ޕްރެމިއާ ލީގުގައި އާސެނަލްއަށް ޚާއްސަ ރެކޯޑެއް

އިގިރޭސި ޕްރެމިއާ ލީގުގެ ތާރީޚްގައި ރަށުން ބޭރުގައި ޖެހިޖެހިގެން ތިން މެޗުގައި ފަސް ލަނޑު ނުވަތަ އެއްވުރެ ގިނަ ލަނޑު ކާމިޔާބުކުރި ފުރަތަމަ ޓީމުގެ ޝަރަފް އާސެނަލުން ހޯދައިފިއެވެ.

ހޯމަދުވަހުގެ ރޭ ރަށުން ބޭރުގައި ޝެފީލްޑް ޔުނައިޓެޑާއި ދެކޮޅަށް ކުޅުނު މެޗު 6-0 ގެ ނަތީޖާއަކުން އާސެނަލް ކާމިޔާބުކުރިއިރު، ފެބުރުއަރީ މަހުގެ 11 ވަނަ ދުވަހު ވެސްޓްހަމް ދަނޑުގައި އެޓީމާއި ދެކޮޅަށް ކުޅުނު މެޗު ވެސް އާސެނަލުން ކާމިޔާބުކޮށްފައި ވަނީ 6-0 ގެ ތަފާތުބޮޑު ނަތީޖާއަކުންނެވެ. އަދި ފެބުރުއަރީ މަހުގެ 17 ވަނަ ދުވަހު ރަށުން ބޭރުގައި ބާންލީ އާއި ދެކޮޅަށް ކުޅުނު މެޗު އެޓީމުން ކާމިޔާބުކުރީ 5-0 ގެ ނަތީޖާއަކުންނެވެ.

ޕްރިމިއާ ލީގުގައި ކޮންމެ ޓީމަކުން 27 މެޗު ކުޅެފައިވާއިރު އާސެނަލް މިވަގުތު އޮތީ 61 ޕޮއިތންޓާއެކު ލީގު ތާވަލްގެ ތިންވަނައިގައެވެ. ދެވަނާގައި އޮތް މެންޗެސްޓާ ސިޓީއަށް 62 ޕޮއިންޓް ލިބިފައިވާއިރު ލީގު ތާވަލުގެ އެއްވަނައިގައި މިވަގުތު އޮތީ 63 ޕޮއިންޓާއެކު ލިވިޕޫލް އެވެ.

މީގެއިތުރުން މިސީޒަނުގައި ލީގުގައި ކުޅުނު 27 މެޗުގައި އާސެނަލުން 68 ލަނޑު ކާމިޔާބުކޮށްފައިވާއިރު، ލީގުގައި އެންމެ ގިނަ ލަނޑު ކާމިޔާބުކޮށްފައިވަނީ ވެސް އާސެނަލް އިންނެވެ. އަދި މިލިސްޓުގެ ދެވަނާގައި އޮތީ 64 ލަނޑު ކާމިޔާބުކޮށްފައިވާ ލިވިޕޫލު އެވެ. އަދި ތިންވަނައަށް އެންމެ ގިނަ ލަނޑުޖެހި މެންޗެސްޓާ ސިޓީއަށް 27 މެޗުގައި ކާމިޔާބުކުރެވިފައިވަނީ 62 ލަނޑެވެ.

މީގެ އިތުރުން ލީގުގައި ކުޅުނު 27 މެޗުން އާސެނަލް ކޮޅަށް 23 ލަނޑު ވަދެފައިވާއިރު، ލީގުގައި މިހާތަަނަށް އެންމެ މަދުން ލަނޑު ވަދެފައިވަނީ ވެސް އެޓީމު ކޮޅަށެވެ. މިލިސްޓުގެ ދެވަނަ ލިބެނީ ލިވަޕޫލަށެވެ. 27 މެޗުން އެޓީމު ކޮޅަށް 25 ލަނޑު ވަދެފައިވާއިރު، ލިސްޓުގެ ތިންވަނައިގައި އޮތް މެންޗެސްޓާ ސިޓީ ކޮޅަށް 27 މެޗުގައި ވަނީ 27 ލަނޑު ވަދެފައެވެ.

ލީގުގައި އާސެނަލް އަށް ދެން އެންމެ އަވަހަށް އޮތީ މިމަހުގެ 9 ވަނަ ދުވަހުގެ ރޭ އަމިއްލަ ދަނޑުގައި ބްރެންޓްފޯޑާއި ދެކޮޅަށް ކުޅޭ މެޗެވެ. އަދި މިމަހުގެ 10 ވަނަ ދުވަހުގެ ރޭ އަމިއްލަ ދަނޑުގައި ލިވަޕޫލުން ނުކުންނާނީ އެންމެ ފަހުގެ ޗެމްޕިއަން މެންޗެސްޓާ ސިޓީ އާއި ދެކޮޅަށެވެ.