އެވްރެޖްކޮށް މަހަކު 16 މީހުން ޝަރީޢަތް ނިމެންދެން ބަންދުގައި ބަހައްޓާ: ޕީޖީ ޝަމީމް

ދިވެހިރާއްޖޭގައި އެވްރެޖްކޮށް މަހަކު 16 މީހުން ޝަރީއަތް ނިމެންދެން ބަންދުކުރާކަމަށް ޕްރޮސިކިއުޓަރ ޖެނެރަލް ހުސެއިން ޝަމީމް ވިދާޅުވެއްޖެއެވެ.

ޕްރޮސިކިއުޓަރ ޖެނެރަލް އޮފީހުގެ މަސައްކަތްތަކާ ގުޅޭގޮތުން ރައްޔިތުންގެ މަޖިލީހުގެ ޖުޑިޝަރީ ކޮމިޓީއާ މަޢުލޫމާތު ޙިއްޞާކުރެއްވުމުގެ ފުރުޞަތަކަށް ޕްރޮސިކިއުޓަރ ޖެނެރަލް އެދިވަޑައިގެންފައިވާތީ އެ ކޮމިޓީއިން ޕްރޮސިކިއުޓަރ ޖެނެރަލްއާ ބައްދަލުކުރުމަށް މިއަދު ބޭއްވި ބައްދަލުވުމުގައި ވާހަކަފުޅު ދައްކަވަމުން ޝަމީމް ވިދާޅުވީ ޝަރީޢަތް ނިމެންދެން ބަންދުގައި އާއްމުގޮތެއްގައި 350 އާއި 400 އާ ދޭތެރޭގެ އަދަދެއްގެ މީހުން އުޅޭކަމަށެވެ.

އަދިއެހެން އެކަން ދިމާވަނީ ކޯޓުތަކުން މައްސަލަ ނުނިމި ދިގުލައިގެން ދާތީކަމަށްވެސް ޝަމީމް ވިދާޅުވިއެވެ.

"އެވްރެޖްކޮށް މަހަކު 16 ވަރަކަށް މީހުން ޝަރީއަތް ނިމެންދެން ބަންދުކުރޭ، ކޯޓަކުން 16 މައްސަލަ ނުއެއް ނިމޭ"

ޕްރޮސެކިއުޓަރ ޖެނެރަލް ޝަމީމް ވިދާޅުވިއެވެ.

ޝަމީމް އިތުރަށް ފާހަގަ ކުރެއްވި ގޮތުގައި، ޝަރީޢަތް ނިމެންދެން މިހާރު ބަންދުގައި ތިބޭނީ ކުޑަކުދިންނަށް ޖިންސީ ގޯނާ ކުރުމުގެ ތުހުމަތުގައި ތިބި މީހުންނާއި މީހުން މެރުމުގެ ތުހުމަތުގައި ތިބި މީހުންނާއި ތޫނު ހަތިޔާރު ބޭނުންކޮށްގެން މާރާމާރީ ހިންގުމުގެ ތުހުމަތުގައި ތިބި މީހުންގެ އިތުރުން ޓެރަޒިމްގެ ޢަމަަލު ހިންގުމުގެ ތުހުމަތުގައި ބަންދުކޮށްފައި ތިބި މީހުން، އަދި މަސްތުވާތަކެތީގެ ބޮޑެތި ނެޓްވޯކްތަކާއި ގުޅުންހުރިކަމަށް ތުހުމަތު ކުރެވޭ މީހުންނެވެ.

އެ ފަސް ކެޓަގަރީއަށް ފެތޭ މީހުން ފިޔަވާ އެހެން މީހުން ޝަރީޢަތް ނިމެންދެން ބަންދުގައި ނުތިބޭނެކަމަށްވެސް ޝަމީމް ވިދާޅުވިއެވެ.