ރައީސް މައުމޫންއަށް މިޖެހިވަޑައިގެންނެވި ހާލުކޮޅެއް ދެއްތޯއެވެ؟

މީގެ 15 ވަރަކަށް އަހަރު ކުރިން މިހެން ހިތަށް އަރާނީ ކާކުހެއްޔެވެ. ރާއްޖޭގައި 30 އަހަރު ވެރިކަން ކުރައްވައި ގައުމުގެ ވަރަށް ގިނަ ބައެއްގެ ލޯތްބާއި ރުހުން ހޯއްދެވި، އަދި ގައުމަށް ވަރަށް ގިނަ ގުނަ ޚިދުމަތްތަކެއް ކުރެއްވި، ރައީސް އަލްއުސްތާޒު މައުމޫން އަބްދުލްގައްޔޫމް އެމަނިކުފާނުގެ މުސްކުޅިފުޅު އުމުރުފުޅުގައި މަގުމަތިން މަޑުމަޑުން ހިންގަވާފައި ގޮސް ގ.ކެނެރީގޭ މުހައްމަދު ނަޝީދުގެ އޮފީހުގެ ދޮރުގައި ޓަކިޖައްސަވަފާނެކަމަށް އެކަކަށްވެސް ޚިޔާލަށް ނުގެނެވޭނެއެވެ.

ނަޝީދަކީ މައުމޫންގެ ވެރިކަމުގައި ވަރަށް ގިނަ އަނިޔާތަކެއް ތަހައްމަލް ކުރައްވަން ޖެހިވަޑައިގެންނެވި ބޭފުޅެކެވެ. ރައީސް މައުމޫންގެ ވެރިކަމާ ދެކޮޅަށް ހިންގެވި ހަރަކާތްތަކުގެތެރޭގައި 15 ވަރަކަށްފަހަރު ފުލުހުން ބަންދުކޮށް ވައްކަމާ ޓެރަރިޒަމްގެ ޝަރީއަތް ހިންގުނެވެ. ޖަލުގައި ލިބުނު އަނިޔާތަކުގެ ސަބަބުން ލޯފުޅަށް އިޔާދަނުކުރެވޭވަރުގެ ގެއްލުމާ ކުރިމަތިވެވަޑައިގެންފައި ވެއެވެ. މުޅި ގައުމުގައި އޭރު އޮތީ ރައީސް މައުމޫންގެ އާރާބާރެވެ.

ޝަމްސުއްދީންގެ ރަސްކަމަކަށްފަހު ރާއްޖޭގައި އެންމެ ގިނަ ދުވަހު ވެރިކަން ކުރެއްވި ބޭފުޅާއަށް މައުމޫން ވެވަޑައިގަންނަވައެވެ. ރަސްކަލަކަށް ނުވިޔަސް އެވަރުގެ އިއްޒަތް އެމަނިކުފާނަށް އެރުވުނެވެ. ޝަމްސުއްދީން ރަދުންނަށް ޖެހިވެޑައިގެންނެވި ހާލުކޮޅެއް މިހާރުގެ ޖީލުގެ މީހުންނަކަށް ވަރަށް ނޭނގޭނެއެވެ. އެރަދުން ދަރިކަލުން ޕްރިންސް ހަސަން އިއްޒައްދީނަށްޓަކައި ކުޅުއްވި ސިޔާސީ ގޭމެއްގައި އަތިރީގޭ އާއިލާގެ ރަންނަބަނޑޭރި ކިލެގެފާނުގެ އާއިލާއާޖެހި ބަލިވެވަޑައިގެން ޝަމްސުއްދީން ވެރިކަމުން އަޒުލުކޮށް، ޝަރީއަތް ހިންގައި، މީހުންނާ އެކަހެރިކުރުމަށްޓަކައި މާލެއާ ކައިރީގައި މިއޮތް ވިލިނގިއްޔަށް އަރުވާލާފައި ބެހެއްޓުމަށްފަހު ހާލުކޮޅުހުރިގޮތުން މާލޭގެ ގޭބަންދަށް ބަދަލުކުރެވިފައި ހުންނަވަނިކޮށް އަވަހާރަވިއެވެ.

ރައީސް މައުމޫން ވެރިކަމުން ފައިބައިވަޑައިގެންހުންނަވައި އަމިއްލަފުޅު ދަރިކަލުން ފާރިޝްމައުމޫނަށްޓަކައި ސިޔާސީ ގޭމެއް ކުޅުއްވީ އަމިއްލަ ކޮއްކޮއާއެވެ. ސިޔާސީ ގޭމުގައި ދެބޭފުޅުންވެސް ބަލިވެވަޑައިގަތީއެވެ. 30 އަހަރުވަންދެން ބިނާކުރި ކާމިނީގޭ ބާރު ރެނދުލައި ބާރު ކެނޑުނީއެވެ. އެންމެފަހުން ވެރިކަމުގެ ބާރުތައް ލިބިވަޑައިގަތީ ރައީސް މައުމޫންގެ ވެރިކަމުގައި އަނިޔާކޮށް ޖަލަށްލައި އަރުވައިލެވުނު އެމަނިކުފާނާ ސިޔާސީ އެންމެބޮޑު ދުޝްމަން ކެނެރީގޭ މުހައްމަދު ނަޝީދަށެވެ. ނަޝީދުގެ ސިޔާސީ މައިޖަގަހަ ގ. ދުންފުނިގެ ފުލުހުންވަދެ ރޫޅައިލިގޮތް އަދި އެތަނުން ފެނުނުކަމަށް ފުލުހުން ބުނިހަތިޔާރުތަކުގެ ވާހަކަ ވަރަށް ގިނަ ބައެއްގެ ހަނދާނުގައި ހުންނާނެއެވެ.

2008 ވަނަ އަހަރަށްފަހު މިއީ ނަޝީދުގެ އަތްޕުޅަށް ވެރިކަމުގެ ބާރުތައް އެރި ދެވަނަ ފަހަރެވެ. ވެރިކަމުގެ ފުރަތަމަ ދެތިން އަހަރުތެރޭގައި މުއުމޫންގެ ވެރިކަމުގައި ހިންގާފައިވާ ކަންކަން ތަހްގީގުކުރުމަށް ރައީސް މައުމޫން ފުލުސް އޮފީހަށް ހާޒިރު ކުރެއްވިވެ. އެއަށްފަހު ނަޝީދުގެވެރިކަން ނިމި ކޮއްކޮ އަބްދުﷲ ޔާމީންގެ ވެރިކަމުގެތެރޭގައި ޝަމްސުއްދީން ރަދުންނަށް ޖެހުނުހާލުކޮޅު ޖެހިވަޑައިނުގެން މައުމޫން ސަލާމަތްވެވަޑައިގަތީ ކިރިޔާއެވެ.

ކޮންމެއަކަސް ސިޔާސީ ގޮތުން ދިރިހުންނެވުމަށްޓަކައި މުހައްމަދު ނަޝީދު ރައީސް މައުމޫނާ ވަރަށް ދިގު ހަނގުރާމައެއް ކުރެއްވިއެވެ. އެހަނގުރާމަ ނިމި ނަޝީދަށް ކާމިޔާބުލިބިވަޑައިގަތުމުން މިއަދު އަޅުގަނޑުމެންނަށް މިފެންނަނީ މުސްކުޅިފުޅު އުމުރުފުޅުގައި އަލުން ދިއްލެވި ސިޔާސީ ހަޔާތުގެ ހުޅުކޮޅު ނިވިގެންދިޔަ ނުދެއްވުމަށްޓަކައި ރައީސް މުހައްމަދު ނަޝީދުގެ ފައިންޕުޅު ދެކެން މައުމޫން އުޅުއްވާތަނެވެ. މައުމޫންގެ އުމުރުފުޅާއި ޝަޚްސިއްޔަތާއި ސިޔާސީ ދިރިއުޅުއްވުމަށްބަލާއިރު ނަޝީދުގެ އެޕޮއިންޓްމަންޓެއް ލިބިވަޑައިނުގެން އުޅުއްވަންޖެހިވަޑައިގަތުމަކީ ވަރަށް ބޮޑަށް ނިކަމެތިވެވަޑައިގަތުމެއް ކަމަށް އެހެން މީހުންދެކޭނެއެވެ.

އާދޭހެވެ. މިއަދު އެންމެ އުފާކުރައްވާނެ އެއްބޭފުޅަކީ މުހައްމަދު ނަޝީދެވެ. މާޒީގެ ކަންކަން މާޒީއާ އެކުވެގެންދިޔައީއެވެ. މިއަދު މައުމޫނަށް ޖެހިވަޑައިގަންނަވާނީ އިއްޔެ ވަގަކަށް ހައްދައިވައި، ޓެރަރިސްޓަކަށްހެއްދެވި ނަޝީދުގެ ނިންމުންތަކަށް ތަބާވެވަޑައިގަންނަވާށެވެ. އެމްޑީޕީގެ އޮފީހަށް ވަޑައިގަންނަވަން މައުމޫނަށް އެޕޮއިންޓްމަންޓް ދެއްވީ އެހެންވެގެންނެވެ. އެއްވެސް އާރެއް ބާރެއް ނެތް ބޭފުޅެއްކަން ދެއްކެވުމަށެވެ. އެންމެންނަށް މައުމޫން މިއަދު ނިކަމެތި ވެފައިވާވަރު ދައްކައިލެއްވުމެވެ. އެއްވެސް އެހީތެރިއަކުނެތި ނަޝީދު އަރިހަށް މައުމޫން ވަޑައިގަންނަވަންޖެހިވަޑައިގަތީ ގިނިކަންޏާއެވެ. އިއްޔެ އާރާއި ބާރުގައި ވެރިކަން ކުރެއްވިޔަސް މިއަދު މުސްކުޅިފުޅު އުމުރުފުޅުގައި މަޑުމަޑުން ހިންގަވާފައިގޮސް ރައީސް މުހައްމަދު ނަޝީދާ އެސަލާމްކުރައްވާއިރު ނަޝީދުގެ މޫނުފުޅުމަތިން އެފެންނަ އެހެންކަހަލަ ހިނިތުންވުމުން މައުމޫނަށް އެކިޔުއްވައިދެއްވަނީ ސިޔާސީ ވާހަކައެކެވެ.

ރައީސް މައުމޫނަށް އެފަދަ ނިކަމެތިކަމަކާއި ބޭއިހްތިރާމް ތަޖުރިބާކުރައްވަން ޖެހިވަޑައިނުގެންނެވިނަމައޭ އަޅުގަނޑުގެ ހިތަށްއެރިއެވެ. އެކަމަކު އެމީހަކު ނިމިދާނީ އެމީހަކަށް ދައްކަވަން އޮތްތަނެއް ދައްކަވާފައޭ ބުނާ ހަރުބަހެއް އޮވޭނޫންތޯއެވެ.