ކޭޑީ ކުންފުންޏަށް ހއ.ހުވަހަންދޫ ދިންކަމަށް ދެކެވޭ ވާހަކަ، ދަނޑުވެރިކަމާ ބެހޭ ވުޒާރާއިން ދޮގުކޮށްފި

ދަނޑުވެރިކަމުގެ ބޭނުމަށް ކޭޑީ ކުންފުންޏަށް ހއ.ހުވަހަންދޫ ދިންކަމަށް ދެކެވެމުންދާ ވާހަކަތައް ދަނޑުވެރިކަމާ ބެހޭ ވުޒާރާއިން ދޮގުކޮށްފިއެވެ.

ދަނޑުވެރިކަމަށް ޙާއްސަކޮށް ހއ. އަތޮޅުގެ ރަށެއް ކަމުގައިވާ ހުވަހަންދޫ، އަޑިނޭނގޭ ޑީލެއްގެ ދަށުން ބަޔަކަށް ދިންކަމަށް ބައެއް މީޑިއާތަކުން ރިޕޯޓްކުރުމާ ގުޅިގެން މިއަދު ދަނޑުވެރިކަމާ ބެހޭ ވުޒާރާއިން ނެރުނު ބަޔާނެއްގައި ބުނެފައިވަނީ، ފިޝަރީޒް މިނިސްޓްރީއާ ވަކިވުމަށްފަހު މިވީހާތަނަށް އެ ވުޒާރާއިން ދަނޑުވެރިކަމަށް ހާއްސަކޮށް އެއްވެސް ބަޔަކަށް ރަށެއް ދޫކޮށްފައިނުވާނޭކަމަށެވެ.

އެ ވުޒާރާއިން ބުނީ، ކޭޑީ ކުންފުންޏަށް ހުވަހަންދޫ ދިންކަމަށް ބުނެ ދައުރުވަމުންދާ ފޮޓޯއަކީ ހއ.ދިއްދޫ ދާއިރާގެ މެމްބަރާއެކު ބޭއްވި ބައްދަލުވުމެއްގެ ތެރެއިން ނަގާފައިވާ ފޮޓޯއެއް ކަމަށެވެ. ހއ. ދިއްދޫ ދާއިރާގެ މެމްބަރު ލަތީފުގެ އިތުރުން ކޭޑީ އެންޓަޕްރައިސިސް ކުންފުނީގެ ބޭފުޅުން ބައިވެރިވި އެ ބައްދަލުވުމުގައި ދަނޑުވެރިކަމުގެ ތަރައްޤީއަށް ކުރިޔަށް ގެންދެވިދާނެ މަސައްކަތްތަކާ ގުޅޭ ޚިޔާލު ބަދަލުކުރެއްވިކަން ފާހަގަކުރަމުން ދަނޑުވެރިކަމާ ބެހޭ ވުޒާރާއިން ބުނީ، އެދުވަހު ކުރިއަށްގެންދިޔަ ވާހަކަތަކުގައި ހުށަހެޅުގެންދިޔަ އެއްވެސްކަމަކާއި ގުޅޭގޮތުން ގޮތެއް ނިންމާފައި ނުވާނެކަމަށެވެ.

ހއ. ހުވަހަންދޫއަކީ ވަގުތީގޮތުން ހއ. އަތޮޅުގެ ކައުންސިލާއި ހަވާލުކޮށްފައިވާ ރަށެއްކަމުގައި ފާހަގަކޮށް އިތުރަށް ބުނެފައިވަނީ އެވުޒާރާއިން ރަށްތަށް ކުއްޔަށް ދޫކުރަނީ ވަކި ގަވައިދުތަކަކާއި އުސޫލުތަކެއްގެ މަތިން ކަމަށާއި އެފަދަ ނިންމުމެއް ނިންމާނީ އުސޫލުތަކާއި ހިލާފު ނުވާގޮތެއްގެ މަތިން ކަމަށެވެ. އެވުޒާރާގެ މަސައްކަތްތަށް އަބަދުވެސް ބައްޓަންކޮށްފައިވާނީ ވީހާވެސް ދެފުށް ފެންނަ ގޮތަށްކަމަށާއި މީޑިޔާތަކަށް މަޢުލޫމާތު ހޯދާ ލިބިގަތުމަށްވެސް ފަސޭހަ އުސޫލެއްގެ ދަށުންކަމަށެވެ.

ހުވަހަންދޫއަކީ ހއ ހޯރަފުށީ އެއާޕޯޓާ އެއްފަޅެއްގައި އޮންނަ ރަށެކެވެ. އެރަށް މިހާރު އޮންނަނީ ހއ.އަތޮޅޫ ކައުންސިލްގެ ބެލުމުގެ ދަށުގައެވެ.