ނާޒިމް މަގާމުން ވަކިކުރުމުގެ މައްސަލަ: ޖަލްސާ މާދަމާ ހެނދުނު 9 ޖަހާއިރު

ރައްޔިތުން މަޖިލީހުގެ ނައިބުރައީސްގެ މަގާމުން ދިއްގަރު ދާއިރާގެ މެންބަރު އަހުމަދު ނާޒިމް ވަކިކުރުމާ ގުޅޭގޮތުން ބާއްވާ ޖަލްސާ އޮންނާނީ މާދަމާ ހެނދުނު 9:00 ގައި ކަމަށް މަޖިލީހުގެ އިދާރާއިން ބުނެފި އެވެ.

މަޖިލީހުގެ ނައިބު ރައީސްގެ މަގާމުން ނާޒިމް ވަކިކުރުމަށް އޭނާ ނިސްބަތްވާ ކޮންގްރެސް ޕާޓީން ވަނީ ނިންމާފަ އެވެ. ނާޒިމް ވަކިކުރުމަށް ބޭނުންވާ އަދަދަށް ސޮއި ހަމަކުރުމަށްފަހު އެކަން ހުށަހަޅާފައިވަނީ މިމަހުގެ 14 ވަނަ ދުވަހު އެވެ. އެ ޕާޓީން ވަނީ ވަނީ ނާޒިމް މަގާމުން ވަކިކުރުމަށް 72 މެމްބަރުންގެ ސޮއި ހޯދާފަ އެވެ.

ގާނޫނުއަސާސީގައި ވާގޮތުން މަޖިލީހުގެ ނައިބު ރައީސް މަގާމުން ވަކިކުރަން ގަރާރެއް ހުށައެޅުމުން، 14 ދުވަހުގެ ނޯޓިސްއެއް ދޭން ޖެހެ އެވެ. އަދި، ދިފާއުގައި ވާހަކަދެއްކުމުގެ ފުރުސަތު ވެސް ދޭންޖެހެ އެވެ.

މިދިޔަ ބުދަދުވަހު ބޭއްވި އާއްމު ކޮމިޓީގެ ބައްދަލުވުމުގައި، ވަނީ ނާޒިމް ވަކިކުރުމުގެ ޖަލްސާ ކުރިއަށްގެންދާނޭގޮތް ކަނޑައަޅާފައެވެ. އެގޮތުން މުޅި މައްސަލައަށް އެއްގަޑިއިރު ހޭދަކުރަން ނިންމާފައިވާއިރު، މެންބަރުންގެ ބަހުސަށް 50 މިނެޓް ދިނުމަށް ވަނީ ނިންމާފަ އެވެ. އަދި ނާޒިމަށް 10 މިނެޓްގެ ވަގުތުކޮޅެއް ދިނުމަށް ވަނީ ނިންމާފަ އެވެ

ނާޒިމްގެ މައްޗަށް ދެ ތުހުމަތެއް ކުރެއެވެ. އެއީ ފިތުނަ އުފެއްދުމާއި މަސްލަހަތު ނަގާލުމުގެ ތުހުމަތެވެ.

ނާޒިމްގެ މައްސަލަ ތާވަލުކޮށް މާދަމާގެ އެޖެންޑާ މިހާރު ވަނީ ނެރެފަ އެވެ. އެޖެންޑާގައި އޮތީ ހަމައެކަނި އެ މައްސަލަ އެވެ. އެ ގަރާރާމެދު ގޮތް ނިންމުމުގެ ޖަލްސާ ފަށާނީ މާދަމާ ހެނދުނު 9:00 ގަ އެވެ.

މާދަމާ ބާއްވާ މަޖިލީހުގެ ޖަލްސާއަކީ މި ދައުރުގެ އެންމެ ފަހު ޖަލްސާއެވެ.