މިސްކިތަށް ގެއްލުންދިނުމަކީ ޓެރަރިޒަމްގެ އަމަލެއްކަމަށް ކަނޑައަޅަން ހުށަހަޅައިފި
މިސްކިތްތަކަށް ގެއްލުން ދިނުމަކީ ޓެރަރިޒަމްގެ ޢަމަލެއްގެ ގޮތުގައި ޤާނޫނުގައި ވަކިން ކަނޑައެޅުމަށް ރައްޔިތުންގެ މަޖިލީހަށް ބިލެއް ހުށަހަޅައިފިއެވެ.
މި ބިލު ހުށަހެޅުއްވީ ގަލޮޅުއުތުރު ދާއިރާގެ އެމްޑީޕީއަށް ނިސްބަތްވެވަޑައިގަންނަވާ މެންބަރު މުހައްމަދު އިބްރާހީމް (ކުޑޫ) އެވެ.
ބިލް ހުށަހެޅި ސަބަބެއްގެގޮތުގައި މެންބަރު ފާހަގަކުރެއްވީ، މިސްކިތްތަކަށް ގެއްލުން ދިނުން އާންމުވެ އެފަދަ އަމަލުތައް ތަކުރާރުވަމުންދިޔުމެވެ.
"މިފަދަ ޢަމަލުތަކަކީ މިސްކިތްތަކުގެ ޙުރުމަތާއި ކަރާމާތަށް އުނިކަން ލިބޭ ކަންކަން،" މެންބަރު ވިދާޅުވިއެވެ.
އެހެންކަމުން، މިސްކިތުގެ ކަރާމަތް ހިފެހެއްޓުމަކީ އިސްލާމުދީނަށް ހުރުމަތްތެރިކޮށް ހިތުމުގެ ތެރެއިންވާ ކަމެއް ކަމަށް ވީހިނދު އެފަދަ އަމަލުތައް ޓެރަރިޒަމްގެ އަމަލުތަކުގެ ތެރޭގައި ހިމެނުމަކީ މުހިންމު ކަމެއްކަމަށް މެންބަރު ފާހަގަކުރެއްވި އެވެ.
މި ބިލުގެ ދަށުން، ޓެރަރިޒަމް މަނާކުރުމުގެ ޤާނޫނުގެ 4 ވަނަ މާއްދާގެ ށ. ގެ 7 ވަނަ ނަންބަރުގެ ފަހަތަށް އާ ނަންބަރެއް އިތުރުކޮށް، "މިސްކިތަށް ގެއްލުން ދިނުން" އެއަކުރުގައި ހިމެނުމަށް އެދިފައިވެއެވެ.
މެންބަރު މި އިސްލާހު ހުށަހަޅުއްވާފައި މިވަނީ، މާލޭގައި ހުންނަ ތައިބާ މިސްކިތަށާއި އައްޑޫ ހިތަދޫގައި ހުންނަ މަސްޖިދުލް އުމަރުލް ފާރޫގަށް ގެއްލުންދިން މައްސަލަތަކެއް ފެންމަތިވެފައިވާ ދަނޑިވަޅެއްގައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
