފަކީ މަކުނުދޫގެ ތާރީޚުގައި ރަން އަކުރުން ފަވާލެވޭނެ ފާހަގަކޮށްލެވޭ ބޮޑު ކާމިޔާބީއެކެވެ.

ރިފްޢަތުގެ ތަޢުލީމީ ދަތުރަށް ބަލާއިރު، އޭނާ ވަނީ 2017 ވަނަ އަހަރު ޢަރަބި ބަހުން ޑިޕްލޮމާ ހާސިލުކުރައްވާފައެވެ. އޭގެ ފަހުން 2018 ވަނަ އަހަރު ރަށު ސްކޫލާ ގުޅިވަޑައިގެން ޚިދުމަތް ކުރެއްވުމަށްފަހު، މަތީ ތަޢުލީމުގެ ރޮނގުން އިތުރަށް ކުރިއަށް ދިއުމަށް މަދީނާއަށް ފުރާވަޑައިގަތީ 2021 ވަނަ އަހަރުއެވެ.

ގާތްގަނޑަކަށް 5 އަހަރު ދުވަހުގެ މިންނެތް މަސައްކަތަށްފަހު، ރިފްޢަތު މިވަނީ "ޝައިޚް" ކަމުގެ ޝަރަފާއެކު ގްރެޖުއޭޓްވެފައެވެ.

ރިފްޢަތަކީ ޅަފަތުގެ ދުވަސްވަރުން ފެށިގެން ޢިލްމު އުނގެނުމަށް ޝައުގުވެރި ކަމަާއެކު މަސައްކަތް ކުރެއްވި، ރަށުގައި ދީނީ އަދި އިޖުތިމާޢީ ރޮނގުން އަގުހުރި ޚިދުމަތްތަކެއް ކޮށްދެއްވަމުން އަންނަ ބޭފުޅެކެވެ. އޭގެ ސަބަބުން ރަށުގެ އެންމެހާ ރައްޔިތުންގެ ލޯތްބާއި އިޙްތިރާމް ވަނީ ލިބުފައެވެ.