ދިވެހި ޝެފުން އުފެއްދުމަށް “މާސްޓަރ ޝެފް” ރާއްޖޭގައި ބޭއްވުމުގެ މަސައްކަތް ފަށައިފި

ދުނިޔޭގައި ކެއްކުމުގެ އެންމެ ބޮޑު ފްރެންޗައިސް ޝޯ “މާސްޓަރ ޝެފް” ރާއްޖޭގައި ބޭއްވުމުގެ މަސައްކަތް ފައްޓަވާނެ ކަމަށް ފަތުރުވެރިކަމާއި ބެހޭ ވުޒާރާގެ ވަޒީރު އިބްރާޙީމް ފައިސަލް ވިދާޅުވެއްޖެއެވެ.

ފަތުރުވެރިކަމާއި ބެހޭ ވުޒާރާއާއި އެމްއެމްޕީއާރްސީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ވަޒީރު ފައިސަލް ވިދާޅުވީ، ފަތުރުވެރިކަމުގެ ދާއިރާގައި މަސައްކަތް ކުރާ ޝެފުންގެ ތެރޭގައި ބޭރު ގައުމުތަކުގެ ގިނަ ޝެފުން ތިބި ކަމަށެވެ. އަދި އެ ދާއިރާގެ ޝެފުންނަށް ބައެއް ލަގްޒަރީ ރިސޯޓް ތަކުން 35،000 އެއްހާ ޑޮލަރު މުސާރައިގެ ގޮތުގައި ދެމުންދާކަންވެސް ފާހަގަކުރެއްވިއެވެ.

ފައިސަލް ވިދާޅުވީ، ދިވެހިންގެ ތެރޭގައިވެސް އެ ދާއިރާއިން ހުނަރު ހުރި ގިނަ ޒުވާނުންތަކެއް ތިބި ކަމަށާ، އެ ވަޒީފާތަކަށް ދިވެހިން އިސްކޮށް، ދިވެހިންގެ ޝައުގުވެރިކަންވެސް އެކަމަށް އުފެއްދުމަށް ސަރުކާރުން މަސައްކަތް ކުރަމުންދާ ކަމަށެވެ.

ޝެފުންނަކީ ވަރަށް ބޮޑު ހޭދައެއް އެބަޔަކަށް ކުރާ ބައެއް. ރާއްޖޭގައި އެބަތިބި، 30،000 ޑޮލަރު، 35،000 ޑޮލަރުގެ މުސާރައިގައި ޗެފުން ބައެއް ލަގްޒަރީ ރިސޯޓްތަކުގައި. މިއީ ދިވެހިންނަށްވެސް ކުރެވޭނެ ކަންކަން. އަޅުގަނޑު އިންޑަސްޓަރީ ކައިރިން އެދޭނަން މީގައި ޕްލޭނެއް އެކުލަވާލާފައި، އެ ރިސޯޓް ތަކުން އިންޓްރެސްޓް ހުންނަ (ދިވެހި) ކުދިންނަށް ފުރުސަތުދޭން

ވަޒީރު އިބްރާޙީމް ފައިސަލް

މިއާއެކު، ފައިސަލް ވިދާޅުވީ، އައު ޝެފުން އުފައްދައި، ޝެފުންގެ ހުނަރު ދައްކާލުމަށް، މާސްޓަރ ޝެފް ޝޯވ ރާއްޖޭގައި ބާއްވަން ފެށުމަށް ޕީއެސްއެމާއިއެކު މަޝްވަރާ ކުރައްވާނެ ކަމަށެވެ.

އަޅުގަނޑު އިރާދަލުރެއްވިއްޔާ ވަރަށް އަވަހަށް ޕީއެސްއެމާއެކު މަޝްވަރާ ކުރާނަން، މިކަމަށް (ޝެފުންނަށް ވުމަށް) އިންޓްރެސްޓް އުފެއްދުމަށް، މާސްޓަރ ޝެފް ކިޔާ އެ ޝޯ ރާއްޖެ ގެނައުމަށް. ދެން އަޅުގަނޑު މީގައި ބައެއް ރިސޯޓް ތަކުގައި ތިއްބެވި އިންވެސްޓަރުންނާ މިހާރު މަޝްވަރާވެސް ކުރެވިފައި ވަނީ. އެގޮތުން ބައެއް ބޭފުޅުން ވިދާޅުވި މިކަމުގައި އެބޭފުޅުން ވަރަށް ބޮޑަށް އެހީވާނޭ ކަމަށް. އެގޮތުން ރިސޯޓެއްގައި އެ ޝޯ ބޭއްވުމަށް

ވަޒީރު އިބްރާޙީމް ފައިސަލް

އެ ޝޯ އާއެކު، ޝެފުންގެ ވަޒީފާއަށް ދިވެހިންގެ ޝައުގުވެރިކަން ވަރަށް ބޮޑަށް އުފެއްދިގެންދާނެ ކަމަށް ފައިސަލް ވިދާޅުވިއެވެ.

މީގެ ކުރިންވެސް 2020 ވަނަ އަހަރުގައި ރާއްޖޭގައި މާސްޓަރޝެފް ބޭއްވުމަށް  އެއްބަސްވުމުގައި ސޮއިވެސް ކުރެވުނެވެ. ނަމަވެސް އެކަން ކުރިއަށް ގެނެދެވިފައެއް ނުވެއެވެ.