ގޭގައި ޑްރަގުގެ ވިޔަފާރިކުރަން ހުއްދަދިން މައްސަލައެއްގައި ވެރިފަރާތް 10 އަހަރަށް ޖަލަށްލުމަށް ޙުކުމްކޮށްފި
މާލޭގެ ގެއެއްގައި މަސްތުވާތަކެތި ބޭނުންކޮށް، އެ ތަކެތީގެ ވިޔަފާރިކުރުމަށް ހުއްދަދީފައިވާ ކަމަށް ސާބިތުވެ، ގ. ޕެލިކަން ގޭގެ ވެރިފަރާތް 10 އަހަރު ދުވަހުގެ މުއްދަތަށް ޖަލަށް ލުމަށް ކްރިމިނަލް ކޯޓުން ޙުކުމްކޮށްފިއެވެ. މިއީ މަސްތުވާތަކެއްޗާބެހޭ ޤާނޫނުގެ 127 ވަނަ މާއްދާގެ ދަށުން ދަޢުވާކޮށް، ކުށް ސާބިތުވި މި ބާވަތުގެ ފުރަތަމަ މައްސަލައެވެ.
މި މައްސަލައިގައި ކޯޓުން ޙުކުމްކޮށްފައިވަނީ ގ. ޕެލިކަން ގޭގެ ބެލެނިވެރިފަރާތުގެ މައްޗަށެވެ. މި ދަޢުވާއަކީ މަސްތުވާތަކެއްޗާބެހޭ ޤާނޫނުގެ 127 ވަނަ މާއްދާގެ (ހ) އާ ޙަވާލާދީ، އެ މާއްދާގެ (ށ) ގެ ދަށުން—އެނގިހުރެ ނުވަތަ އެކަށީގެންވާ ސަބަބުތަކެއް ހުރެ މަސްތުވާތަކެތީގެ ވިޔަފާރި ނުވަތަ ޕެޑްލް ކުރުމަށް ތަނެއް ދޫކޮށްފައިވާތީ ނުވަތަ ހުއްދަކޮށްފައިވާތީ ދައުލަތުން އުފުލި ދަޢުވާއެކެވެ.
20 ޖަނަވަރީ 2016 ވީ ބުދަ ދުވަހުގެ ރޭގަނޑު 19:30 ހާއިރު، ގ. ޕެލިކަން ގޭގައި އިތުރު ބަޔަކާ ގުޅިގެން މަސްތުވާތަކެތީގެ ވިޔަފާރިކޮށް، އެ ތަކެތި ބޭނުންކުރާކަމަށް ފުލުހުންނަށް ލިބުނު މަޢުލޫމާތަކާ ގުޅިގެން ފުލުހުން ވަނީ އޮޕަރޭޝަނެއް ހިންގާފައެވެ. ކޯޓު އަމުރެއްގެ ދަށުން ފުލުހުން އެ ގެއަށް ގޮސް، ބާރުގެ ބޭނުންކޮށްގެން އެތެރެއަށް ވަދެ ބަލައިފާސްކުރިއިރު، އެ ގޭގެ ގްރައުންޑް ފްލޯގައި ދެމީހަކު ތިއްބައި ވަނީ ފެނިފައެވެ.
އެ ދެ މީހުންގެ ޙާޟިރުގައި އެ ގެ ބަލައިފާސްކުރިއިރު، ފާޚާނާ ކައިރިންނާއި، އަށިމަތިންނާއި، ފާޚާނާ ތަށި ތެރެއިން އަދި ފާޚާނާގެ އެކި ދިމާލުން ގިނަ ޢަދަދެއްގެ ރަބަރު ޕެކެޓުތަކާއި ސެލޯފިންކޮޅުތައް ފެނިފައިވެއެވެ. މި ތަކެތި ތަޙްލީލުކުރިއިރު ބޮޑު ޢަދަދަކަށް ކެނެބިސް ހުރިކަން ވަނީ ޔަޤީންކުރެވިފައެވެ.
ދަޢުލަތުން ކޯޓުގައި ފާހަގަކޮށްފައިވާ ގޮތުގައި، މި ގެއަކީ މީގެ ކުރިންވެސް މަސްތުވާތަކެތި ވިއްކާ ކަމުގެ މަޢުލޫމާތު ލިބިގެން ތަކުރާރުކޮށް ފުލުހުން ވަދެ މީހުން ހައްޔަރުކޮށް ތަޙުޤީޤުތައް ހިންގާފައިވާ ގެއެކެވެ. އަދި އެ ގޭގައި މަސްތުވާތަކެތި ޕެޑްލްކޮށް، ވިޔަފާރިކުރާކަން އެނގޭނެ ފުރުޞަތާއި ޙާލަތު އޮވެ، އެކަން ހުއްދަކޮށްފައިވާކަން ޝަރީޢަތަށް ވަނީ ސާބިތުވެފައެވެ.
މި މައްސަލައިގެ ޝަރީޢަތް ނިންމައި ކްރިމިނަލް ކޯޓުން އިއްވި ޙުކުމުގައި ބަޔާންކޮށްފައިވަނީ، މަސްތުވާތަކެއްޗާބެހޭ ޤާނޫނުގެ ދަށުން ކުށް ސާބިތުވާތީ، 10 (ދިހައެއް) އަހަރު ދުވަހުގެ މުއްދަތަށް ޖަލަށްލުމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
