ފަސް މިލިއަނަށްވުރެ ގިނަ ރުފިޔާގެ މަސްތުވާތަކެތި ކަސްތަމްސްއިން އިން އަތުލައިގަނެފި

ރާއްޖެ އެތެރެކުރަން އުޅުނު ގިނަ އަދަދެއްގެ މަސްތުވާތަކެތި މޯލްޑިވްސް ކަސްޓަމްސްއިން އަތުލައިގަނެފިއެވެ.

ކަސްތަމްސްއިން ބުނީ، މިއީ މިދިޔަ މަހުގެ 18 ވަނަ ދުވަހު ޕޯސްޓް މެދުވެރިކޮށް އެތެރެކުރަން އުޅުނު ތަކެތި ކަމަށެވެ. އެތަކެތީގެ ބަރުދަނުގައި 3.6 ކިލޯއަށްވުރެ އިތުރުކަމަށް ކަސްޓަމްސް އިން ބުންނެވެ.

އަތުލައިގަތް ތަކެތީގެ ތެރޭގައި ހިމެނެނީ، ސިންތެޓިކް ކެތިނޯން އެވެ. މި ތަކެތީގެ މަގުމަތީ އަގު ފަސް މިލިއަނަށްވުރެ އިތުރުވާނޭކަމަށް ކަސްޓަމްސް އިން ބުންޏެވެ. މި މައްސަލާގައި ބަޔަކު ހައްޔަރުކުރިކަމެއް ކަސްޓަމްސްއިން އަދި ފުލުހުން މިހާތަނަކަށް ނުބުނެއެވެ.

މަސްތުވާތަކެއްޗާ ދެކޮޅަށް ފުލުހުންނާއި ކަސްޓަމްސް އަދި އެނޫންވެސް ކަމާ ބެހޭ ފަރާތްތައް ގުޅިގެން ކުރިއަށްގެންދާ މަސައްކަތުގައި މިދިޔަ ހަފްތާގައިވެސް ވަނީ ގިނަ އަދަދެއްގެ މަސްތުވާތަކެއްޗާއެކު ބަޔަކު ހައްޔަރުކޮށްފައެވެ. މީގެ އިތުރުން ވައިގެމަގުންނާއި ކަނޑުމަގުން ރާއްޖެ އެތެރެކުރަން އުޅުނު ގިނަ އަދަދެއްގެ މަސްތުވާތަކެތި މިފަހުން އަތުލައިގަނެފައިވާކަން ފާހަގަކޮށްލެވެއެވެ.