ބޭރުގެ ވިޔަފާއިވެރިން ވިޔަފާރިތައް އަމިއްލަކުރުމުގައި އެއްވެސް ހުރަހެއް ނެތް - ރައީސް ޞާލިޙް

ބޭރުގެ ވިޔަފާރިވެރިން ރާއްޖޭގައި އިންވެސްޓްކުރުމަށާއި ވިޔަފާރި އަމިއްލަކުރުމުގައި އެއްވެސް ހުރަހެއް ނެތްކަމާއި، ބޭރުގެ ވިޔަފާރިތަކަށް ރާއްޖެވަނީ ހުޅުވާލެވި، ތައްޔާރަށްކަމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.

ރައީސުލްޖުމްޙޫރިއްޔާ މިހެން ވިދާޅުވެފައިވަނީ އިންޑިޔާގެ ބޮޑުވަޒީރު ނަރެންދުރަ މޯދީގެ ދަޢުވަތަކަށް އިންޑިޔާއަށް މިހާރު ކުރައްވަމުންގެންދަވާ ފުރާމާނަ ދަތުރުފުޅުގައި އިންޑިޔާގެ ވިޔަފާރިވެރިންނާ ބައްދަލުކުރައްވައި ދެއްކެވި ވާހަކަފުޅުގައެވެ.

މިމޭރުމުން ވާހަކަފުޅުދައްކަވަމުން ރައީސުލްޖުމްހޫރިއްޔާ ވިދާޅުވިގޮތުގައި، ރާއްޖެއިން އަންނަނީ ފަތުރުވެރިކަމާއި، އުމްރާނީ ވަޞީލަތްތަކުގެތެރޭގައި ހިމެނޭ ސަރަޙައްދީ އެއަރޕޯޓުތަކާއި ހާބަރު ފަދަ ތަންތަން ތަރައްޤީކުރުމުގައި އާ އިންވެސްޓަރުން ހޯދަމުންކަން ހާމަކުރެއްވިއެވެ. މިގޮތުން ބޭރުގެ ފަރާތްތަކަށް މިފަދަ ކަންކަމުގައި އިންވެސްޓްކުރުމަށާއި ވިޔަފާރިތައް އަމިއްލަކުރުމުގައި އެއްވެސް ހުރަހެއް ނެތްކަމުގައި ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ ބޭރުގެ ވިޔަފާރިވެރިން ރާއްޖޭގައި އިންވެސްޓްކުރުމުގައި ބޭނުންވާނެ ހުރިހާ ޤާނޫނީ ރައްކާތެރިކަމެއް ފޯރުކޮށްދިނުމަށް ތައްޔާރަށް އޮތްކަމުގައެވެ.

މިބައްދަލުކުރެއްވުމުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވަނީ ރާއްޖޭގައި މިހާރު ހުރި ވިޔަފާރީގެ ފުރުޞަތުތަކާބެހޭ މަޢުލޫމާތު އިންޑިޔާގެ ވިޔަފާރިވެރިންނާ ޙިއްޞާކުރައްވާފައެވެ.

އިންޑިޔާގެ ވިޔަފާރިވެރިންނާ ބައްދަލުކުރެއްވުމުގެ ކުރިން ރައީސުލްޖުމްހޫރިއްޔާ ވަނީ އިންޑިޔާގެ ބައެއް ވިޔަފާރި ކުންފުނިތަކުގެ ސީ.އީ.އޯއިންނާ ވަކިން ބައްދަލުކުރައްވައި މަޝްވަރާ ކުރައްވައިފައެވެ.