އަނގޮޅިތީމުގައި ޕޮލިސް ޕޯސްޓު ގާއިމު ކުރުމުގެ މަސައްކަތް މި އަހަރު ފުރިހަމަކުރުމަށް މަސައްކަތްކޮށްދޭނަން: ރައީސް
ރ.އަނގޮޅިތީމުގައި ޕޮލިސް ޕޯސްޓު ގާއިމު ކުރުމުގެ މަސައްކަތް މި އަހަރު ފުރިހަމަކުރުމަށް މަސައްކަތްކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް ޑރ.މުއިއްޒު މިފަދައިން ވިދާޅުވީ މިހާރު ރ އަތޮޅަށާއި ބ އަތޮޅަށް އެ މަނިކުފާނު ކުރައްވާ ދަތުރުފުޅުގެ ތެރެއިން އަނގޮޅިތީމް ގެ ކައުންސިލާއި އަންހެނުންގެ ތަރައްގީ އަށް މަސައްކަތް ކުރާ ކޮމިޓީ އާއި ބައްދަލުކުރައްވާ ދެއްކެވި ވާހަކަފުޅުގައެވެ.
ރ. އުނގޫފާރު ކައުންސިލުގެ އިދާރާގައި ކުރިއަށް ދިޔަ މި ބައްދަލުވުމުގައި، އަނގޮޅިތީމް ގެ ކައުންސިލުން ވަނީ ފެނާ ނަރުދަމާގެ މަސައްކަތް އަވަސްކޮށްދިނުމަށާއި، ރަށުގައި ޓީޖެޓީއަކާއި މޫދަށް އެރޭނެ ސަރަހައްދަށް ތަރައްޤީކުރަން ބޭނުންވާކަމަށް ބުނެފައެވެ. މީގެ އިތުރުންވެސް، އަނގޮޅިތީމް ގެ ހެލްތު ސެންޓަރުގެ ޚިދުމަތް 18 ގަޑިއިރަށް އިތުރުކުރުމަށާއި، އޭޓީއެމްގެ ޚިދުމަތާއި ހޭންޑް ބޯލްކޯޓުގެ އިތުރުންވެސް ރަށަށް ބޭނުންވާ ތަރައްގީގެ ގިނަ ކަންކަން ކައުންސިލުން ވަނީ ފާހަގަކޮށްފައެވެ.
ކައުންސިލުގެ އިތުރުން، އ.ތ.މ ކޮމިޓީން ވަނީ އެކޮމިޓީގެ މަސައްކަތްތައްކުރުމަށް ލިބޭ ބަޖެޓު ކުޑަކަން ފާހަގަކޮަށްފައެވެ.
މި ބައްދަލުކުރެއްވުމުގައި ރައީސް ޑރ.މުއިއްޒު ވަނީ ކައުންސިލާއި އ.ތ.މ ކޮމިޓީން ފާހަގަކުރެއްވި ކަންކަން ޙައްލުކޮށްދެއްވުމަށް މަސައްކަތްކޮށްދެއްވާނެކަމަށް ވިދާޅުވެފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
