ހުޅުމާލޭ ފަޅުތެރެއަށް ގެއްލިގެން ހޯދަމުންދިޔަ މީހާ ފެނިއްޖެ

ހުޅުލޭ ސީ ޕްލޭން ޓާމިނަލްގެ އުތުރުން އޮންނަ ފަޅުގައި އަޅާފައި އޮތް ތެޔޮ ބާޖަކުން މޫދަށް ފޭބިފަހުން ޚަބަރެއް ނުވެގެން ހޯދަމުންދިޔަ ފަޅުވެރިޔާ ނިޔާވެފައި އޮއްވާ ފެނިއްޖެއެވެ.

ނިޔާވެފައިވައި ވަނީ ކ.ގުރައިދޫ / ރަތްވިލާގެ ، އިބްރާހިމް ޝާކިރު (48 އަހަރު)އެވެ.

އެމީހާ ގެއްލުނީ، ރޭ އިރުއޮއްސި 6:30 ހާއިރު ފަޅުތެރެއަށް ވަލެއް އެއްސުމަށް ފޭބި ފަހުންނެވެ.

އެމީހާގެ ހަށިގަނޑު ފެނުނީ މޫދުގެ އަޑިންނެވެ. ފެނުނީ މިއަދު ހެނދުނު 8:25 ކަންހާއިރުއެވެ.

ފުލުހުން ބުނީ، އެ މީހާ ހޮސްޕިޓަލަށް ގެންދިޔައިރުވެސް ނިޔާވެފައިވާކަމަށް ހުޅުމާލެ ހޮސްޕިޓަލުން މައުލޫމާތު ދީފައިވާ ކަމަށެވެ.

މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.