އަބްދުﷲ ރަޝީދުގެ ހަށިގަނޑު ހޯދަން އާއިލާއިން ކޯޓަށް
ފުލުހުންގެ ބެލުމުގެ ދަށުގައި ހުއްޓާ ސިއްހީ ފަރުވާ ނުދެވުމުގެ ސަބަބުން ނިޔާވި ގދ ހޯޑެއްދޫ އަބްދުﷲ ރަޝީދުގެ ހަށިގަނޑު ހޯދުމަށް އޭނާގެ އާއިލާއިން ސިވިލް ކޯޓަށް މައްސަލަ ހުށައަޅައިފިއެވެ.
ފުލުހުންގެ ބެލުމުގެ ދަށުގައި ހުއްޓާ 43 އަހަރުގެ އަބްދުﷲ ރަޝިދު ނިޔާވެފައިވަނީ 2 ގަޑިއިރެއްހާއިރު ފަރުވާއެއް އެދި އާދޭސްކުރުމަށްފަހުގައި ކަމަށް އާއިލާއިން ވަނީ ބުނެފައެވެ.
އޭނާ ފުލުހުންގެ ބެލުމުގެ ދަށަށް ގެންގޮސްފައިވަނީ މަސްތުވާތަކެތީގެ މައްސަލައެއްގެ ތުހުމަތުގައެވެ.
އާއިލާއިން ބުނިގޮތުގައި އަބްދުﷲ އަށް ސިއްހީ ފަރުވާދިނުމަށް މަޑަވެލި ދާއިރާގެ މެމްބަރު ހުސެއިން ފިރުޝާން އާއި މަޑަވެލީ ކައުންސިލްގެ ނައިބު ރައީސް ފުލުހުންނަށް ދަންނަވާފައިވެއެވެ. އަދި އޭނާ ހޮސްޕިޓަލަށް ނުގެންދެވޭނަމަ އެތަނަށް ޑޮކަޓަރެއް ގެނެވިދާނެކަމަށް ބުނެފައިވާކަމަށްވެސް އާއިލާއިން މީޑިއާތަކަށް މައުލޫމާތުދެމުން ކިޔައިދީފައިވެއެވެ. އެހެން ނަމަވެސް އޭނާއަށް ސިއްހީ ފަރުވާ ދިނުުގެ ފުރުސަތު ފުލުހުން ދީފައެއް ނުވެއެވެ.
އެ މައްސަލައިގެ ތަހުގީގަށްކަމަށް ބުނެ ނެޝަނަލް އިންޓަރގްރިޓީ ކޮމިޝަނުން ވަނީ ފުލުހުން އެދުނުގޮތަށް އަބްދުﷲ ރަޝީދުގެ ޕޯސްޓްމޯޓަމް ހެދުމަށް ނިންމާފައެވެ.
އެހެން ނަމަވެސް އާއިލާއިން އެކަމަށް ދެކޮޅުހަދައެވެ. އާއިލާއިން އެދެނީ އަބްދުﷲ ރަޝީދުގެ ހަށިގަނޑު އާއިލާއާއި ހަވާލުކޮށްދިނުމެވެ. ޕޯސްޓްމޯޓަމް ހެދުމުގެ ބޭނުމެއް ނެތްކަމަށް އާއިލާއިން ދަނީ ބުނަމުންނެވެ. އަދި އެ މައްސަލައިގައި އިތުރަށް ކުރިއަށް ދާން ބޭނުން ނުވާކަމަށްވެސް އާއިލާއިން ބުނެއެވެ.
އެއާއެކުވެސް ދައުލަތުން ގެންދަނީ ހަށިގަނޑު އާއިލާއަށް ހަވާލުކުރުމާއި ދެކޮޅު ހަދަމުންނެވެ.
އެހެންކަމުން އާއިލާއިން ވަނީ ހަށިގަނޑު ހޯދުމަށް ސިވިލް ކޯޓަށް އެ މައްސަލަ ހުށައަޅާފައެވެ. އަދި އެ މައްސަލައިގެ އަޑުއެހުމެއް މިއަދަށް ސިވިލް ކޯޓުގައި ވަނީ ތާވަލުކޮށްފައެވެ.
މި މައްސަލަ ކޯޓަށް ހުށައަޅާފައިވާއިރު ބައެއް މީޑިއާތަކުން ރިޕޯޓުކުރާ ގޮތުގައި، ކަމިޝަނާ އޮފް ޕޮލިސް މުހައްމަދު ހަމީދު ވަނީ އަބްދުﷲ ރަޝީދުގެ އާއިލާއާއި ބައްދަލުކޮށްފައެވެ. އަދި ކޯޓުގެ ނިންމުމަށް ފުލުހުން އިޚްތިރާމް ކުރާނެކަމަށް ކަމިޝަނަރު ވިދާޅުވެފައިވާކަމަށްވެސް ބައެއް މީޑިއާތަކުން ވަނީ ރިޕޯޓުކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
