ގަލޮޅުދަނޑު އުވާލައި، ގައުމީ ފުޓްބޯޅަ ސްޓޭޑިއަމް ހުޅުމާލޭގައި އަޅަނީ
ލިޔުންތެރިޔާ
ޚަދީޖާ އަރުފާ
ގަލޮޅު ދަނޑު އުވާލައި ރާއްޖޭގެ ގައުމީ ފުޓްބޯޅަ ސްޓޭޑިއަމް ހުޅުމާލޭ ފޭސް އެކެއްގައި ތަރައްގީކުރަން ނިންމާފައިވާކަމަށް ސްޕޯޓްސް މިނިސްޓަރު އަބްދުالله ރާފިއު ވިދާޅުވެއްޖެ އެވެ.
ދައުލަތުގެ މީޑިއާއަށް ދެއްވި ބަސްދީގަތުމެއްގައި ވަޒީރު ވިދާޅުވީ، ގަލޮޅު ދަނޑަކީ ރާއްޖޭގެ ތާރީޚާ ވަރަށް ބޮޑު ގުޅުމެއް އޮތް ތަނެއް ކަމަށެވެ. އެހެން ނަމަވެސް، އެތަނަކީ ބައިނަލްއަޤުވާމީ ސްޓޭޑިއަމް އެއްގެ ސިފައިގައި ގާއިމް ކުރަން އެންމެ އެދެވޭ ތަން ނޫން ކަމަށެވެ.
އެހެން މިވަނީ އެތަނުގެ ސޭފްޓީއާއި ސެކިޔުރިޓީއާ އަދި އެހެނިހެން ގޮތް ގޮތުންވެސް، މާނައަކީ ޕާކިންއާ، ޓްރެފިކާއި އަދި އާއްމު ރައްޔިތުން ދިރިއުޅޭ ތަނެއްގެ މެދުގައި އެ އިނުމަކީ ކުޅިވަރުކުޅޭ ތަނެއް މިހާރު ގާއިމްކުރަން ބަލާއިރު އެންމެ އެކަށީގެންވާ ތަނެއް ނޫން. އެހެންކަމުން މި ސަރުކާރުގެ ސިޔާސަތަކީ ރާއްޖޭގެ ގައުމީ ފުޓުބޯޅަ ސްޓޭޑިއަމް ހުޅުމާލޭގެ ފޭސް 1 އަށް ބަދަލުކުރުން.
ސްޕޯޓްސް މިނިސްޓަރު އަބްދުالله ރާފިއު
ވަޒީރު އިތުރަށް ވިދާޅުވީ، ގަލޮޅު ދަނޑަކީވެސް، މިހާރު އެ ތަނުގެ ހާލަތު އޮތް ގޮތުން ތަޅާނުލައި ބަހައްޓާވަރުގެ ތަނެއް ނޫނން ކަމަށާ، ގަލޮޅު ދަނޑު ތަޅާލުމަށް ފަހު އާންމުންނަށް ފަސޭހައިން ވަދެ ނުކުމެވޭ، ކުޅިވަރު ކުޅޭ ތަނެއްގެ ގޮތުގައި ތަރައްގީ ކުރުމަށް ހަމަޖެހިފައިވާ ކަމަށެވެ.
އެހެންވީމާ ގަލޮޅު ދަނޑަކީ ފިޒިކަލް އެކްޓިވިޓީއަށް އަދި ކުޅުމަށް ހަދާފައި އޮތް ތަނެއް. އެހެން ނަމަވެސް ނެޝަނަލް ސްޓޭޑިއަމް އަޅާނީ ހުޅުމާލޭ ފޭސް 1 ގައި. އޭރުން ސްޕޯޓްސް ސެކިޔުރިޓީގެ މިންގަނޑުތަކާ އެއްގޮތަށް ގާއިމް ކުރެވިގެންދާނީ. އަދި ޓްރެފިކާއި ޕާކިންއާ، މިހުރިހާ ކަމަކަށް ބަލާފަ އެތަނުގައި އަޅުގަނޑުމެންނަށް މެނޭޖްކުރެވެން އޮތީމަ އެގޮތަށް އަޅުގަނޑުމެންގެ ވިސްނުން މިހުރީ،
ސްޕޯޓްސް މިނިސްޓަރު އަބްދުالله ރާފިއު
ހުޅުމާލޭ ފޭސް އެކެއްގެ ދެކުނުކޮޅުން ވަނީ ސްޓޭޑިއަމް ފުޓްބޯޅަ އެޅުމަށް ބިމެއް ވެސް ކަނޑައަޅާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
