ބްރިޖް ބިނާކޮށްފައި އެއޮތީ، އޭރުގެ އިޤްތިސާދީ ހާލަތަށް ބަލައި އެންމެ ރަނގަޅަށް: އަދީބް
ލިޔުންތެރިޔާ
އަބްދުﷲ ހުސައިން
ޗައިނާ އާއި ދިވެހިރާއްޖެ ދެމެދު އޮތް ގުޅުން ރަމްޒުކޮށްދޭ ބްރިޖް ބިނާކޮށްފައި އެއޮތީ އޭރު ރާއްޖޭގެ އިގްތިސާދު ތަންދިން އެންމެ ރަނގަޅު މިންގަނޑުންކަމަށް ޤަބޫލުކުރާކަމަށް ކުރީގެ ނައިބުރައީސް، އަހުމަދު އަދީބް ވިދާޅުވެއްޖެއެވެ.
ބްރިޖުން ލޭނު މަދުކަމަށް ދެކެވެމުންދާ ވާހަކަތަކާ ގުޅޭގޮތުން އެންމެފަހުން ޕީއެންއެފުން ބޭއްވި ޖަލްސާގައި ރައީސް ޔާމިނު ވަނީ ބްރިޖާ ގުޅޭގޮތުން ބައެއް ވާހަކަތައް ހިއްސާކުރައްވާފައެވެ. ރައީސް ޔާމިނު އެރޭ ދެއްކެވި ވާހަކަތަކަށް ބަލާއިރު، އެމަނިކުފާނު ވަނީ އަދުގެ ރާއްޖޭގެ ކުރިމަގަށް ބަލާއިރު، ބްރިޖް ކުޑަކަމަށް ފާހަގަކުރައްވައި ވާހަކަ ދައްކަވާފައެވެ.
ސިނަމާލެ ބްރިޖާ ގުޅޭގޮތުން ދެކެވެމުންދާ ވާހަކަތަކާ ގުޅޭގޮތުން، ރައީސް ޔާމިނު ސަރުކާރުގެ އިކޮނޮމިކް ކައުންސިލްގެ ކޯ ޗެއާގެ މަގާމު ފުރުއްވި އަދީބް މިރޭ އެމަނިކުފާނުގެ ފޭސްބުކް ޕޭޖްގައި ޕޯސްޓްކުރެއްވި ވިޑިއޯ މެސެޖެއްގައި ވިދާޅުވީ، ބްރިޖް ބިނާކޮށްފައި އެއޮތީ އޭރު ރާއްޖޭގެ ބަޖެޓް ހުރި މިންގަނޑާއި، އެނޫންވެސް ކަންކަން ބެލުމަށްފަހު އޭރު ފެނުނު އެންމެ ރަނގަޅު ގޮތަށް ކަމަށެވެ. ބްރިޖާ ގުޅޭގޮތުން ރައީސް ޔާމިނު ވާހަކަދެއްކުމުގެ މާނައެއްނެތްކަން ފާހަގަކުރައްވަމުން އަދީބް ވިދާޅުވީ، ޖުމްލަ ގޮތެއްގައި ބްރިޖްގެ މަސައްކަތްތައް ފަށައި ނިމުނުއިރުވެސް ރައީސް ޔާމިނުގެ ފަރާތުން އެކަށީގެންވާ އެއްބާރުލުމެއް ލިބިވަޑައި ނުގެންނެވި ކަމަށެވެ.
އަދީބް ސިފަކުރެއްވި ގޮތުގައި ބްރިޖް އެޅުމަށްވުރެ ރައީސް ޔާމިނަށް ތާސްކުޅުއްވުން މުހިއްމުވިއެވެ. ބްރިޖާ ގުޅޭގޮތުން ލަފައަކަށް ނުވަތަ އެނޫންވެސް ކަމަކަށް އެދުނުނަމަވެސް ރައީސް ޔާމިނު އެކަމަށް މާބޮޑު ސަމާލުކަމެއް ނުދެއްވިކަމަށް އަދީބް ވިދާޅުވިއެވެ.
އިކޮނޮމިކް ކައުންސިލުން ބްރިޖްގެ ބޯހޯލް ސްޓަޑީ ހަދަންބުނީމަވެސް އަޅުގަނޑު ޖެހުނީ އިންޓަވިއުދޭން. އޭގެ (ބްރިޖްގެ) އެމްއޯޔޫގައިވެސް ސޮއިކުރަންޖެހުނީ އަޅުގަނޑަށް އަދި ހަމަ އެހެންމެ ބްރިޖް ލޯންޗުކޮށް ޑިޒައިން ފައިނަލްވީމަވެސް އަޅުގަނޑު ދެންނެވިން ރައީސް ޔާމިނަށް ސްޕީޗްދެއްވާ ލޯންކޮށްދެއްވުމަށް ނަމަވެސް ރައީސް ޔާމީނު ވިދާޅުވީ އަދީބް ކުރިއަށްގެންދިއުމަށް. އަޅުގަނޑަށް އެނގޭ އޭރު ރައީސް ޔާމިނުވެސް ޤަބޫލެއް ނުކުރައްވާ ބްރިޖް އެޅޭނޭ ކަމަކަށް. ބައެއް މިނިސްޓަރުންވެސް ގަބޫލެއް ނުކުރޭ
އަދީބް ވިދާޅުވިއެވެ.
އަދީބް ވިދާޅުވީ، ބްރިޖް އެޅޭނޭކަމަށް އޭރު ގަބޫލުކުރެއްވި މަދު ބޭފުޅުންގެ ތެރޭގައި މިހާރުގެ ރައީސް ޑރ.މުއިއްޒު ހިމެނިވަޑައިގަންނަވާ ކަމަށެވެ. އޭރު އިކޮނޮމިކް ކައުންސިލުގައި ޑރ.މުއިއްޒު ހިމަނައިދެއްވުމަށް އެދުމުންވެސް ރައީސް ޔާމިނުގެ ފަރާތުން ސަމާލުކަމެއް ނުލިބުނު ކަމަށްވެސް އަދީބު ވިދާޅުވިއެވެ. ރައީސް ޑރ.މުއިއްޒުއަކީ އިކޮނޮމިކް ކައުންސިލްގައި އޭރު އިންނަވަންޖެހޭ ބޭފުޅެއް ނަމަވެސް ޕާކެއް ބަންދުކުރި މައްސަލާގައި އަދާހަމަޔަށްވެސް ރައީސް ޔާމިނު ހުންނަވަނީ ޑރ.މުއިއްޒުއާ ޒާތީގޮތުން ޖައްސާލާފައިކަން އަދީބް ފާހަގަކުރެއްވިއެވެ.
އަދީބް ވިދާޅުވީ ބްރިޖް ލޭނުތައް މިހާރު ފެންނަން އެހުރީ ފައިނަލް ޑިޒައިނުގައިވެސް ހުރިގޮތަށް ކަމަށެވެ. ބްރިޖުން ލޭނުތައް މަދުކަމަށް ދައްކަމުންދާ ވާހަކާގައި އެއްވެސް އަސްލެއް ނެތްކަމަށް އަދީބް ވިދާޅުވިއެވެ. ބްރިޖް ބްރިޖަކަށްވީ މިހާރުގެ ރައީސް ޑރ.މުއިއްޒު އާއި އަދި ޑރ.މުއްތަލިބުމެން ފަދަ ކަމުގެ ފަންނީ ބޭފުޅުންގެ ވަރަށް ބުރަ މަސައްކަތްޕުޅުންކަމަށްވެސް އަދީބް ވަނީ ފާހަގަކުރައްވާފައެވެ.
ބްރިޖް ބިނާކޮށްފައި އެއޮތީ އޭރު ރާއްޖޭގެ އިގްތިސާދު ތަންދިން އެންމެ ރަނގަޅު މިންގަނޑުންކަމަށް ޤަބޫލުކުރާކަމަށް އަދީބް ވިދާޅުވިއިރު، ރާއްޖޭގެ އިގްތިސާދުގައި މިހިނގަނީ ދަތި ދުވަސްވަރެކެވެ. މިދިޔަ އަހަރުތަކުގައި ލޯނުތަކާއި ސަރުކާރުގެ ހަރަދުތައް އިތުރުވުމުގެ ނަތީޖާއެއްގެ ގޮތުން ކުރިއަށް އޮތް ދެތިން އަހަރެއްގެ ތެރޭގައި ރާއްޖެއިން ބޮޑެތި އަދަދުތަކުން ލޯނުތައް ދައްކަންޖެހިފައިވާކަން ފާހަގަކޮށްލެވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
