ޕީއެސްއެމްގެ އެމްޑީގެ މަގާމަށް ކުޅަދާނަ ހުށައެޅުންތެރިޔާ ޝަކީބް
ޕަބްލިކް ސާވިސް މީޑިއާގެ މެނޭޖިން ޑިރެކްޓަރުގެ މަގާމަށް ކުޅަދާނަ ހުށައެޅުންތެރިޔާ އިބްރާހިމް ޝަކީބް (ޝަކީބެ) އައްޔަނު ކުރައްވައިފި އެވެ.
ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން އެކަން ވަނީ އިއުލާނު ކުރައްވާފަ އެވެ. ޝަކީބަކީ ޓީވީއެމްގެ އެންމެ މަގުބޫލް މޫނެވެ. ވަރަށް ރީތިކޮށް ޚަބަރު ވިދާޅުވާ އަދި ޓީވީގެ އެންމެ ޚާއްސަ ޝޯތައް ވެސް ހުށައަޅުއްވާފައިވާ ޝަކީބް މި ފަހުން ގެންދެވީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ބައިވެރިވެވަޑައިގަންނަވާ "ރައްުޔިތުންނާއެކު" ޕޮޑްކާސްޓް ހުށައަޅުއްވަމުންނެވެ.
ޝަކީބް އަކީ ތައުލީމީ ދާއިރާއަށް ވެސް ވަރަށް ދިގު މުއްދަތަކަށް ޚިދުމަތް ކުރެއްވި ބޭފުޅެކެވެ.
ޕީއެސްއެމްގެ އެމްޑީގެ މަގާމަށް ޝަކީބް އައްޔަނު ކުރެއްވީ ކުރީން އެ މަގާމުގައި ހުންނެވި އިބްރާހިމް ނަސްރީން އިސްތިއުފާ ދެއްވުމުންނެވެ. އޭނާ އިސްތިއުފާ ދެއްވީ މިދިޔަ ނޮވެމްބަރު 29 ވަނަ ދުވަހު އެވެ.
މި ސަރުކާރުގައި އެންމެ ގިނަ ވެރީން ބަދަލުވި އެއް ކުންފުންޏަކީ ޕީއެސްއެމް އެވެ. ފުރަތަމަ ހުންނެވީ ކުޅަދާނަ ހުށައެޅުންތެރިޔާ އަދި ނޫސްވެރިޔާ ޒީނާ ޒާހިރެވެ. ޒީނާ އިސްތިއުފާ ދެއްވުމުން އެ މަގާމަށް އައްޔަނު ކުރެއްވީ މުހައްމަދު ސައީދު އެވެ. ނަމަވެސް ކުޑަދުވަސްކޮޅެއްގެ ފަހުން އޭނާ ވެސް އިސްތިއުފާ ދެއްވި އެވެ.
އިސްތިއުފާ ދެއްވުމަށް ފަހު އޭގެ ހަގީގީ ސަބަބާއި ގުޅޭގޮތުން އެއްވެސް ބޭފުޅަކު ތަފްސީލުކޮށް ވާހަކައެއް ނުދައްކަވަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
