ބީއެމްއެލްގައި ހުރި ފައިސާއިން ޓީ-ބިލް ދެއްކިކަމަށް ބުނާ ވާހަކަ މާލީ ވުޒާރާއިން ދޮގުކޮށްފި

ސްޓޭޓް ބޭންކް އޮފް އިންޑިއާ (އެސްބީއައި) އަށް ދައްކަންޖެހޭ 50 މިލިއަން ޑޮލަރުގެ ޓީ-ބިލް ދައްކާފައިވަނީ ބޭންކް އޮފް މޯލްޑިވްސް (ބީއެމްއެލް) ގައި ހުރި އާންމުންގެ ޑިޕޮސިޓް ފައިސާއިން ކަމަށް ބުނެ ފަތުރަމުންދާ ވާހަކަތައް މިނިސްޓްރީ އޮފް ފައިނޭންސުން ދޮގުކޮށްފިއެވެ.

މާލީ ވުޒާރާއިން ނެރުނު ބަޔާނެއްގައި ވިދާޅުވީ، ބީއެމްއެލްގައި ހުރި އާންމު ރައްޔިތުންގެ ޑިޕޮސިޓް ފައިސާ ބޭނުންކޮށްގެން މި ޓީ-ބިލް ދެއްކި ކަމަށް ބުނެ ދެކެވޭ ވާހަކަތަކަކީ އެއްވެސް އަސްލެއް ނެތް، ހަގީގަތާ ޚިލާފު ވާހަކަތަކެއް ކަމަށެވެ.

މާލީ ވުޒާރާއިން ބުނެފައިވަނީ އެސްބީއައި މެދުވެރިކޮށް 2019 ވަނަ އަހަރު ނަގާފައިވާ 50 މިލިއަން ޑޮލަރުގެ މި ޓީ-ބިލް އަނބުރާ ދައްކާފައިވަނީ ދުރާލާ އެކަމަށް ފުރިހަމައަށް ތައްޔާރުވެގެން ކަމަށެވެ. އަދި މި ފައިސާ ދައްކާފައިވަނީ ސޮވްރިން ޑިވެލޮޕްމަންޓް ފަންޑު (އެސްޑީއެފް) އަށް ޖަމާކުރަމުންދާ ފައިސާ ބޭނުންކޮށްގެން ކަމަށްވެސް ފިނޭންސް މިނިސްޓްރީން ވަނީ ސާފުކޮށްދެއްވާފައެވެ.

މި ޓީ-ބިލަކީ 17 ސެޕްޓެމްބަރު 2026 ގައި މުއްދަތު ހަމަވާ ގޮތަށް އޮތް ބިލެކެވެ. މި ބިލް ކަނޑައެޅިފައިވާ ތާރީޚަށް ދައްކައި ޚަލާސްކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މިއަހަރުގެ މެއި މަހުގެ 11 ވަނަ ދުވަހު ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އިޢުލާން ކުރައްވާފައެވެ.

ސަރުކާރުން އަބަދުވެސް މަސައްކަތް ކުރަމުންދަނީ ދައުލަތުގެ މާލީ ޒިންމާތައް ފުރިހަމައަށް އަދާކޮށް، ގައުމުގެ އިގްތިސާދީ އަދި މާލީ ރައްކާތެރިކަން ކަށަވަރުކުރުމަށް ކަމަށް މާލީ ވުޒާރާގެ ބަޔާނުގައި ވަނީ ފާހަގަކޮށްފައެވެ.

ބީއެމްއެލުންވެސް މިރޭ ވަނީ އެ ބޭންކްގެ ފައިސާއިން ޓީބިލް ދެއްކިކަމަށް ފަތުރަމުންދާ ވާހަކަތަކުގައި އަސްލެއްނެތްކަމަށް ބުނެފައެވެ.