އުއްމީދަކީ އާ މެމްބަރުންނާއެކު ލާމަރުކަޒީ ނިޒާމް ހަރުދަނާކުރުމުގެ އާ ބާބެއް ފެށިގެންދިއުން: އާދަން ޝަރީފް

އުއްމީދަކީ އިންތިހާބުކުރެވުނު އާ ކައުންސިލަރުންނާއެކު ކުރިއަށް އޮތްތަނުގައި ލާމަރުކަޒީ ނިޒާމް ހަރުދަނާކުރުމުގެ އާ ބާބެއް ފެށިގެންދިއުންކަމަށް ކުރީގެ ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ދެއްވައިފިއެވެ.

ސިޓީތަކާ ބެހޭ ވުޒާރާއިން އިސްތިއުފާދެއްވުމަށްފަހު ފުރަތަމަ ފަހަރަށް އެކްސްގައި ކުރެއްވި ޕޯސްޓްގައި އާދަން ޝަރީފް ވިދާޅުވީ،  ރާއްޖޭގެ ލާމަރުކަޒީ ނިޒާމު ހަރުދަނާ ކުރެވޭނީ ޙަޤީޤީ މާނައިގައި ކައުންސިލްތައް ބާރުވެރި ކުރުވިގެން ކަމަށާއި، އެކަމަށް ކައުންސިލްތަކާއި ސަރުކާރާއި ރައްޔިތުން ގުޅިގެން މަސައްކަތް ކުރެވިގެން ކަމަށެވެ.

ރައްޔިތުންނާ ގުޅޭ ކަންކަމުގައި ދައުލަތުގެ ކޮންމެ މުއައްސަސާއަކުން ފުރަތަމަ ޓަކިޖަހާ ދޮރަކީ ކައުންސިލްތަކަށް ވެގެން. އަދި ސަރުކާރުގެ ޚިދުމަތްތައް ރައްޔިތުންނަށް ފޯރުކޮށްދިނުމުގެ މެދުވެރިއަކަށް ކައުންސިލްތައް ހެދިގެން

އާދަން ޝަރީފް

އޭނާ ވިދާޅުވީ ކައުންސިލްތަކަށް ހިންދެމިލެވި، އަދި އަމިއްލަ ފައިމައްޗަށް ތެދުވެވޭނީ މާލީ ފުދުންތެރިކަން ކައުންސިލްތަކަށް ލިބިގެންކަމަށެވެ. ރައްޔިތުންނާ ގުޅޭ ކަންކަމުގައި ދައުލަތުގެ ކޮންމެ މުއައްސަސާއަކުން ފުރަތަމަ ޓަކިޖަހާ ދޮރަކީ ކައުންސިލްތަކަށް ވެގެންނެވެ.

އާދަން ޝަރީފް ވިދާޅުވީ އަލަށް ހުވާކުރާ ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކާއި ސަރުކާރާ ގުޅިގެން، ލާމަރުކަޒީ ނިޒާމު ހަރުދަނާ ކުރުމުގެ އައު ބާބެއް ރައީސް ޑރ. މުޙައްމަދު މުޢިއްޒުގެ ޒަޢާމަތުގައި ފެށިގެންދަވާނެކަމަށް އުންމީދު ކުރައްވާކަމަށެވެ.

އެކްސްގައި ކުރެއްވި މި ޕޯސްޓްގައި އާދަން ޝަރީފް ވަނީ ކުރިއަށްއޮތްތަނުގައިވެސް ދިވެހި ޤައުމަށް އިޚުލާޞްތެރިކަމާއެކު ޚިދުމަތް ކުރުމުގައި ދެމިހުންނާނެކަމުގެ ޔަޤީންކަން ދެއްވާކަމަށް ވިދާޅުވެފައެވެ. އެންމެފަހުން ރައީސް ޑރ.މުހައްމަދު މުއިއްޒުގެ ކެބިނެޓަށް ގެނައި ބަދަލުގައި އަތޮޅު ކައުންސިލުތަކާއި އަދި ސިޓީތަކާއި ބެހޭ ވުޒާރާގެ އިތުރުން ލޯކަލް ގަވަރމަންޓް އެންޑް ޕަބްލިކް ވޯކްސް ވަނީ އުވާލާފައެވެ.