ޝަމްއާން ލޮކް ކޯޑެއް ނުދޭ، އެހެންވެ ފޯނު ނުހުޅުވޭ

އިމިގްރޭޝަންގެ ކުރީގެ ކޮންޓްރޯލާ ޖެނެރަލް މުޙައްމަދު ޝަމްޢާން ވަޙީދުގެ ފޯން ފުލުހުންގެ ބެލުމުގެ ދަށުގައި އޮތް ނަަމަވެސް އޭނާގެ ފޯނުގެ ލޮކް ކޯޑް ދީފައިނުވާ ކަމަށް ފުލުހުން ބުނެފި އެވެ.

ޝައްމާން ހައްޔަރުކޮށް އޭނާގެ ފޯނާއި ބައެއް އިލެކްޓްރޯނިކް ވަސީލަތްތައް ފުލުހުންގެ ބެލުމުގެ ދަށަށް ގެންދިޔަ އެވެ. ފަހުން އޭނާ ދޫކޮށްލި ނަމަވެސް ފޯން ހަވާލެއް ނުކުރެ އެވެ. ޝައްމާނަށް މިހާރު ވަނީ 25 އަހަރުގެ ޖަލު ހުކުމެއް އިއްވާފަ އެވެ.

އެ ހުކުމް އިއްވުމުގެ މަޖިލީހަށް ވަނުމުގެ ކުރީން އޭނާ ވަނީ ނޫސްވެރީންނާއި ބައްދަލުކޮށްފަ އެވެ. އަދި ރައީސް މުޢިއްޒާއި މިނިސްޓަރު އިހްސާނާއި އެޓާނީ ޖެނެރަލް އުޝާމަށް ބޮޑެތި ތުހުމަތުތަކެއް ކުރި އެވެ. ވިދާޅުވީ އެ ތުހުމަތުތަކަށް ބާރު ލިބޭ މައުލޫމާތު ފުލުހުން ހިފަހައްޓާފައިވާ އޭނާގެ ފޯނުގައި ހުންނާނެ ކަމަށެވެ. އެ މައުލޫމާތުތައް ބެލުމަށްވެސް އެދުނެވެ.

ފުލުހުން މިއަދު ނެރުނު ބަޔާނެއްގައި ބުނީ ޝަމްއާންއާ ގުޅޭ މުޅި ތަހުގީގުގެ މަރުހަލާގަ އާއި އޭގެ ފަހުން ހިނގި ޝަރުއީ މަރުހަލާތަކުގައިވެސް، ޝަމްއާންގެ ފޯނު ހުޅުވުމަށް ބޭނުންވާ ލޮކް ކޯޑު އޭނާ ދީފައިނުވާ ކަމަށެވެ. އެހެންކަމުން، އެ ފޯނުގައި ހުރި މައުލޫމާތުތައް ބަލައި ތަހުގީގު ކުރުމުގެ ފުރުސަތު ލިބިފައެއް ނުވާ ކަމަށެވެ.

ފުލުހުން ބުނީ އެ އިދާރާގެ ބެލުމުގެ ދަށުގައި އޮތް ޝަމްއާންގެ ފޯނުގައި ކޮރަޕްޝަނާ ގުޅޭ ހެކި ހުރި ކަމަށް މީޑިއާ މެދުވެރިކޮށް ބުނި ނަމަވެސް، ތަހުގީގުގެ އެއްވެސް މަރުހަލާއެއްގައި އަދި 2025 ޑިސެމްބަރ 25 ވަނަ ދުވަހު އޭނާ ބަންދުން ދޫކޮށްލިފަހުން މިނިވަނެއްގެ ގޮތުގައި އުޅުނުއިރުވެސް އެފަދަ އެއްވެސް މައުލޫމާތެއް ފުލުހުންނަށް ހިއްސާކޮށްފައެއް ނުވާ ކަމަށެވެ.

ކޮރަޕްޝަންގެ މައްސަލަތައް ތަހުގީގު ކުރުމުގެ ގާނޫނީ މެންޑޭޓް އޮންނަ އެހެން އެއްވެސް މުއައްސަސާއަކަށްވެސް އެފަދަ މައުލޫމާތެއް ރަސްމީކޮށް ހުށަހަޅާފައިވާކަން ފުލުހުންނަށް އެނގިފައެއް ނުވާ ކަމަށް ވެސް ފުލުހުން ވަނީ ބުނެފަ އެވެ.