ކެބިނެޓަށް ވޯޓްނުދެނީ ރާއްޖޭގައި އިންޑިއާގެ ބޮޑުވަޒީރު ދިފާއުކުރަން

އިންޑިއާގެ މަޝްހޫރު ނޫހެއްކަމުގައިވާ އިންޑިއާ ޓުޑޭގައި މި ޖެނުއަރީމަހުގެ ކުރީކޮޅު ޝާއިކުރި ޚަބަރެއްގައި ވެއެވެ. އިންޑިއާ އާއި ދިވެހިރާއްޖެއާއި ދެމެދު އުފެދިގެން އުޅޭ މައްސަލައިގައި ރާއްޖޭގެ އިދިކޮޅު ޕާޓީތަކުން ބޮޑުވަޒީރު ނަރެންދުރަ މޯދީގެ ދިފާއުގައި ތެދުވެ ރައީސް ޑޮކްޓަރ މުޙައްމަދު މުއިއްޒުގ އިސްތިއުފާއަށް ގޮވައިފިއެވެ.

އެހެން ނޫހެއްކަމުގައިވާ ދަހިންދޫގައި މި މަހުގެ 25 ވަނަ ދުވަހު ޝާއިރުކުރި ރިޕޯޓެއްގައި ވެއެވެ. ރައްޔިތުންގެ މަޖިލީހުގެ 55 ގޮޑީގެ ބާރު އޮތް ރާއްޖޭގެ މައި އިދިކޮޅު ދެޕާޓީއެއް ގުޅިގެން، ދިވެހި ސަރުކާރުން އިންޑިއާގެ މައްސަލާގައި ގެންގުޅޭ ސިޔާސަތަށް ފާޑުކިޔައި އިންޑިއާއަކީ ދިވެހިރާއްޖޭގެ އެންމެ ދުވަސްވީ އެންމެ ގާތްބައިވެރިޔާކަން އިއުލާންކޮށްފިއެވެ.

މިންޓް ކިޔާ ނޫހެއްގައި މިމަހުގެ 25 ވަނަ ދުވަހު ލިޔެފައިވަނީ އިންޑިއާގެ މައްސަލާގައި އިދިކޮޅު ދެޕާޓީ ގުޅިގެން ދިވެހިރާއްޖޭގެ ރައީސް މުޙައްމަދު މުއިއްޒުގެ ސަރުކާރާ ދެކޮޅަށް އަޑު އުފުލައިފިއެވެ. ވިއޮންގައި ލިޔެފައި އޮތީ އިންޑިއާގެ މައްސަލާގައި މުއިއްޒު ސަރުކާރު އޮތީ އަލިފާނުގެ ތެރޭގައި ކަމަށެވެ. އިދިކޮޅު އެމްޑީޕީއާއި ޑިމޮކްރެޓްސް ގުޅިގެން އިންޑިއާ ހިމާޔަތްކުރަން ނުކުމެއްޖެއެވެ.

އިންޑިއާގެ ނޫސްތަކުން ބުނާގޮތުގައި ރައްޔިތުންގެ މަޖިލީހުގައި އަޣްލަބިއްޔަތު އޮތް އެމްޑީޕީއާއި ޑިމޮކްރެޓްސް އެއްގަލަކަށް އަރައިގެން އުޅެނީ އިންޑިއާގެ މަސްލަހަތު ހިމާޔަތް ކުރުމަށެވެ.

މިއަދު ރައްޔިތުންގެ މަޖިލީހުގައި ރައީސް މުއިއްޒުގެ ސަރުކާރުގެ ކެބިނެޓް ވަޒީރުންނަށް ރުހުން ދިނުމާއިވެސް މިދެ ޕާޓީން ގުޅުވައިފައިވަނީ ސަރުކާރުން އިންޑިއާއާމެދު ގެންގުޅޭ ސިޔާސަތު އެންމެ ބޮޑު އެއް ސަބަބަކަށް ހަދައިގެންނެވެ.

އިންޑިއާ ސަރުކާރާއި ދިވެހި ސަރުކާރާ ދެމެދު މައްސަލައެއް އުފެދިގެން އުޅެނީ ރާއްޖޭގައި ތިބި އިންޑިއާ ސިފައިން އަނބުރައި ދިވެހިރާއްޖެއިން ގެންދިއުމަށް ދިވެހި ސަރުކާރުން އެދިގެން އިންޑިއާ ސަރުކާރުން އެކަން ނުކުރާން ދައްކާ ބަހަނާތަކާހެދިއެވެ. ދިވެހިރާއްޖޭގައި އިންޑިއާ ސިފައިން ނުބައިތިއްބާނަމަ ސަރުކާރުގެ މައްޗަށް އިތުބާރު ނެތްކަމުގެ ވޯޓް ނެގުމަކީ ނުވަތަ ކެބިނެޓް ވަޒީރުންނަށް ރުހުން ނުދިނުމަކީ ވަރަށް ދެރަވަރު އަދި ހިތާމަ ހުރި ކަމެކެވެ. އިންޑިއާ ޓުޑޭގައި ބުނެފައިވާ ގޮތަށް އިންޑިއާގެ ބޮޑުވަޒީރުގެ ހައްގުގައި އޭނާ ހިމާޔަތްކުރަން ދިވެހިރާއްޖޭގެ ގާނޫން ޖަދާ މަޖިލީހުގެ މެންބަރުން ނުވަތަ ރާއްޖޭގެ ސިޔާސީ ޕާޓީއެއް މިފަދައަކުން ތެދުވެދާނެ ކަމަށް ހީކުރެވިފައެއް ނެތެވެ. އެހެންނަމަވެސް މިއަދު އަޅުގަނޑު މެންނަށް މިއޮތީ މިހަގީގަތް ކުރިމަތި ވެފައެވެ.

ކެބިނެޓަށް ވޯޓް ނުދިނުމަކީ އެއްގޮތަކުން ބުނާނަމަ ސަރުކާރަށް ޖެއްސުން ކުރުމެވެ. ރައީސް މުހައްމަދު ނަޝީދުގެ ވެރިކަމުގައި ސަރުކާރު ހިންގަން ދަތިކުރަން އުޅުނު ކަމަށް ތުހުމަތުކޮށް ޖުމްހޫރީ ޕާޓީގެ ލީޑަރ ޤާސިމް އިބްރާއާއި ޑީއާޜްޕީގެ ލީޑަރެއްކަމުގައިވާ އަބްދުﷲ ޔާމީން ހައްޔަރުކޮށްގެން ސިފައިންގެ ބަންދުގައި ބޭތިއްބިއެވެ. މިއަދު ބޭރު ގައުމެއްގެ ހައްގުގައި ސަރުކާރަށް ޖެއްސުން ކުރަން މިނުކުތީ ސީދާ އެމްޑީޕީއެވެ. މަންޒަރު މުޅިން އެކޮޅު ކޮޅުން ޖެހިގެންނެވެ. މިވެސް ތާރީޚުން ދުވަހެކެވެ.