ވީއައިއޭ އައު ޓާމިނަލުގެ ބޭނުންކުރާ އެއާލައިންތަކުގެ އަދަދު 18 އަށް އަރައިފި

ވެލާނާ އިންޓަރނޭޝަނަލް އެއާޕޯޓްގެ އައު ޓާމިނަލްގެ ހިދުމަތް 18 އެއާލައިނަކުން ހޯދާކަމަށް މޯލްޑިވްސް އެއާޕޯޓްސް ކޮމްޕެނީން ބުނެފިއެވެ.

ވީއައިއޭ އައު ޓާމިނަލްގެ ހިދުމަތް ރަސްމީކޮށް ބޭނުންކުރަން ފަށާފައިވަނީ، މިއަހަރު ފާހަގަކުރި ރާއްޖޭގެ މިނިވަންދުވަހާ ދިމާކޮށް ޖުލައި 26 ވަނަ ދުވަހުއެވެ. ވީއައިއޭ ބޭނުންކުރި ފުރަތަމަ ބޯޓަކީ ރާއްޖޭގެ ޤައުމީ އެއާލައިން މޯލްޑިވިއަންއެވެ. އޭގެ ފަހުން ފަހަރަކު އެއާލައިނެއް ވީއައިއޭ އައު ޓާމިނަލުގެ ހިދުމަތް ހޯދަން ފެށިއިރު، މިހާތަނަށް 18 އެއާލައިނަކުން އައުޓާމިނަލް ބޭނުންކުރަން ފަށާފައިވާކަމަށް އެމްއޭސީއެލުން ބުނެއެވެ.

އެންމެފަހުން ވީއައިއޭ އައު ޓާމިނަލް ބޭނުންކުރަން ފެށި އެއާލައިނަކީ އިންޑިއާގެ ޤައުމީ އެއާލައިން އެއާ އިންޑިއާއެވެ. އެ އެއާލައިނުން ޓާމިނަލް ަން ބޭނުންކުރަން ފަށާފައިވަނީ އިއްޔެއެވެ.

އައުޓާމިނަލް ބޭނުންކުރަން ފެށި އެއާލައިންތަކުގެ ތެރޭގައި ހިމެނެނީ މޯލްޑިވިއަން, އެއާ އަރަބިއާ, ބިއޯންޑް, ފިޓްސް އެއާ، ބެއިޖިންގް ކެޕިޓަލް އެއާލައިންސް, ބަޓިކް އެއާ, ބެންކޮކް އެއާވޭސް، އިންޑިގޯ، ގަލްފް އެއާ، މެލޭޝިއާ އެއާ، ސައުދިއާ، ޗޮންޗިން އެއާ، ބްރިޓީޝް އެއާވޭސް، ވާޖިން އެޓްލާންޓިކް، އަޒަރުބައިޖާން އެއާ، އަދި އެއާ އިންޑިއާއެވެ.

ވީއައިއޭ އައު ޓާމިނަލްގެ ބޭނުން ނުކުރާ ބައެއް މުހިންމު އެއާލައިންތަކުގެ ތެރޭގައި ސްރީލަންކަން އެއާލައިން، އެމިރޭޓްސް އަދި އިއްތިހާދު ފާހަގަކޮށްލެވެއެވެ. އެމްއޭސީއެލުން ބުނީ ކުރިއަށް އޮތްތަނުގައި ވަރަށް އަވަހަށް އިތުރު އެއާލައިނުންތަކުން ޓާމިނަލް ވަން ބޭނުންކުރަން ފަށާނޭކަމަށެވެ.

ރާއްޖޭގެ ފަތުރުވެރިކަމުގެ ހައި ސީޒަނާ ކުރިމަތިލިއިރު، އައުޓާމިނަލްގެ ހިދުމަތް ފެށިފައިވުމުން ރާއްޖެ އަންނަ ފަތުރުވެރިންގެ އަދަދު އިތުރުވެ، އަދި ފަތުރުވެރިންނަށް ރަނގަޅު ހިދުމަތެއް ދެވިގެންދާނޭކަމަށް އެމްއޭސީއެލުން ފާހަގަކުރެއެވެ.