ރައްޔިތުން މަޖިލީހުގެ އެންމެ މުހިންމު ދެ ކޮމިޓީން ނާޒިމް ވަކިކޮށްފި

ރައްޔިތުންގެ މަޖިލީހުގެ އެންމެ ބާރުގަދަ އަދި އެންމެ މުހިންމު ދެ ކޮމިޓީން މަޖިލީހުގެ ނައިބުރައީސްކަންވެސް ކުރައްވަމުން ގެންދަވާ އަހުމަދު ނާޒިމް މިއަދު ވަކިކޮށްފިއެވެ.

ޕީއެންސީއަށް ނިސްބަތްވާ ދިއްގަރު ދާއިރާގެ މެމްބަރު ނާޒިމް ވަކިކޮށްފައިވަނީ، މަޖިލީހުގެ މާލިއްޔަތު ކޮމިޓީ އާއި 241 ކޮމިޓީ ނުވަތަ ސަލާމަތީ ހިދުމަތްތަކާ ބެހޭ ކޮމިޓީންނެވެ. މާލިއްޔަު ކޮމިޓީން ނާޒިމް ވަކިކުރެއްވުމާއެކު އޭނާގެ ބަދަލުގައި ކޮމިޓީއަށް ނަގާފައިވަނީ، މައްޗަންގޯޅީ މެދު ދާއިރާގެ މެންބަރު އަހުމަދު ސަމީރެވެ. އަދި ސަލާމަތީ ހިދުމަތްތަކާ ބެހޭ ކޮމިޓީއަށް ނަގާފައިވަނީ، ފުވައްމުލައް އުތުރު ދާއިރާގެ މެންބަރު ޙަމަދު އަބްދުﷲ އެވެ.

ނަާޒިމް މާލިއްޔަތު ކޮމިޓީން ވަކިކުރެއްވިއިރު، އޭނާގެ މަޖިލީހުގެ މެމްބަރުކަމުގައި މިހާތަނަށް ހޭދަކުރެއްވިއިރު، މާލިއްޔަތު ކޮމިޓީއަކީ އޭނާއަށް ވަރަށް ހާއްސަ ކޮމިޓީއެކެވެ. އެގޮތުން މާލިއްޔަތު ކޮމިޓީގައި އެންމެ އުފެއްދުންތެރިކަމާއެކު ވާހަކަދައްކަވާ އެއް ބޭފުޅަކީވެސް ނާޒިމްކަން ގިނަ ބަޔަކު ފާހަގަކުރެއެވެ.

މަޖިލީހުގެ އެންމެ މުހިންމު ދެ ކޮމިޓީން ނާޒިމް ވަކިކުރި ސަބަބެއްކަމަށް ބައެއް މީޑިއާތަކުގައި ނާޒިމް ވިދާޅުވެފައިވަނީ، ކޮމިޓީއަށް އެކަށީގެންވާ ގޮތެއްގައި ވަގުތު ނުދެވޭތީއެވެ. އެގޮތުން ރަސްމީ ކަންކަމާއި، އަދި އަމިއްލަ ބައެއް ކަންކަމުގައި ރާއްޖެއިން ބޭރުގައި ގިނައިން އުޅެންޖެހޭކަން ނާޒިމް ވަނީ ފާހަގަކުރައްވާފައެވެ.

މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ އާއި މާލިއްޔަތު ކޮމިޓީން ނާޒިމް ވަކިކުރެއްވިއިރު އޭނާ ދެން ހިމެނިވަޑައިގަންނަވަނީ، އެސްއޯއީތަކާ ބެހޭ ކޮމިޓީގައެވެ.