އިޓްލޮސް މައްސަލާގައި ރާއްޖެއަށް ނާކާމިޔާބުވީ ވަކީލުންގެ ސަބަބުން ކަމަށް ނުބުނަން: އޭޖީ އުޝާމް

އިންޓަރނޭޝަނަލް ޓްރައިބިއުނަލް އޮން ލޯ އޮފް ދަ ސީ (އިޓްލޮސް)ގެ މައްސަލާގައި ރާއްޖެއަށް ނާކާމިޔާބުވީ އެ މައްސަލާގައި ބަހުސް ކުރި ވަކީލުންގެ ސަބަބުން ކަމަށް ބަންޑާރަ ނާއިބުގެ އޮފީހުން ބުނެފައިނުވާނެ ކަމަށް ބަންޑާރަ ނާއިބު އަހުމަދު އުޝާމް ވިދާޅުވެއްޖެ އެވެ.

މިއަދު އޮތް ނޫސްވެރިންގެ ބައްދަލުވުމުގައި ވާހަކަ ދައްކަވަމުން އުޝާމް ވިދާޅުވީ، ކުރީ ސަރުކާރުން ނެގި ސްޓޭންޑް ގެ ސަބަބުން، ރާއްޖޭގެ ކަނޑުން ގެއްލުނު ބައި އަނބުރާ ހޯދުމުގެ މަސައްކަތަކީ ހަފްތާ 14 ގެ ސިޔާސަތުގެ ދަށުން އޭޖީ އޮފީހާ ހަވާލު ކުރެވިފައިވާ މަސައްކަތެއް ކަމަށެވެ. އަދި އެ މަސައްކަތުގެ ދަށުން ތައްޔާރު ކުރެވިފައިވާ ރިޕޯޓު ވަރަަށް އަވަހަށް ކެބިނެޓަށް ހުށަހަޅުއްވާނެކަމަށް އުޝާމް ވިދާޅުވިއެވެ.

ބޭރުގެ ދެ ފަރާތެއްގެ ޕްރިލިމިނަރީ ރިޕޯޓް އަޅުގަނޑުމެންނަށް ލިބިއްޖެ. އެ ރިޕޯޓް ތަކުގެ މައްޗަށް ބިނާކޮށް، އަޅުގަނޑުމެން ވެސް ކެބިނެޓަށް ހުށަހަޅަންޖެހޭ ރިޕޯޓްގެ މަސައްކަތް ގާތްގަނޑަކަށް ހަމަ ނިމިފައި. ވިލަރެސް ކޮމިޓީގެ ރިޕޯޓް އަޅުގަނޑަށް ވެސް ލިބިފައި އޮތީ. ދެން އަޅުގަނޑު އޭތި ބެލުމަށްފަހު ކެބިނެޓަށް ހުށަހަޅައިގެން ކެބިނެޓުން ޑިސިޝަނެއް ނެގީމަ އަޅުގަނޑުމެން ކުރިއަށްދާނެ ގޮތެއް ނިންމާނީ. އެނިންމުން އަޅުގަނޑުމެން އާއްމު ވެސް ކުރާނަން.

ބަންޑާރަ ނާއިބު އަހުމަދު އުޝާމް

މީގެ އިތުރުން މި ބައްދަލުވުމުގައި، އިޓްލޮސްގެ މައްސަލައިގައި ރާއްޖެއަށް ނާކަމިޔާބުވީ ރާއްޖެ ތަމްސީލުކުރި ވަކީލުން ނަގަންޖެހޭ ދިފާއުތައް ނުނަގައިގެންކަމަށް މި ސަރުކާރުން ބުނި ކަމަށާ، ކަން އެހެން އޮތް އިރު އައިސީޖޭގައި ރާއްޖެ ތަމްސީލު ކުރުމަށްވެސް އެ ވަކީލުން ފޮނުވަން ޖެހުނީ ކީއްވެތޯ ސުވާލު ނޫސްވެރިއަކު ވަނީ ސުވާލުކޮށްފައެވެ.

އެ ސުވާލަށް ޖަވާބު ދެއްވަމުން އުޝާމް ވިދާޅުވީ، ޤާނޫނީ ކަންކަން ހިނގާ ގޮތަކީ ކްލައިންޓުން ބޭނުންވާ ގޮތަށް ވަކީލުން ސްޓޭންޑު ނެގުން ކަމަށެވެ. އަދި އޭރު ކްލައިންޓަކީ ނިމިދިޔަ ސަރުކާރުކަމަށާ، އެ ވަކީލުން އޭރު ނެންގެވީ އެ ސަރުކާރުގެ ސްޓޭންޑް ކަމަށެވެ.

އަދި، ބަޔާނުގައި އޮންނާނީ ނިމިދިޔަ ސަރުކާރުގެ ވާހަކަ ކަމަށާއި، އެއްވެސް ވަރަކަށް ވަކީލުންގެ ވާހަކަ ބަޔާނުގައި ނޯންނާނެކަން ފާހަގަ ކުރައްވައި އުޝާމް ވަނީ އެ ބަޔާނުގައި ލިޔެފައިވާ ވާހަކަތައްވެސް ބަޔާން ބަލައިގެން ކިޔުއްވައި ދެއްވާފައެވެ.

"އެޓާރނީ ޖެނެރަލްގެ އޮފީހުން ނެރުނު އެއްވެސް ބަޔާނެއްގައި ނޯންނާނެ ވަކީލުންގެ ވާހަކަ ލިޔެފައެއް. ނޫސް ބަޔާނުގައި އަޅުގަނޑުމެން ލިޔެފައި އޮންނާނީ އޭރުގެ ދިވެހި ސަރުކާރުން ރަނގަޅު ޕޮޒިޝަން ނަގާފައި ނުވާ ވާހަކަ. އެއްވެސް ހާލެއްގައި ދައުލަތް ރިޕްރެސެންޓް ކުރި ވަކީލުންނާ ގުޅޭގޮތުން އެއްވެސް ވާހަކައެއް ދައްކާފައެއްވެސް ނޯންނާނެ." ބަންޑާރަ ނާއިބު އަހުމަދު އުޝާމް ވިދާޅުވި އެވެ.