ކޮޕާ އެމެރިކާ ވިމެންސް ފުޓްބޯޅަ މުބާރާތުގެ ޗެންޕިއަންކަން ނުވަވަނަ ފަހަރަށް ބްރެޒިލް އިން ހޯދައިފި

އެކުއެޑޯގައި މިހާރު ކުރިއަށްދާ ކޮޕާ އެމެރިކާ ވިމެންސް ފުޓްބޯޅަ މުބާރާތް 2025 ގެ ފައިނަލުގައި ބްރެޒިލް އާއި ކޮލަމްބިއާ ވާދަކުރި މެޗު 4-4 ގެ ނަތީޖާއަކުން އެއްވަރުވެ، ނަތީޖާ ނެރުމަށްޖެހި ޕެނަލްޓީގައި 5-4 ގެ ނަތީޖާއަކުން މޮޅު ބްރެޒިލް އިން މުބާރާތުގެ ތަށި ޖެހިޖެހިގެން ހަވަނަ ފަހަރަށް ކާމިޔާބުކޮށްފިއެވެ.

މިއީ މިމުބާރާތުގެ ތާރީޚްގައި މިހާތަނަށް ބޭއްވުނު 10 މުބާރާތުގެ ތެރެއިން ބްރެޒިލް ކާމިޔާބުކުރި ނުވަވަނަ މުބާރާތެވެ. މީގެ ކުރިން އެޓީމުން ވަނީ 1991، 1995. 1998، 2003، 2010، 2014، 2018 އަދި 2022 ވަނަ އަހަރު މިމުބާރާތުގެ ޗެންޕިއަންކަން ހޯދާފައެވެ. އަދި 2006 ވަނަ އަހަރުގެ ފައިނަލުގައި ބްރެޒިލް ބަލިވީ އާޖެންޓީނާ އަތުންނެވެ.

ބްރެޒިލް މުބާރާތުގެ ފައިނަލުން ޖާގަހޯދީ ސެމީފައިނަލްގެ ފުރަތަަމަ މެޗުގައި ފަސޭހަކަމާއެކު 5-1 ގެ ނަތީޖާއަކުން އުރުގުއޭ ބަލިކުރުމަށްފަހު އެވެ. އަދި ކޮލަމްބިއާ ފައިނަލުން ޖާގަހޯދީ ސެމީފައިނަލްގެ ދެވަނަ މެޗުގައި ވާދަވެރި ކުޅުމަކަށްފަހު 1-0 ގެ ނަތީޖާއަކުން އާޖެންޓީނާ ބަލިކުރުމަށްފަހު އެވެ. އަދި މިދެޓީމު ގުރޫޕް ސްޓޭޖުގައި ކުޅުނު މެޗު ނިމުނީ 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ ކޮލަމްބިއާ އިންނެވެ. މިލަނޑު ފުރަތަމަ ހާފުގެ 25 ވަނަ މިނެޓުގައި ކާމިޔާބުކޮށްދިނީ ފޯވާޑް ލިންޑާ ކައިސެެޑޯ އެވެ. އަދި ބްރެޒިލް އިން މެޗުގެ ނަތީޖާ އެއްވަރުކުރި ލަނޑު ފުރަތަމަ ހާފުގެ އިތުރުވަގުތުގެ ތެރޭގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ މިޑްފިލްޑަރު އަލޮންސޯ ކޮސްޓެންޓީނޯ އެންޖެލީނާ އެވެ.

މި މެޗުގައި ކޮލަމްބިއާ އިން ދެވަނަ ފަހަރަށް ލީޑުހޯދި ލަނޑަކީ ފަހުހާފުގެ 69 ވަނަ މިނެޓުގައި ބްރެޒިލްގެ ޑިފެންޑަރު ޓާޝިން އަތުން ބައިކޮޅަށް ވަން ލަނޑެކެވެ. އަދި ބްރެޒިލް އިން ދެވަނަ ފަހަރަށް ނަތީޖާ އެއްވަރުކުރި ލަނޑު މެޗުގެ 80 ވަނަ މިނެޓުގައި ފޯވާޑް އަމަންޑާ ގުޓިއަރޭޒް ކާމިޔާބުކުރިއިރު އޭގެ އަށް މިނެޓްފަހުން ކޮލަމްބިއާގެ މޭރާ ރަމިރޭޒް ވަނީ އިތުރު ލަނޑެއް ކާމިޔާބުކޮށް މިމެޗުގައި ތިންވަނަ ފަހަރަށް އެޓީމަށް ލީޑު ހޯދައިދީފައެވެ.

ނަމަވެސް ދެވަނަ ހާފުގެ އިތުރު ވަގުތުގެ ތެރޭގައި ބްރެޒިލްގެ ތަޖުރިބާކާރު ފޯވާޑް މާޓާ ވަނީ މިމެޗުގައި އެޓީމަށް ތިންވަނަ ފަހަރަށް ނަތީޖާ އެއްވަރުކޮށްދީފައެވެ. އަދި ނަތީޖާ ނެރުމަށްކުޅުނު އިތުރުވަގުތުގެ 15 މިނެޓުގެ ފުރަތަމަ ހާފުގެ އެންމެ ފަހު މިނެޓުގައި މާޓާ ވަނީ އިތުރު ލަނޑެއް ކާމިޔާބުކޮށް މިމެޗުގައި ފުރަތަމަ ފަހަރަށް އެޓީމަށް ލީޑު ހޯދައިދީފައެވެ.

ކޮލަމްބިއާ އިން މެޗުގެ ނަތީޖާ އެއްވަރުކުރި ލަނޑު އިތުރު ވަގުތުގެ ދެވަނަ ހާފުގެ 10 ވަނަ މިނެޓުގައި ކާމިޔާބުކޮށްދިނީ އެޓީމުގެ ލެއިސީ މާރިއާ ސަންޓޯސް ހެރެއިރާ އެވެ. އަދި މިލަނޑާއެކު މެޗުގެ 120 މިނެޓުގެ ކުޅުން ނިމިގެންދިޔައީ 4-4 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މިއާއެކު މެޗުގެ ނަތީޖާނެރުމަށް ޖެހި ޕެނަލްޓީގައި ބްރެޒިލްގެ ހަތް ޕެނަލްޓީގެ ތެރެއިން ފަސް ޕެނަލްޓީ އެޓީމުން ކާމިޔާބުކުރިއިރު، ކޮލަމްބިއާގެ ހަތް ޕެނަލްޓީގެ ތެރެއިން އެޓީމަށް ކާމިޔާބުކުރެވުނީ ހަތަރު ޕެނަލްޓީ އެވެ. މިއާއެކު މެޗުގެ ކުޅުން ނިމިގެންދިޔައީ 4-5 ގެ ނަތީޖާއަކުން ބްރެޒިލް ކުރީގައި އޮވެގެންނެވެ.