ގުޅީފަޅު އެއްބަސްވުމަށް ބަދަލު ގެނައުމުން ހުށަހެޅި ކުއްލި މައްސަލަ ބޭރު
ކުރީ ސަރުކާރުން ކުރިއަށް ގެންދިޔަ "ބިންވެރިޔާ" ސްކީމުގެ ދަށުން ގުޅީފަޅުން ގޯތި ލިބުނު މީހުންނާއެކު އެ ސަރުކާރުން ހެދި އެއްބަސްވުންތައް އުވާލައި، އައު އެއްބަސްމެއްގައި ސޮއިކުރުމަށް ސަރުކާރުން މަޖުބޫރުކޮށްފައިވާ ކަމަށްބުނެ ހުށަހެޅި ކުއްލި މައްސަލަ ބަލައި ނުގަނެ ބޭރުކޮށްލައިފިއެވެ.
އެ މައްސަލަ މަޖިލީހަށް ހުށަހަޅުއްވާފައި ވަނީ މަޖިލީހުގެ ގަލޮޅު އުތުރު ދާއިރާގެ މެމްބަރު މުުހައްމަދު އިބްރާހިމް (ކުޑޫ)އެވެ. އެ މައްސަލަ ބަލައިގަތުމަށް 12 މެމްބަރުން ވޯޓުދެއްވި އިރު މައްސަލަ ބަލައިނުގަންނަން 34 މެމްބަރުން ވޯޓުދެއްވިއެވެ.
އެ މައްސަލައިގައި ކުޑޫ ވިދާޅުވީ، އެމްޑީޕީގެ ސަރުކާރުން ފެށި "ގެދޮރުވެރިޔާ" ސްކީމްގެ ދަށުން ގޯތިތައް ލިބޭނެ މީހުން ކަނޑައަޅައި، އެ ލިސްޓުތައް ދިވެހި ސަރުކާރުގެ ގެޒެޓުގައި އިޢުލާނުކޮށް، ގޯތި ހަވާލުކުރުމުގެ އެއްބަސްވުމުގައި ސަރުކާރުން އެ ފަރާތްތަކާއެކު ސޮއިކޮށްފައިވަނިކޮށް، އެ އެއްބަސްވުން ހަދައިފައިވަނީ ޤާނޫނާ ފުށުއަރާގޮތަށް ކަމަށް ބުނެ، އެ އެއްބަސްވުން ބަދަލުކޮށްފައިވާ ކަމަށެވެ.
ކުޑޫ ވިދާޅުވީ، ކުރީގެ އެއްބަސްވުން މި ސަރުކާރުން އުވާލައި، ގޯތި ދިނުމުގެ އުސޫލަށް ބަދަލު ގެނައުމަށްފަހު، އަލަށް ހެދި އުސޫލުގެ ދަށުން އެކުލަވާލި އެއްބަސްވުމުގައި ސޮއިކުރުމަށް، ގޯތި ލިބުނު މީހުންނަށް މަޖުބޫރު ކުރުވަމުންދާ ކަމަށެވެ.
އެކަމަކީ ރައްޔިތުންގެ ބައެއްގެ ކަންބޮޑުވުން ނުހަނު ބޮޑަށް އޮތް ކަމެއް ކަމަށް ވެފައި، މުޖުތަމައުގެ އާއްމު މަސްލަހަތާ ސީދާ ގުޅިފައިވާ ކަމެއް ކަމަށް ވެސް ވާކަން ފާހަގަކުރައްވައި އޭނާ ވަނީ މަޖިލީހުން އެކަމާއި މެދު ޖަވާބުދާރީކުރުވުމަށް އެ މައްސަލަ ހުށަހަޅުއްވާ ކަމަށް ވިދާޅުވެފައެވެ.
ގޯތި އެއްބަސްވުމަށް ބަދަލު ގެނެވުނީ، ކުރިން ހަދާފައިވާ އެއްބަސްވުން ޤާނޫނާ ފުށުއަރާތީ ކަމަށް ގެދޮރުވެރިކަމާ ބެހޭ ވަޒީރު ޑރ. އަބްދުالله މުއްޠަލިބު ވަނީ ވިދާޅުވެފައެވެ.
އެގޮތުން ވަޒީރު މުއްޠަލިބު ވިދާޅުވީ، ބިންވެރިޔާ ސްކީމުން ގޯތިދޫކުރުމަށް ކުރެވޭ އެއްބަސްވުމަށް ގެނެވުނު ބަދަލު ގެނެވުނީ ދައުލަތުން ހަދާ އެއްބަސްވުންތައް ހުންނަންޖެހެނީ ޤާނޫނާ ފުށުނާރާ ގޮތަށް ކަމަށްވާތީ ކަމަށެވެ.
އަދި ބިިމާބެހޭ ގާނޫނުގެ 11 ވަނަ މާއްދާގައި ދިރިއުޅުމަށް ގޯތި ދެވޭ ގޮތް ސާފުކޮށް ބަޔާންކޮށްފައިވާކަން ފާހަގަކުރައްވައި ވަޒީރު ވަނީ އެ ގާނޫނުގެ އެ މާއްދާތައް މީސްމީޑިއާގައި ހިއްސާވެސް ކުރައްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
