އައްޑޫ ބުރިޖާއި ހުވަދޫ ބުރިޖު އެޅުމަށް ޗައިނާއިން އިންވެސްޓަރުން ހޯދަނީ

ރައީސް ޑރ. މުހައްމަދު މުއިއްޒުގެ ދެކަނބަލުން މިހާރު ޗައިނާއަށް ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން އިއްޔެ ބޭއްވި އިންވެސްޓް މޯލްޑިވްސް ފޯރަމްގައި އިންވެސްޓަރުންނަށް ހުށަހެޅި މަޝްރޫއުތަކުގެ ތެރޭގައި އައްޑޫ ބްރިޖާއި ހުވަދޫ ބްރިޖު ހިމަނައިފިއެވެ.

ރައީސް ޑރ. މުހައްމަދު މުއިއްޒުގެ ރިޔާސީ ވަޢުދެއްގެ ގޮތުގައި ހިމެނޭ އައްޑޫ ހިތަދޫ އާއި ހުޅުމީދޫ ގުޅުވާލަ ދޭ ބްރިޖެއް އެޅުމާއި ގދ. ތިނަދޫ އާއި ކާޑެއްދޫ ގުޅުވާލަދޭ ބްރިޖެއް އެޅުމުގެ މަސައްކަތް އެމަނިކުފާނުގެ ވެރިކަމުގެ 5 އަހަރު ތެރޭ ފައްޓަވާނެކަމަށް އެ މަނިކުފާނުވަނީ ތަކުރާރުކޮށް ވިދާޅުވެފައެވެ.

އައްޑު އަތޮޅު ހިތަދޫ އާއި ހުޅުމީދޫ އާއި ދެމެދު 23 ކިލޯމީޓަރު ހުންނައިރު، ތިނަދޫ އާއި ކާޑެއްދޫގެ ދުރުމިނުގައި 4.4 ކިލޯމީޓަރު ހުރެ އެވެ.

ރައިސް ޑރ. މުޙައްމަދު މުއިއްޒު މިހާރު ޗައިނާއަށް ކުރައްވާ ދަތުރުފުޅުގެ ތެރެއިން މި ދެ ބުރިޖު އެޅުމަށް ޗައިނާއިން އިންވެސްޓަރުން ހޯދުމުގެ މަސައްކަތް ކުރައްވަމުން ގެންދަވާއިރު، މީގެ ތެރެއިން ހިތަދޫ އާއި ހުޅުމީދު ގުޅާލަދޭ ބްރިޖު އެޅުމުގެ މަސައްކަތަށް ބޭނުންވާ ސާވޭއަށް މި އަހަރުގެ ބަޖެޓުގައި 30 މިލިއަން ރުފިޔާ ބަޖެޓުކޮށްފައި ވެއެވެ. އަދި ވެރިކަމުގެ ފުރަތަމަ 100 ދުވަހުގެ ތެރޭގައި މި މަސައްކަތް ފަށަން ސަރުކާރުގެ "ހަފުތާ14" މަގުޗާޓުގައި ވެސް ހިމަނުއްވާފައިވެއެވެ.

ރައީސް ޑރ. މުޙައްމަދު މުއިއްޒު ބައިވެރިވެ ވަޑައިގެން ތަޤްރީރު ކުރެއްވި އިންވެސްޓްމަންޓް މޯލްޑިވްސް ފޯރަމުގައި ޗައިނާގެ އެންމެ ވަރުގަދަ 300 އަށް ވުރެ ގިނަ ވިޔަފާރިވެރިން ބައިވެރިވެ ވަޑައިގެންނެވި އިރު ރާއްޖޭގެ ދައުލަތުގެ މަތީފަންތީގެ ވަފުދެއް ވެސް ވަނީ ބައިވެރިވެ ވަޑައިގަންނަވާފައެވެ.