އޮމަދޫއަށް ދެ ފަޅާއި ރަށެއް؛ މަންފާ ހޯދުމަށް ފުރިހަމަ އެހީ އޮންނާނެ

އޮމަދޫގެ ބައެއްގެ ގޮތުގައި އެއަތޮޅު ދެކުނުބުރީ ކުޑަދޫފަޅާއި، އަރިއަތޮޅު ދެކުނުބުރީގެ ދެ ފަޅުން ހަމަޖައްސައިފި އެވެ.

އެކަން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މިއަދު ވަނީ އިއުލާނު ކުރައްވާފަ އެވެ. އޮމަދޫ ރައްޔިތުންނާއި ބައްދަލު ކުރައްވާ ވާހަކަފުޅު ދައްކަވަމުން ރައީސް ވިދާޅުވީ އެ ރަށާއި ދެ ފަޅުން މަންފާ ހޯދުމަށް ރައްޔިތުން ކުރާ މަސައްކަތްތަކަށް، ސަރުކާރުން ފުރިހަމަ އެހީތެރިކަން ފޯރުކޮށްދެއްވާނޭ ކަމަށެވެ.

މި ބައްދަލުކުރެއްވުމުގައި ސަރުކާރުން ވަނީ، ރައީސުލްޖުމްހޫރިއްޔާގެ ވައުދުފުޅަކާ އެއްގޮތްވާ ގޮތުގެ މަތީން އޮމަދޫގެ ބައެއްގެ ގޮތުގައި ކަނޑައެޅުއްވި އެ ފަޅުތައް، އޮމަދޫ ކައުންސިލާ ރަސްމީކޮށް ހަވާލުކުރައްވާފަ އެވެ. ރައީސުލްޖުމްހޫރިއްޔާ ވަނީ، ރަށު ފަތުރުވެރިކަމާއި، އެނޫން އިގްތިސާދީ މަސައްކަތްތަކަށް އެ ފަޅުތައް ބޭނުންކުރުމަށް ބޭނުންވާ އެހީތެރިކަން، ސަރުކާރުން ފޯރުކޮށްދެއްވާނޭ ކަމުގެ ޔަގީންކަން ދެއްވާފަ އެވެ.

ރަށު ފަތުރުވެރިކަން ކުރިއެވުމަށް ރާއްވަވާފައިވާ ކަންތައްތަކުގެ ތެރޭގައި ހިމެނިގެން، އަންނަ އަހަރުގެ ކުރީކޮޅު އޮމަދޫގައި، ޑޮލަރު އޭޓީއެމްގެ ހިދުމަތް ތައާރަފުކުރައްވާނޭކަން ވެސް އެ މަނިކުފާނު މިއަދު އިއުލާން ކުރެއްވި އެވެ. 2024 ވަނަ އަހަރުގެ ނޮވެންބަރު މަހު، ރާއްޖޭގެ ހުރިހާ ރަށަކަށް ބޭންކް އޮފް މޯލްޑިވްސް (ބީއެމްއެލް)ގެ އޭޓީއެމް ހިދުމަތް ފޯރުކޮށްދެއްވުމަށް އިފްތިތާހު ކުރެއްވި މަޝްރޫއުގެ ދަށުން، ފުރަތަމަ އެ ހިދުމަތް ގާއިމުކުރެއްވީ ވެސް އޮމަދޫގަ އެވެ.

އޮމަދޫގައި މެދުކެނޑުމަކަށް އައިސްފައިވާ ފެނުގެ ވިއުގައިގެ މަސައްކަތް އަލުން ފެށުމަށް، އެ މަސައްކަތާ ހަވާލުވެފައިވާ ކުންފުންޏަށް ބާރުއަޅައި، މަޝްރޫއު ފުރިހަމަކުރުމަށް ކުރަން ހުރި ކަންކަން، ސަރުކާރުން ގާތުން ބައްލަވަމުން ގެންދަވާނޭ ކަމުގައިވެސް ރައީސުލްޖުމްހޫރިއްޔާ ވިދާޅުވި އެވެ.