ޖީ20 ގައުމުތަކުގެ ތެރެއިން އެންމެ ރައްކާތެރި ޤައުމަކަށް ސައުދީ އަރަބިއްޔާ

ޖީ 20 ޤައުމުތަކުގެ ތެރެއިން 2025 ވަނަ އަހަރުގެ ސޭފްޓީ އިންޑެކްސް/ ރައްކާތެރިކަމުގެ އިންޑެކްސްގައި އެއްވަނަ، ސަޢުދީ ޢަރަބިއްޔާއަށް ލިބިއްޖެއެވެ.

ސަޢޫދީ ޖެނެރަލް އޮތޯރިޓީ ފޯ ސްޓެޓިސްޓިކްސް އިން އާންމުކުރި ތަފާސް ހިސާބުތައް ބިނާވެފައިވަނީ އދ.ގެ ދެމެހެއްޓެނިވި ތަރައްޤީގެ ލަނޑުދަނޑިތަކުގެ އިންޑިކޭޓާ ޑޭޓާބޭހުގެ މައްޗަށެވެ. ސައުދީ ޕްރެސް އެޖެންސީ (އެސްޕީއޭ) އިން ރިޕޯޓުކޮށްފައިވާ ގޮތުގައި އެ ޤައުމުގެ އާބާދީގެ 97.7 އިންސައްތަ މީހުން ރޭގަނޑު އެކަނި އެ މީހުންގެ އަވައްޓެރި ސަރަހައްދުތަކުގައި ހިނގާފައި އުޅެން ރައްކާތެރި ކަމަށް ދެކެއެވެ.

މި ތަފާސް ހިސާބުތަކުން ދައްކާ ގޮތުގައި ރޭގަނޑު އެކަނި، އެމީހަކު ދިރިއުޅޭ ސަރަހައްދުތަކުގައި ހިނގާފައި އުޅެން ރައްކާތެރި ކަމަށް ދެކޭ އަންހެނުންގެ ނިސްބަތް 94.9 އިންސައްތައިގައި ހުރި އިރު ސައުދީ ރައްޔިތުންގެ ތެރެއިން 97 އިންސައްތަ އަދި 60 އަހަރާއި 64 އަހަރާ ދެމެދުގެ މީހުންގެ 97.2 އިންސައްތަ މީހުން ވެސް އެ ގޮތަށް ދެކޭ ކަމަށް ދައްކައެވެ.

އެސްޕީއޭ އިން ބުނެފައިވާ ގޮތުގައި މި ނަތީޖާތައް ދައްކައިދެނީ މުޅި ޤައުމުގައި ރައްކާތެރިކަމުގެ މަތީ ފެންވަރެއް ދެމެހެއްޓުމަށް ސަރުކާރުގެ އިދާރާތަކުން ކުރަމުން އަންނަ މަސައްކަތެވެ.

މި ނަތީޖާ ގުޅިފައިވަނީ ސައުދީ ވިޝަން 2030 އާ އެއްގޮތަށް އިޤުތިޞާދީ، ކާބޯތަކެތީގެ، ތިމާވެށީގެ، ޞިއްޙީ، އިޖުތިމާޢީ، ސިޔާސީ، ފިކުރީ، ޓެކްނޮލޮޖީ އަދި ސައިބާ ސެކިއުރިޓީ ދާއިރާތަކުގައި ސަލާމަތީ ކަންކަމާއި ހަމަޖެހުން ވަރުގަދަ ކުރުމުގެ އިސްނެގުންތަކާއެވެ.

ޖެނެރަލް އޮތޯރިޓީ ފޯ ސްޓެޓިސްޓިކްސް އިން އެ އިދާރާގެ މަސައްކަތް ކުރަނީ ބައިނަލްއަޤުވާމީ ތަފާސް ހިސާބުގެ މިންގަނޑުތަކާ އެއްގޮތް ސްޓެޓިސްޓިކަލް ބިޒްނަސް ޕްރޮސެސް މެނުއަލް އަށް ބިނާކޮށް އެކުލަވައިލެވިފައިވާ އެއް މެތޮޑޮލޮޖީއެއްގެ ދަށުންނެވެ.

ވަކި ރިޕޯޓެއްގައި އެ އިދާރާއިން ހާމަކޮށްފައިވާ ގޮތުގައި 2025 ވަނަ އަހަރު ސައުދީ އަރަބިއްޔާގެ އާބާދީގެ 75.3 އިންސައްތަ ސަގާފީ ހަރަކާތްތަކުގައި ބައިވެރިވެފައިވެއެވެ. މި އަދަދު ދައްކައިދެނީ މުޅި ޤައުމުގައި ސަގާފީ ހަރަކާތްތަކުގައި ރައްޔިތުންގެ ބައިވެރިވުން އިތުރުވަމުން އަންނަ ކަމެވެ.

މި ތަފާސް ހިސާބުތައް ޢާންމުކޮށްފައިވަނީ "ރަޤަމް ސައުދީ" އިސްނެގުމުގެ ދަށުންނެވެ.

ޖީ20 ގައުމުތަކުގެ ތެރޭގައި ޔޫރަޕްގެ ގައުމުތަކާއި އޭޝިޔާ ބައްރުގެ ބައެއް ޤައުމުތައް ހިމެނެއެވެ.