ދޮންބަންޑާރައިންގެ ހަޔާތްޕުޅު ދައްކުވައިދޭ ވީޑިއޯ ކްލިޕާއި ކުރު ފިލްމު ހެދުމުގެ މުބާރާތެއް އިއުލާންކޮށްފި

މި އަހަރުގެ ހުރަވީ ދުވަހުގެ މުނާސަބަތާއި ގުޅުވައިގެން ދޮންބަންޑާރައިންގެ ހަޔާތްޕުޅު ދައްކުވައިދޭ ވީޑިއޯ ކުލިޕް ނުވަތަ ކުރު ފިލްމު އުފެއްދުމުގެ މުބާރާތެއް ދިވެހިބަހާއި ސަޤާފަތާއި ތަރިކައާއި ބެހޭ ވުޒާރާއިން އިއުލާންކޮށްފިއެވެ.

އެ ވުޒާރާއިން ވިދާޅުވީ މި މުބާރާތް ކުރިއަށް ގެންދިޔުމަށް ހަމަޖެހިފައިވަނީ، މުޅި ރާއްޖެއަށް ހުޅުވާލައިގެންކަމަށެވެ.

މި މުބާރާތް ކުރިއަށްދާނީ ދެ ގިންތިއަކަށް ބަހާލައިގެންނެވެ. އެގޮތުން ފުރަތަމަ ގިންތީގައި ހިމެނެނީ، 21 އަހަރާއި 21 އަހަރުން ދަށް އަދި ދެވަނަ ގިންތީގައި ހިމެނެނީ 21 އަހަރުން މަތީގެ އުމުރުފުރާއެވެ. މި ދެ ގިންތީގެ އުފެއްދުންތައް އިންސާފު ކުރުމާއި، މާކުސް ދިނުން އޮންނާނީ ވަކިންނެވެ. އެގޮތުން މި މުބާރާތުން ކޮންމެ ގިންތިއަކުން 1،2،3 ވަނަ ހޮވާ، 1 ވަނައަށް ހޮވޭ ކުރު ފިލްމު ނުވަތަ ވީޑިއޯ ކްލިޕަކަށް 15،000 ރުފިޔާއާއި ހަނދާނީ ލިޔުމާއި، ދެވަނައަށް 10،000 ރުފިޔާއާއި ހަދާނީ ލިޔުން، އަދި 3 ވަނައަށް 5،000 ރުފިޔާއާއި ހަނދާނީ ލިޔުން ދެވޭނެ ކަމަށް މިނިސްޓްރީއިން ވިދާޅުވެފައިވެއެވެ.

މި މުބާރާތް ބޭއްވުމުގެ މަގުސަދަކީ ދިވެހީންގެ މެދުގައި ދިވެހި ތާރީޚަށް އޮންނަ ލޯތްބާއި ޝައުޤުވެރިކަން އިތުރުކުރުމާއި ހުރަވީ ދުވަހާއި ގުޅޭގޮތުން ޢާންމުން ހޭލުންތެރިކޮށް އަހުލުވެރިކުރުވުމާއި، ހުރަވީ ދުވަހުގެ ބަޠަލު ދޮންބަންޑާރައިން މި ޤައުމަށް ވެވަޑައިގެން ޤުރުބާނީއާއި ދޮންބަންޑާރައިންގެ ހަޔާތްޕުޅުން ނެގޭ ފިލާވަޅުތައް ރަމްޒުކޮށްދޭ ކަންކަމުގެ މައްޗަށް ޢާންމުން ހޭލުންތެރިކޮށް އަހުލުވެރިކުރުވުން ކަމަށް ދިވެހިބަހާއި ސަޤާފަތާއި ތަރިކައާ ބެހޭ ވުޒާރާއިން ވިދާޅުވެފައިވެއެވެ. ވީޑިއޯ ކުލިޕް ނުވަތަ ކުރު ފިލްމުގެ ވާހަކަ ބިނާކޮށްފައި އޮންނަންވާނީ، ހުރަވީ ދުވަހުގެ ބަޠަލު އައްސުލްޠާނުލް ޣާޒީ ޙަސަން ޢިއްޒުއްދީން (ދޮންބަންޑާރައިން)ގެ ހަޔާތްޕުޅުގެ މައްޗަށް ކަމަށާއި، ތައްޔާރު ކުރާ ވީޑިއޯ ކުލިޕްތަކުގެ ޖުމްލަ ދިގުމިން ނުވަތަ ކުރު ފިލްމެއްނަމަ ދިގުމިން ވާންވާނީ، 10 މިނިޓާއި 15 މިނިޓަށް ފެތޭ އުފެއްދުމަކަށް ކަމަށް ދިވެހި ބަހާއި ބެހޭ ވުޒާރާއިން ވިދާޅުވިއެވެ.

އެވުޒާރާއިން ވިދާޅުވީ، ވީޑިއޯތަކުގެ އެއްވެސް މަންޒަރެއްގައި ދޮންބަންޑާރައިންގެ މޫނުފުޅު ސިފަކޮށް ކުރިމަތިން ފެންނަ ގޮތަށް ދައްކައިގެން ނުވާނެ ކަމަށެވެ. އެއީ ރަސްމީ ނުވަތަ އިތުބާރު ހިފޭ އެއްވެސް އެއްޗަކުން އެމަނިކުފާނު ސިފަތައް އެނގެން ނެތުމުން ތާރީޚީ އޮޅުމެއް ނާރާ ގޮތް ހެދުމަށެވެ. ނަމަވެސް މި ވީޑިއޯގައި އަސްލު މީހުން ނުވަތަ އަސްލާ އެއްގޮތް ކެރެކްޓާސް ބޭނުން ކުރެވިދާނެ ކަމަށާއި، ވީޑިއޯއަށް ނަމެއް ދެވިފައި އޮންނަންވާނެ ކަމަށާއި، ހުށަހަޅާ ފަރާތުގެ ނަންވެސް އޮންނަންވާނެކަމަށް އެ ވުޒާރާއިން ވަނީ އަންގާފައެވެ. އަދި މި ވީޑިއޯތައް ވާންވާނީ ހުރިހާ އުމުރު ފުރައަކަށް ބެލޭ ފަދަ އުފެއްދުމަކަށް ކަމަށްވެސް އެ ވުޒާރާއިން ވިދާޅުވިއެވެ.

މި މުބާރާތަށް ހުށަހަޅާ ވީޑިއޯ ކްލިޕް ނުވަތަ ކުރު ފިލްމުތަކުގައި ހިމަނައިގެން ނުވާނެ ކަންކަން ވެސް އެ ވުޒާރާއިން ވަނީ ހާމަކޮށްދެއްވާފައެވެ. އެގޮތުން އިސްލާމްދީނާއި ދިވެހިރާއްޖޭގެ ޤާނޫނާއި ޚިލާފުވާ ފަދަ ވާހަކަތަކާއި، މީހެއްގެ ކަރާމާތަށް ގެއްލުން ލިބިދާނެ ފަދަ ވާހަކަތަކާއި، މުޖުތަމަޢުގެ އަޚްލާޤީ މިންގަނޑުތަކާއި ހަމަތަކާއި ޚިލާފުވާ ފަދަ ވާހަކަތަކާއި، މުޖުތަމަޢުގައި ބައިބައިވުން އުފެދިދާނެ ފަދަ ވާހަކަތައް އަދި ވަކި ފަރާތެއްގެ މަސްލަޙަތު ކުރިއަރުވަން ނުވަތަ ވަކި ފަރާތެއްގެ މަސްލަޙަތު ދަށްކޮށްލަން ދައްކާ ފަދަ ވާހަކަތައް ހިމަނައިގެން ނުވާނެކަމަށް އެވުޒާރާއިން އަންގައެވެ. މީގެ އިތުރުން، މި މުބާރާތަށް ހުށަހަޅާ ވީޑިއޯއަކީ ކުރިން ޢާންމު ކުރެވިފައިވާ ނުވަތަ ހުށަހަޅާފައިވާ އުފެއްދުމަކަށް ވެގެން ނުވާނެކަމަށް ވެސް އެ ވުޒާރާއިން އަންގައެވެ.

އެހެންކަމުން، މިކަމަށް ޝައުޤުވެރިވާ ފަރާތްތަކުން 28 ޑިސެންބަރު 2025ވާ އާދިއްތަ ދުވަހުގެ 14:00ގެ ކުރިން، [email protected] އީމެއިލަށް ލިންކެއް މެދުވެރިކޮށް ވީޑިއޯ ކުލިޕް ނުވަތަ ކުރު ފިލްމު ހުށަހެޅުމަށް މިނިސްޓްރީއިން ވަނީ އެދިވަޑައިގަނެފައެވެ. މި މުބާރާތުގެ ޤަވާއިދު އަދި ބައިވެރިވުމަށް އެދޭ ފޯމު އިޢުލާނާއެކު ވަނީ ހިމަނާފައެވެ.