ނަޝީދު ރާއްޖެ އިން ބޭރަށް ދިރިއުޅުން ބަދަލުކުރެއްވީ މަޖިލީހަށް ވަކި އެއްޗެއް ނާންގަވާ!

ރައްޔިތުންގެ މަޖިލީހުގައި މައްޗަންގޮޅި މެދު ދާއިރާ ތަމްސީލްކުރައްވާ، ރައްޔިތުންގެ މަޖިލީހުގެ ކުރީގެ ރައީސް މުހައްމަދު ނަޝީދު ރާއްޖެއިން ބޭރަށް ދިރިއުޅުން ބަދަލުކުރެއްވީ މަޖިލީހުގައި އަދާކުރައްވާ ޒިންމާއާ ގުޅޭ ގޮތުން މަޖިލީހަށް ވަކި އެއްޗެއް ނާންގަވާ ކަމަށް އެ އިދާރާ އިން މިއަދު ބުނެފި އެވެ.

މަޖިލީހުގެ ރައީސްގެ މަގާމުގައި ހުންނެވުމަށްފަހު، އެމްޑީޕީން ނަޝީދުގެ އިތުބާރު ނެތް ކަމުގެ މައްސަލައެއް މަޖިލީހަށް ހުށަހެޅުމުން، އެ މަގާމުން އެމަނިކުފާނު ވަނީ އިސްތިއުފާ ދެއްވާފައެވެ.

އެއަށްފަހު އެމަނިކުފާނު މަޖިލީހުގެ ހާޒިރީ ނުހަނު ދަށުގައި އޮތް އިރު، ސިޔާސީ ކަންކަމާއި ދުރަށް ވަޑައިގެންނެވިކަން އިއުލާން ކުރެއްވުމަށްފަހު ދާދިފަހުން ފަހުން އެމަނިކުފާނު ވަނީ ވަނީ ދިރިއުޅުން ގާނާއަށް ބަދަލުކުރައްވައިފަ އެވެ. އެމަނިކުފާނު ގާނާ އަށް ވަޑައިގަތީ ކްލައިމެޓް ވަލްނަރަބަލް ފޯރަމް (ސީވީއެފް) ގެ ސެކްރެޓަރީ ޖެނެރަލްގެ މަގާމާ ހަވާލުވެވަޑައިގަތުމަށެވެ.

މަޖިލިސް ޗުއްޓީގައިވާ މި ދަނޑިވަޅުގައި ގާނާއަށް ދިރިއުޅުން ބައްދަލު ކުރެއްވި ނަމަވެސް، އެކަމާއި ގުޅިގެން އެއްވެސް މަޢުލޫމާތެއް މަޖިލީހަށް ދެއްވާފައި ނުވާ ކަމަށް މަޖިލީހުގެ ކޮމިއުނިކޭޝަން ޑިރެކްޓަރު ހަސަން ޒިޔާއު "ވޮއިސް" އަށް ވަނީ މައުލޫމާތު ދެއްވާފައެވެ.

އެގޮތުން، 19 ވަނަ މަޖިލީހުގެ ފަހު ދައުރު ފެބްރުއަރީގައި ފެށޭއިރު، ދައުރުގެ ބާކީ އޮތް ތިން މަސް ދުވަސްތަކަށް ޗުއްޓީ ނުވަތަ ސަލާމްވެސް އެމާނިކުފާނު އަދި ނަންގަވާފައި ނުވާ ކަމަށް ޒިޔާޢު ވިދާޅުވި އެވެ.

ރާއްޖޭގެ ރައީސްކަން ވެސް ކުރެއްވި ނަޝީދު ރާއްޖެ އިން ވަޑައިގަތްއިރު، މަޖިލީހުގެ މެމްބަރެއްގެ ހައިސިއްޔަތުން ދާއިރާ ތަމްސީލް ކުރައްވަން އަދި ތިން މަސް އެބައޮތެވެ.

ރައީސް ނަޝީދު ވިދާޅުވެފައިވާ ގޮތުގައި އެމާނިކުފާނު ދިރިއުޅުން ބަދަލު ކުރައްވާފައި ވަނީ ގާނާގެ ސިޓީއެއް ކަމަށްވާ އަކްރާ އަށެވެ. އަދި ކުރިއަށް ގާތްގަނޑަކަށް 3 އަހަރު ހުންނަވާނީ އެތަނުގައެވެ.

އެހެން ނަމަވެސް، މަޖިލީހުގެ ދައުރުގެ ބާކީ އޮތް ދުވަސް ތަކުގައި މަޖިލިސް މެންބަރެއްގެ ގޮތުގައި، ހުންނަވާ ނަމަ މަޖިލިސް މެމްބަރެއްގެ މުސާރަ އާއި އިނާޔަތްތައް އެމަނިކުފާނަށް ލިބިވަޑައިގަންނަވާނެ އެވެ.

ނަޝީދަކީ ރާއްޖޭގެ ރައީސްކަން ކުރެއްވި ބޭފުޅަކަށް ވާތީ ގާނޫނުން ކަނޑައަޅާފައި އޮތް އެ އިނާޔަތް ވެސް އެ މަނިކުފާނަށް ލިބިވަޑައިގަންނަވާނެ އެވެ.

ނަޝީދު ސިޔާސީ ކަންކަމުން ދުރަށް ވަޑައިގަތުމަށް ފަހު، މީގެ ކުރިން ދުވަސްކޮޅަކަށް އިނގިރޭސި ވިލާތާއި ސްރީ ލަންކާގައި ވެސް އުޅުއްވިއެވެ.