އިޒްރޭލުގެ އަޅުވެތިކަން ނިމުމަކަށް ގެންނަން ހުށަހެޅި ޤަރާރަށް ރާއްޖެއިން ތާއީދުކޮށްފި

ބައިނަލްއަޤުވާމީ ޤާނޫނުތަކާ ޚިލާފަށް އިޒްރޭލުގެ ޒަޔަނިސްޓް ވެރިވެގަނެފައިވާ ފަލަސްޠީނުގެ ބިންތަކުން ފޭބުމަށް އިޒްރޭލާ ދެކޮޅަށް ފަލަސްތީނުން އދ.ގެ ޢާންމު މަޖިލީހަށް ހުށަހެޅި ޤަރާރަށް ތާއިދުކޮށް ރާއްޖެއިން ވޯޓް ދީފިއެވެ.

މި ގަރާރުގައި އިޒުރޭލަށް ގޮވާލާފައިވަނީ ޔަހުދީ އިސްތިއުމާރީ ބާރުތަކުން ހިސާރުކޮށްފައި އޮތް ފަލަސްތީންގެ ބިންތަކުން އެއް އަހަރު ތެރޭގައި ޔަހޫދީން ފައިބައި ފަލަސްތީނާ ބިންތައް ހަވާލުކުރުމަށެވެ. އދ. ގެ އާންމު މަޖިލީހުން ވަނީ މި ގަރާރެއް ފާސްކޮށްފައެވެ.

މި ގަރާރު ފާސްކުރުމަށް ރާއްޖެ ހިމެނޭހެން 124 ގައުމަކުން ވަނީ ވޯޓު ދީފައެވެ.އަދި 14 ގައުމަކުން ދެކޮޅަށް ވޯޓިދީފައިވެ އެވެ. އަދި 43 ގައުމަކުން ވަކިކޮޅަކަށް ވޯޓުދީފައެއް ނުވެ އެވެ.

ފަލަސްތީންގެ މި ގަރާރަށް ތުރުކީގެ އެއްބާރުލުން ވަރަށް ބޮޑަށް ލިބިފައިވެއެވެ. އަދި އާންމު މަޖިލީހަށް މި ގަރާރު ވެއްދުމަށް 50 ގައުމަކުން އެހީތެރިވެފައި އެވެ.

މި ގަރާރުގައި ބުނެފައި ވާ ގޮތުން 1967 ވަނަ އަހަރުން ފެށިގެން އިޒުރޭލުންގެ ފަލަސްތީނުގައި އެޅެމުންދާ އާބާދިތަކަކީ ދުނިޔޭގެ ހުރިހާ ގާނޫނަކާ ހިލާފަށް ހަދާފައި ހުރި އަބާދީ ތަކެއްކަމަށެވެ. ފަލަސްތީންގެ ރައްޔިތުން އެ މީހުންގެ އަމިއްލަ ބިންތަކުން ބޭރުކޮށް އެހެން ބައެއްގެ ވަޒަން ފޭރިގެންފައި އޮތް ކަމަށް ވެސް ވަނީ ބުނެފަ އެވެ.

މި ގަރާރު ބާރުއަޅަނީ 1967 ވަނަ އަހަރު އިޒުރޭލުން ވެރިވެގަތް ބިންތައް ދޫކޮށްލުމަށެވެ. އަދި ފަލަސްތީންގެ ބިންތަކުގައި ޔަހޫދީން ވަޒަންވެރިކުރުން ހުއްޓުވާލައި, ވަޒަންވެރިކޮށްފައި ހުރި ބިންތައް ދޫކޮށްލުމަށްވެސް ވަނީ ގޮވާލާފަ އެވެ.

ފަލަސްތީނުގެ ހައްޤުގައި ރާއްޖެއިން އަބަދުވެސް ބައިނަލްއަގުވާމީ މައިދާނުގައި އަޑުހަރުކޮށް ވަކާލާތު ކުރެއެވެ. ފަލަސްތީނުގެ ބިމުގައި ފަލަސްތީނުގެ ރައްޔިތުންނާ ދެކޮޅަށް ހިންގަމުން އަންނަ ޤަތުލް އާންމުތައް ރާއްޖެއިން ހަރުކަށި އިބާރާތުން ކުއްވެރި ކޮށްފަައިވެސް ވެއެވެ.