މޮރީނިއޯ ކޯޗް ކަމުން ވަކިކުރުމުން ޔުނައިޓެޑް ކުޅުންތެރިންގެ ފިޔަ ފަޅައިފި

މެންޗެސްޓާ ޔުނައިޓެޑުގެ ކޯޗްކަމުން މޮރީނިއޯ ވަކިކުރުމަށްފަހު ކެއަރ ޓޭކަރއެއްގެ ގޮތުގައި ހަމަޖެއްސި ޔުނައިޓެޑުގެ ލެޖެންޑް ސޯލްޝާގެ އިރުޝާދުގެ ދަށުން ޕްރިމިއާ ލީގުގައި ކުޅުނު ފުރަތަމަ މެޗު 5-1 ގެ ބޮޑު ނަތީޖާއަކުން އެޓީމް މޮޅުވެއްޖެއެވެ.

މުޅިންވެސް އެޓޭކިން ފުޓްބޯޅައެއް ޔުނައިޓެޑުގެ ފަރާތުން ފެނުނު މި މެޗުގައި އެޓީމުގެ ފުރަތަމަ ލަނޑު ޖަހައިދިނީ ތިންވަނަ މިނެޓުގައި ލިބުނު ހިލޭ ޖެހުމަކުން ރަޝްފޯޑެވެ. ޔުނައިޓެޑުގެ ދެވަނަ ލަނޑަކީ ޕޮގްބާ ދިން ޕާހަކުން ޕެނަލްޓީ އޭރިއާ ބޭރުން ހެރޭރާ ވަރަށް ބާރަށް ފޮނުވާލީ ބޯޅައަކުން ކާމިޔާބު ކުރި ލަނޑެކެވެ.

ލިބުނު ޕެނަލްޓީއަކުން ކާޑިފްގެ ހަމައެކަނި ލަނޑު ކަމަރާސާ ޖަހައިދިންއިރު އޭގެ ކުޑަވަގުތު ކޮޅެއްފަހުން ޔުނައިޓެޑުގެ މާޝިއަލްވަނީ ލަނޑެއް ޖަހައި އެޓީމުގެ ލީޑް އަނެއްކާވެސް ދެ ލަނޑަށް ފުޅާ ކޮށްދީފައެވެ.

ފަހު ހާފުގައި ޔުނައިޓެޑުގެ ދެ ލަނޑު ފެނިގެން ދިޔައިރު އެ ދެ ލަނޑުވެސް ކާމިޔާބުކޮށްދިނީ ޖެސީ ލިންގާޑެވެ. އޭގެން އެއްލަނޑަކީ ލިބުނު ޕެނަލްޓީއަކުން ލިންގާޑް ޖެހި ލަނޑެކެވެ.

މި މެޗަކީ ސަރ އެލެކްސް ފާގަސަންގެ ވަދާއީ މެޗުގައި 2013 ވަނަ އަހަރު ވެސްޓް ބްރޮމްއައި ދެކޮޅަށް ޔުނައިޓެޑް ފަސް ލަނޑު ޖެހިފަހުން ލީގުގައި އެޓީމް ފަސް ލަނޑު ޖެހި ފުރަތަމަ ފަހަރެވެ.

މެޗަށްފަހު ވާހަކަ ދައްކަމުން ޝޯލްޝާ ބުނީ ރަނގަޅު ކުޅުންތެރިން ތިބިއްޔާ ފުޓްބޯޅައަކީ ކުޅެން ވަރަށް ފަސޭހަ އެއްޗެއްކަމަށެވެ. އޭނާ ޔުނައިޓެޑުގެ ޓީމައި ހަވާލުވާން އައީ ބުދަ ދުވަހުގެ ރޭގަނޑު ކަމަށައި އެހެންކަމުން މެޗުގެ ކުރިން ކުޅުންތެރިންނާއެކު ވަގުތު ހޭދަކޮށްލުމަށް ލިބުނީ ހަމައެކަނި ބުރާސްފަތި އަދި ހުކުރު ދުވަސް ކަމުގައި ކަމަށްވެސް ޝޯލްޝާ ބުންޏެވެ.

ޔުނައިޓެޑް މެޗުން މޮޅުވުމުގެ އެންމެ ބޮޑު ދައުރެއް އަދާކޮށްފައިވަނީ އެޓީމުގެ ކޫރީގެ ކުޅުންތެރިޔާ ވޭން ރޫނީ ކަމުގައި ކަމަށްވެސް ޝޯލްޝާ ބުނެފައިވެއެވެ. ޓީމައި ހަވާލުވުމުން ރޫނީ އޭނާއަށް މެސެޖެއް ކުރި ކަމަށައި އެ މެސެޖުގައި އޮތީ ކުޅުންތެރިން ލައްވާ ރީތި ފުޓްބޯޅައެއް ކުޅުވުމަށައި ޔުނައިޓެޑް ޔުނައިޓެޑުގެ ގޮތުގައި ދައްކާލުމަށް ސަމާލުކަން ދިނުމަށް ކަމުގައި ޝޯލްޝާ ބުންޏެވެ.

މި މޮޅާއެކު ޔުނައިޓެޑް އޮތީ 29 ޕޮއިންޓާއެކު ތާވަލުގެ ހަ ވަނައިގައެވެ. ކުރިއަށް އޮތް މެޗުގައި ޔުނައިޓެޑް ބައްދަލު ކުރަން ހަމަޖެހިފައިވަނީ ލީގުގައި ހަޑަސްފީލްޑާއެވެ.

ޕްރިމިއާ ލީގުގައި ކުޅުނު އެހެން މެޗުތަކުގެ ނަތީޖާތަކަށް ބަލާލާއިރު ބްރައިޓަން އަތުން ބޯންމައުތް މޮޅުވީ 2-0 ކުންނެވެ. 3-1 ކުން ސައުތްހެމްޕްޓަން ހަޑަސްފީލްޑް ބަލިކުރިއިރު ވޮޓްފޯޑްވަނީ 2-0 ވެސްޓް ހަމް މައްޗަށް ކުރި ހޯދާފައެވެ.

ރޭ އަމިއްލަ ދަނޑުގައި ކްރިސްޓަލް ޕެލަސްއައި ދެކޮޅަށް ކުޅުނު މެޗުން 3-2 ކުން ބަލިވުމުން މެންޗެސްޓާ ސިޓީ އެއްވަނައަށް އަރަށް ލިބުނު ފުރުސަތުވަނީ ގެއްލިފައެވެ. ސިޓީ ބަލިވުމާއެކީ ލިވަޕޫލް އެއްވަނައިގަ އޮތީ ހަތަރު ޕޮއިންޓުގެ ލީޑަކާއެކުއެވެ.

ސިޓީގެ އިތުރުން ރޭ ޗެލްސީވެސްވަނީ ކުޅުނު މެޗުން ބަލިވެފައެވެ. ޗެލްސީ ބަލިވީ ލެސްޓާ ސިޓީ އަތުން 1-0 ގެ ހަނި ނަތީޖާއަކުންނެވެ. އާސެނަލް އަދި ބާންލީ ބައްދަލުކުރި މެޗު 3-1 ކުން ކާމިޔާބުކުރީ އާސެނަލްއެވެ.