މާލޭގެ މަގުތަކުން ފެން ހިންދައި، ވެލި ބަސްތާ ޖެހުމުގެ މަސައްކަތް ފަށައިފި!
މާލެއަށް ބޯކޮށް ވާރޭވެހި ފެންބޮޑުވުމުގެ ސަބަބުން، ފެން ހިންދުމުގެ މަސައްކަތް އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ފަށައިފިއެވެ.
މިސަރަހައްދުން ދަތުރު ކުރަމުންދާ ކޮޅި ގަނޑެއްގެ ސަބަބުން މާލެ ސަރަހައްދަށް ބޯކޮށް ވާރޭ ވެހި، މާލޭގެ ބައެއް މަގު ތަކުގައި ވަރަށް ބޮޑަށް ވަނީ ފެން ބޮޑުވެފައެވެ. އަދި އޭގެ ސަބަބުން ބައެއް ގެތަކަށްވެސް ފެން ވަންނަމުންދާ އިރު، މަގު ތަކުން ފެން ހިންދުމުގެ މަސައްކަތް އެމްއެންޑީއެފް އިން ވަނީ ފަށާފައެވެ.
އެގޮތުން، އެސްޓީއޯ ފުށްގުދަން، އައިޖީއެމްއެޗް، ވެސްޓްޕާކު، އަދި ބޮޑުތަކުރުފާނުމަގުގައި ހުންނަ ބޮޑުވަޅު ކައިރީ ޕަންޕު ބަހައްޓައިގެން ފެން ހިންދުމުގެ މަސައްކަތް އެމްއެމްޑީއެފް އިން ކުރަމުންދާ ކަމަށް އެ އިދާރާއިން ވަނީ ބުނެފައެވެ.
މީގެ އިތުރުން ޢިމާދުއްދީން ސްކޫލާއި، ޓީވީއެމް އާއި، ސޯޝަލް ސެންޓަރު ކައިރީގައާއި އެ ސަރަހައްދުގައި ހުންނަ "ޖެލީ" ކައިރީގައި ޕަންޕު ބަހައްޓައިގެން ފެން ހިންދުމުގެ މަސައްކަތް ކުރަމުންދާ ކަމަށް އެމްއެމްޑީއެފް އިން ވަނީ މައުލޫމާތު ދީފައެވެ.
އަދި ފެން ހިންދުމަށް ކުރަމުންދާ މަސައްކަތުން، އާޓިފިޝަލް ބީޗު ކައިރިން ޖެލީ ސަރަހައްދުންނާއި، ނަސަންދުރަ ސަރަހައްދުން ވަނީ ވަރަށް ބޮޑަށް ފެން ހިނދިފައިވާ ކަންވެސް އެ އިދާރާއިން ވަނީ ފާހަގަކޮށްފަ އެވެ.
އެ ސަރަހައްދު ތަކުގެ އިތުރުން، އެހެނިހެން ސަރަހައްދު ތަކާއި، ބައެއް ރަށްތަކުގައިވެސް ފެން ހިންދުމުގެ މަސައްކަތް އެމްއެންޑީއެފް އިން އަންނަނީ ކުރަމުންނެވެ.
އަދި މީގެ އިތުރުން އެ އިދާރާއާއި، ފުލުހުން އަންނަނީ ބޯ ވާރޭގައި ނުކުމެ، ފެން ވަންނަ ތަން ތަނުގައި ވެލިބަސްތާ ޖެހުމުގެ މަސައްކަތް ކުރަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
