ކުޑަ ޤައުމެއް ކަމަށްވާ ކޭޕް ވާޑޭ އަތުން، ސްޕެއިނަށް ލަދުވެތި ނަތީޖާއެއް

މިފަހަރުގެ ވަރލްޑްކަޕްގައި ވާދަކުރާ އެންމެ ކުޑަ އެއް ޤައުމުކަމަށްވާ، ކޭޕް ވާޑޭ އާއި ދުނިޔޭގެ ފުޓްބޯޅައިގެ ގަދަ ބާރެއްގެ ގޮތުގައި ހިމެނޭ ސްޕެއިން ބައްދަލުކުރިމެޗް ގިނަ ބަޔަކު ހީކުރިގޮތާ ހިލާފަށް ނިމިއްޖެއެވެ.

މިމެޗް ނިމުނީ އެއްވެސް ޓީމަކަށް ލަނޑެއް ނުޖެހިއެވެ. ކޭޕް ވާޑޭގެ ފަރާތުން ރަނގަޅު ކުޅުމެއް ފެނިގެންދިޔަ މިމެޗްގެ ހީރޯއަކީ ކޭޕް ވާޑޭގެ ކީޕަރު އުމުރުން 40 އަހަރުގެ ވޮޒްނިއާ އެވެ. އޭނާ ވަނީ މި މެޗްގައި ހުށިޔާރުކަމާއެކު ސްޕެއިންގެ ހަމަލާތައް ދިފާއުކޮށްފައެވެ.

މެޗްގެ ފުރަތަމަ ހާފްގައި ސްޕެއިނުން ގިނަ ހަމަލާތަކެއް ވަނީ އުފައްދާފައެވެ.

މެޗްގެ ފުރަތަމަ ހާފްގައި ސްޕެއިނަށް ލަނޑެއް ނުޖެހުމުން ދެވަނަ ހާފްގެ 70 މިނެޓްތެރޭގައި ކޯޗް ފުއެންޓޭ ވަނީ ބަދަލުތަކެއް ގެނެސްފައެވެ. އެގޮތުން މެޗުގެ ދެވަނަ ހާފުގައި ލަމީން ޔަމާލް ކުޅެން އެރުވުމާއެކު، ސަޕޯޓަރުންނަށް ކޮންމެވެސް ވަރެއްގެ ހަމަޖެހުމެއް ވަނީ ލިބިފައެވެ. ނަމަވެސް މެޗްގެ ނަތީޖާ ބަދަލުކޮށްލެވޭ ގޮތެއް ނުވެ، މެޗް ނިމުނީ އެއްވެސް ޓީމަކަށް ލަނޑެއް ކާމިޔާބު ނުކުރެވިއެވެ. މެޗަށް ޔަމާލް ކުޅެން އެރިއިރު، އޭނާއަށް ލިބުނު އަނިޔާ އަދިވެސް މުޅިން ރަނގަޅު ނުވާކަމަށް ރިޕޯޓްތައް ބުނެއެވެ.

ކޭޕް ވާޑޭ އާއި ސްޕެއިން ބައްދަލުކުރިމެޗް ލަނޑެއް ނުޖެހި ނިމުނުއިރު، މިއީ ވަރލްޑްކަޕްގެ ތާރީހުގައިވެސް ފެނިގެންދިޔަ ހައިރާންކުރުވަނިވި އެއް ނަތީޖާކަމަށް ބައެއް މީޑިއާތަކުން ވަނީ ފާހަގަކޮށްފައެވެ. ކޭޕް ވާޑް މިވަގުތު އޮތީ ފީފާ ރޭންކިންގެ 67 ވަނައިގައެވެ. ސްޕެއިން އޮތީ ފީފާ ރޭންކިންގެ ދެވަނާގައެވެ.