ދެ ވަޒީރުން ތުރުކީގެ ވިޔަފާރިވެރިންނާއި ބައްދަލު ކުރައްވައިފި

ހާރިޖީ ވަޒީރު ޑރ. އަބްދުﷲ ހަލީލް އާއި އިގްތިސާދީ ކުރިއެރުވުން އަދި ވިޔަފާރި އާ ބެހޭ ވަޒީރު، މުހައްމަދު ސައީދު ތުރުކީގެ ވިޔަފާރިވެރިންނާ އިސްތަންބުލްގައި މިއަދު ބައްދަލު ކުރައްވައިފި އެވެ.

މިއީ ތުރުކީގެ ފޮރިން އިކޮނޮމިކް ރިލޭޝަންސް ބޯޑް (ޑީއީއައިކޭ) އިން އިންތިޒާމް ކުރި ބައްދަލުވުމެކެވެ.

ޑީއީއައިކޭގެ ޗެއާމަން އަދި ތުރުކީ-އޭޝިއާ ޕެސިފިކް ބިޒްނަސް ކައުންސިލްގެ ރައީސް، ނާއިލް އޮލްޕަކްގެ އިސްވެހުންނަވައި ކުރިއަށް ގެންދެއްވި މި ބައްދަލުވުމުގައި ތުރުކީގެ ފާހަގަކޮށްލެވޭ އެކިދާއިރާތަކުގެ ވިޔަފާރިވެރިން ބައިވެރިވެވަޑައިގަތް ކަމަށާ މި ބައްދަލުވުމުގައި ފަތުރުވެރިކަން، އިއާދަކުރަނިވި ހަކަތަ، އިންވެސްޓްމަންޓް، ދަނޑުވެރިކަމާއި ގެދޮރުވެރިކަމާއި ރިއަލް އެސްޓޭޓް، ވިޔަފާރި ބަނދަރު ތަރައްގީ ކުރުމާއި ޓެކްނޮލޯޖީގެ ދާއިރާ ހިމެނޭނެހެން ރާއްޖެ އާއި ތުރުކީ އާ ދެމެދު އިގްތިޞާދީ ގުޅުން  ބަދަހިކުރުމަށާއި ދެ ގައުމުގެ ދެމެދުގައި ވިޔަފާރީގެ ދާއިރާ އިން އައު ގުޅުންތައް ގާއިމުކުރުމަށް މަޝްވަރާ ކުރެއްވި ކަމަށް ސަރުކާރުން ބުނެ އެވެ.

މި ބައްދަލުވުމުގެ ބައިވެރިންނާ ވާހަކަ ދައްކަވަމުން، ވަޒީރު ސައީދު ވަނީ ދެ ގައުމުގެ ދެމެދުގައި ނޮވެންބަރު 2023 ގައި ސޮއިކުރެވިފައިވާ "އިކޮނޮމިކް ކޯޕަރޭޝަން" އެއްބަސްވުމާއި މިދިޔަ އަހަރުގެ ނޮވެންބަރު މަހުގައި ސޮއިކުރެވިފައިވާ "ޕްރިފަރެންޝަލް ޓްރޭޑް" އެއްބަސްވުމަކީ ދެ ގައުމުގެ އިގްތިސާދީ އަދި ވިޔަފާރީގެ ގުޅުން ކުރިއަރަމުން އަންނަކަމުގެ ހެކިތަކެއް ކަމަށާއި ކުރިއަށް އޮތް އަހަރުތަކުގައިވެސް މި ގުޅުން އިތުރަށް ބަދަހި ކުރެއްވުމަށް މަސައްކަތް ކުރައްވާނެކަމުގެ ޔަގީންކަން ދެއްވާފަ އެވެ.