މިއަހަރުގެ މާޗްމަސް ނިމުމުގެ ކުރިން 70 އަށްވުރެ ގިނަ ރަށުގައި ޑޮލަރު އޭޓީއެމް ބަހައްޓާނަން: ޝަރީފް

މިއަހަރު ނިމުމުގެ ކުރިން 70 އަށްވުރެ ގިނަ ރަށުގައި ބީއެމްއެލް ޑޮލަރު އޭޓީއެމް ބަހައްޓާނޭކަމަށް ބޭންކް އޮފް މޯލްޑިވްސްގެ ސީއީއޯ މުހައްމަދު ޝަރީފު ވިދާޅުވެއްޖެއެވެ.

ދ.ކުޑަހުވަދޫގައި ބީއެމްއެލްގެ އައު ބްރާންޗް ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން ޝަރީފް ވިދާޅުވީ، ރާއްޖޭގެ އުތުރުން ފެށިގެން ދެކުނަށް ބީއެމްއެލްގެ އޭޓީއެމް ހިދުމަތް ފުޅާކުރުމަށް ގިނަ މަސައްކަތްތަކެއް ކުރަމުންގެންދާކަމަށެވެ. އެގޮތުން ކުރެވިގެންދާ މަސައްކަތްތަކުގެ ދަށުން އުތުރުން ދެކުނަށް ޑޮލަރު އޭޓީއެމް ވިއއުގަ ގާއިމްކުރުމަށް ފަށާފައިވާ މަސައްކަތްތަކުގެ ދަށުން ފުރަތަމަ ތިންމަސްދުވަސް ނިމެންވާއިރަށް 70 އަށްވުރެ ގިނަ ރަށުގައި ޑޮލަރު އޭޓީއެމް ބަހައްޓާނޭކަން ޝަރީފް ވިދާޅުވިއެވެ.

ސީއީއޯ ޝަރީފް ވިދާޅުވީ ބީއެމްއެލްގެ ހިދުމަތްތައް ޑިޖިޓަލް ކުރަމުންދިޔަނަމަވެސް ޒަމާނީ ވިޔަފާރީގައި އެންމެ މުހިންމުކަމަކީ ކަސްޓަމަރުންނާއެކު އޮންނަ ގުޅުންކަމަށެވެ. އެ އިތުބާރާއި ގާތްކަން ދެމެހެއްޓުމަށް ބީއެމްއެލް ގޮފިތައް އެކި ކަންކޮޅުތަކުގައި ގާއިމްކުރަމުން އަންނައިރު، މިދިޔަ އަހަރު ބިންގާ އެޅުނު ބީއެމްއެލްގެ 12 ބްރާންޗު މިއަހަރުގެ ތެރޭގައި ހުޅުވިގެންދާނޭކަމަށެވެ.

މި ބްރާންޗުގައި (ކުޑަހުވަދޫ ބްރާންޗުގައި) ހިދުމަތްދޭނީ މުޅިން ޑިޖިޓަލްކޮށް އަދި ޕޭޕަ ލެސްކޮށް. ހިދުމަތްދިނުމުގައި ކައުންޓަރުތަކެއް ނުހުންނާނެ. ހިދުމަތް ހޯދުމަށް އަންނަ ކަސްޓަމަރުންނާ ބައްދަލުކޮށް މަޝްވަރާކުރުމަށް މީޓިން ޕޮއިންޓްތަކާ ލައުޑްސްޓައިލަށް މި ބްރާންޗް ޑިޒައިން ކުރެވިފައި މިވަނީ

ބޭންކް އޮފް މޯލްޑިވްސްގެ ސީއީއޯ މުހައްމަދު ޝަރީފު

ޝަރީފް ވިދާޅުވީ ބީއެމްއެލުން މިއަދު ކުޑަހުވަދޫގައި ގާއިމްކުރި އެ ބޭންކުގެ އައު ބްރާންޗަކީ އެ ބޭންކުން ކުރިއަށް އޮތްތަނުގައި ހިދުމަތްދިނުމަށް ރާވާފައިވާ ސްޓްރަޓަޖީއާ އެއްގޮތަށް ހިދުމަތްދޭން ފަށާ ބްރާންޗެއް ކަމަށެވެ.

ޝަރީފް ވިދާޅުވީ ބީއެމްއެލްގައި މިހާރު ހިނގަމުން އަންނަ ކަސްޓަމަރ ޓްރާންސެކްޝަންތަކުގެ ތެރެއިން 99.7 އިންސައްތަ ޓްރާންސެކްޝަންތައް ހިނގަނީ ޑިޖިޓަލްކޮށް ކަމަށާއި ކުޑަހުވަދޫގައި ގާއިމްކޮށްފައިވާ ބްރާންޗުގެ އެފަދަ ޓްރާންސެކްޝަންތައްވެސް ހިނގަމުންދާނީ ޑިޖިޓަލްކޮށް ކަމަށެވެ.

އެގޮތުން އެކައުންޓް ހުޅުވުމާއި ލޯނަށް އެދުމުގެ ހިދުމަތްތައްވެސް ކުޑަހުވަދޫގައި ގާއިމްކުރި ބީއެމްއެލްގެ ބްރާންޗުން ދެމުންގެންދާނީ ޑިޖިޓަލްކޮށްކަމަށެވެ. ފައިސާގެ މުއާމަލާތްތަކައި ކާޑާ ގުޅޭގޮތުން ކުރަންޖެހޭ މުއާމަލާތްތައްވެސް ކުރިއަށްދާނީ ޑިޖިޓަލްކޮށްކަމަށް އޭނާ ފާހަގަކުރެއްވިއެވެ.