ބީއެމްއެލުން ދުވާލެއްގެ މައްޗަށް މިހާރު 2.7 މިލިއަން ޑޮލަރު ވިއްކާ: ސައީދު
ލިޔުންތެރިޔާ
އަބްދުﷲ ހުސައިން
ބޭންކް އޮފް މޯލްޑިވްސް އިން މިހާރު ދުވާލެއްގެ މައްޗަށް 2.7 މިލިއަން ދޮލަރު ވިއްކަމުންދާކަމަށް އެ ބޭންކުން ހާމަކޮށްފިއެވެ.
ރާއްޖޭގެ އިގްތިސާދާ ގުޅޭގޮތުން ސަރުކާރާއި އަދި ނަގާކިޔާ ބައެއް އަމިއްލަ ވިޔަފާރިވެރިން ބައިވެރިވި އިގްތިސާދުގެ ދެފަރާތް ޕްރޮގްރާމްގައި ވާހަކަދައްކަވަމުން ބޭންކް އޮފް މޯލްޑިވްސްގެ ހެޑް އޮފް ބްރޭންޑް އެންޑް މާކެޓިން ސްޓެރެޓަޖީ މުހައްމަދު ސައީދު ވިދާޅުވީ ކުރިއާ ހިލާފަށް ބޭންކުން އެކި ފަރާތްތަކަށް ވިއްކަމުންދާ ޑޮލަރުގެ މިންވަރު ވަރަށްބޮޑަށް އިތުރުވެފައިވާކަމަށެވެ.
ބީއެމްއެލުން ކުރާ ޑޮލަރުގެ މުއާމަލާތްތަކާ ގުޅޭގޮތުން ވާހަކަދައްކަވަމުން ސައީދު ވިދާޅުވީ، މީގެ ތެރޭގައި ކާޑުގެ ޓްރާންސެކްޝަންތަކަށް ބީއެމްއެލުން ބޭރުވާ ޑޮލަރުގެ އިތުރުން ޓީޓީ ހެއްދުމަށް ދޫކުރާ ޑޮލަރު ހިމެނޭކަމަށެވެ. ސައީދު ވިދާޅުވީ މިއަހަރަށް ބަލާއިރު، އަހަރުގެ މިހާތަނަށް އެކަނިވެސް ބީއެމްއެލުން ވިއްކި ޑޮލަރުގެ މިންވަރު އިތުރުވެފައިވާކަމަށެވެ. އެގޮތުން މިއަހަރުގެ ފުރަތަމަ ހަމަސްދުވަހުގެ ތެރޭގައި 570 މިލިއަން ޑޮލަރު ވިއްކާފައިވާކަން ސައީދު ވިދާޅުވިއެވެ.
މީގެ އިތުރުން ކަސްޓަމަރުންގެ އެކިއެކި މުއާމަލާތްތަކަށް ބަލާއިރު ހާއްސަކޮށް ވިޔަފާރިތަކަށް މިދިޔަ ހަ މަސް ދުވަސް ތެރޭގައި 270 މިލިއަން ޑޮލަރު، ލޯންގެ ގޮތުގައި ދޫކޮށްފައިވާނޭކަމަށްވެސް ސައީދު ފާހަގަކުރެއްވިއެވެ.
ބޭންކް އޮފް މޯލްޑިވްސްގެ ތަފާސްހިސާބުތަކަށް ބަލާއިރު މަހުން މަހަށް ބީއެމްއެލުން ވިއްކާ ޑޮލަރުގެ މިންވަރު އަންނަނީ ވަރަށްބޮޑަށް އިތުރުވަމުންނެވެ. އެގޮތުން 2024 ވަނަ އހަަރުގެ ޖެނުއަރީމަހުން ފެށިގެން މިއަހަރުގެ ޖޫންމަހުގެ ނިޔަލަށް ބޭންކުން ޖުމްލަ 1.7 ބިލިއަން ޑޮލަރު ކަސްޓަމަރުންނަށް ވަނީ ވިއްކާފައެބެ. މިއީ ޖުލައި 2021 އިން ޑިސެމްބަރު 2023 އާ ހަމައަށް ވިއްކާފައިވާ 957 މިލިއަން ޑޮލަރާ އަޅައިބަލާއިރު %77 އިތުރު އަދަދެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
