އިސްރާއީލުން ނަތަންޔާހޫ އާއި ދެކޮޅަށް ތެދުވެ، ސަރުކާރު ބަދަލު ކުރަން ގޮވާލައިފި

އިސްރާއީލުގެ އަނިޔާވެރި ބޮޑުވަޒީރު ބެންޖަމިން ނަތަންޔާހޫގެ ސަރުކާރާ ދެކޮޅަށް މުޒާހަރާކޮށް، ގައުމުގެ ސަލާމަތާ ބެހޭ ގޮތުން ގޯސްކޮށް އަމަލުކުރާ ކަމަށް އިސްރާއީލުގެ ރައްޔިތުން ތުހުމަތުކޮށްފިއެވެ. މި މުޒާހަރާގައި އާ އިންތިޚާބެއް ބޭއްވުމަށް ވެސް ވަނީ ގޮވާލާފައެވެ.

މީގެ ކުރިންވެސް ނަތަންޔާހޫ އާއި ދެކޮޅަށް މުޒާހަރާ ކުރި ނަމަވެސް އެ މުޒާހަރާތައް ހުއްޓުނީ އޮކްޓޫބަރު 7 ގައި އިސްރާއީލުން ޣައްޒާއަށް ދޭންފެށި ލާއިންސާނީ ހަމަލާތަކުގެ ސަބަބުންނެވެ. އެހެންނަމަވެސް އިސްރާއީލުން ޣައްޒާގައި ހިންގަމުންދާ ލޭއޮހޮރުވުމަށް ގާތްގަނޑަކަށް ހަތަރުމަސް ވެފައިވާއިރު މިކަމާއި ގުޅިގެން ގިނަ ބަޔަކު ވަނީ އިސްރާއިލުގެ ސަރުކާރާއި ދެކޮޅަށް ނުކުމެފައެވެ.

ދާދި ފަހުން ހަމާސް ބަލިކުރުމަކީ ޙަޤީޤަތާއި ޚިލާފު ކަމެއް ކަމަށް އިސްރާއީލުގެ ކެބިނެޓް މިނިސްޓަރު ބުނުމާއި ގުޅިގެން އިސްރާއީލުގެ ސަރުކާރުގެ ތެރޭގައި ވެސް ވަނީ ބައިބައިވުން އުފެދެން ފަށާފައެވެ.

ނިރުބަވެރި އިސްރާއީލުން ފަލަސްތީންގެ ޣައްޒާއަށް ލާއިންސާނީ އެތައް ހަމަލާއެއް ދެމުން އަންނަ ވަގުތެއްގައި އިސްރާއީލުގެ ސަރުކާރުގެ ތެރޭގައި ބައިބައިވުންތައް އުފެދެމުން އަންނަނީ ކެބިނެޓް މިނިސްޓަރެއް ކަމަށްވާ ގާޑީ އައިސެންކޮޓް، ހަމާސް ބަލިކުރުމުގެ އެއްވެސް މަގްސަދެއް ނެތްކަމަށް ލަފާދީ،  ވީހާވެސް އަވަހަށް އިންތިޚާބު ބޭއްވުމަށް ގޮވާލުމުންނެވެ.

މީގެ އިތުރުންވެސް އޭނާ ބުނީ ޣައްޒާގެ ބޮޑު ބައެއް ހަލާކުވެފައިވާކަމަށް ބުނާ ބުނުމަކީ ހަގީގަތެއް ކަަމަށާއި ދޮގު ހެދުން ހުއްޓާލަން ޖެހޭ ކަމަށެވެ.

އައިސަންކޮޓް މިހެން ވިދާޅުވީ އިސްރާއީލުގެ ހައްދުފަހަނަ އަޅާފައިވާ ބޮޑުވަޒީރު ބެންޖަމިން ނަތަންޔާހޫ ހަމާސްގެ މައްޗަށް "ފުރިހަމަ ކާމިޔާބީ" ހޯދަންދެން ހަނގުރާމަ ކުރިއަށް ގެންދާނެ ކަމަށް ބުނެފައި ވަނިކޮށެވެ. މީގެ އިތުރުންވެސް އިސްރާއީލުގެ ސިފައިންތަކެއް ޣައްޒާ ގެ ބައެއް ހަލާކު ކޮށްލުމަށް ފަހު އެނބުރި އައި ވާހަކަ ދޮގު ކުރަމުން ބުނީ ހަމާސް ގެ މީހުން ތިބި ތަން ހަލާކުކޮށްނުލެވޭ ކަމަށާއި ސްޓްރެޓެޖިކް ކާމިޔާބީއެއް ނުލިބުނު ކަމަށެވެ.

މި ވާހަކަތަކަކީ އިސްރާއީލުގެ ސަރުކާރުގެ ކޯލިޝަން ތެރެ "ފަޅައިގެން" ދިއުމުގެ އެންމެ ފަހުގެ އަލާމާތްތަކުގެ އިތުރުން ނަތަންޔާހޫގެ ހަނގުރާމައިގެ ރޭވުންތަކާ މެދު އެގައުމުގެ ހިތްހަމަނުޖެހުން އިތުރުވަމުންދާ އަލާމާތެއް ކަމަށް ބޭރުގެ ނޫސްތަކުން އަންނަނީ ރިޕޯޓް ކުރަމުންނެވެ. މިދިޔަ އަހަރުގެ އޮކްޓޫބަރު މަހު ގެ 7 ވަނަ ދުވަހު ހަމަލާތައް ދޭން ފެށިތާ މާގިނަ ދުވަހެއް ނުވަނީސް ސަރުކާރުގެ ތެރޭގައި ދެބަސްވުންތައް ވަނީ އުފެދިފައެވެ.

އައިސަންކޮޓް ދެއްވި އިންޓަވިއުގައި އިތުރަށް ބުނީ އިސްރާއީލަށް އާ އިންތިހާބެއް ބޭނުންވާކަމަށާއި ނަތަންޔާހޫގެ ލީޑަޝިޕަށް އާންމުންގެ އިތުބާރު މިހާރު ނެތްކަމަށެވެ.

ޣައްޒާއާ ދެކޮޅަށް ކުރަމުންދާ ހަނގުރާމައަށް ގާތްގަނޑަކަށް ހަތަރު މަސް ވެފައިވާއިރު، މި ހަމަނުޖެހުމަށް އަލި މަގެއް އަދި ފެންނާކަށް ނެތެވެ. މިހަމަލާތަކުގައި ޣައްޒާގައި 25,700  މީހުން ޝަހީދުވެފައިވާއިރު، 63,740 މީހުން ޝަހީދުވެ އެ ސަރަހައްދު ވަނީ ފަޅުވެފަ އެވެ.