ހައުސިން މިނިސްޓްރީ އަލިފާނުގެ ހާދިސާ: އިންޝުއަރަންސް ކޮށްފައި ހުރީ ތިމާވެއްޓާބެހޭ ވުޒާރާގެ އިމާރާތް އެކަނި

ހައުސިން މިނިސްޓްރީ ހިންގި އިމާރާތުގައި 2024 ވަނަ އަހަރުގެ ޑިސެމްބަރު މަހުގެ 12 ވަނަ ދުވަހު ހިނގި ނުރައްކާތެރި އަލިފާނުގެ ހާދިސާގައި ދައުލަތުގެ މުހިންމު ތިން އިދާރާއެއް އަނދައި އަޅިއަށް ވެގެން ދިޔައިރު، އޭގެ ތެރެއިން އިންޝުއަރަންސް ކޮށްފައިވަނީ ހަމައެކަނި ތިމާވެއްޓާބެހޭ ވުޒާރާގެ އިމާރާތް ކަމަށް މޯލްޑިވްސް ޕޮލިސް ސާވިސް އިން ހާމަކޮށްފިއެވެ.

މި ހާދިސާގެ ތަހުގީގާ ގުޅޭގޮތުން މައުލޫމާތު ދެއްވުމަށް މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ސުޕްރިންޓެންޑެންޓް އޮފް ޕޮލިސް ޢަބްދުﷲ ރަޝީދު ވިދާޅުވީ، އަލިފާން ރޯވި ސަރަހައްދުގައި ހުރި ސަރުކާރުގެ ތިން އިމާރާތުގެ ތެރެއިން އިންޝުއަރެންސް ކޮށްފައި އޮތީ މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ ހިންގި އިމާރާތް އެކަނި ކަމަށެވެ. މި ހާދިސާގައި މިނިސްޓްރީ އޮފް ހައުސިންގ، ލޭންޑް އެންޑް އަާބަން ޑިވެލޮޕްމަންޓާއި މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާ ހިންގި އިމާރާތް ވަނީ އެއްކޮށް އަނދައި ހުލިވެފައެވެ.

މި ހާދިސާ ހިނގިތާ ދެ އަހަރުވާން އަންނައިރު، ހާދިސާގައި ކިހާވަރެއްގެ ގެއްލުމެއް ލިބުނުކަން އަދި ހާމަކޮށްފައެއް ނުވެއެވެ.

އަދި އެންވަޔަރަންމަންޓް މިނިސްޓްރީއާއި މާލެ ސިޓީ ކައުންސިލްގެ ބައެއް ޔުނިޓްތައް ހިންގި އިމާރާތުން ބައެއް ތަކެތި ސަލާމަތް ކުރެވުނު ނަމަވެސް، އެ އިމާރާތްތަކަށް ވެސް ވަނީ ބޮޑެތި ގެއްލުންތަކެއް ލިބިފައެވެ. މީގެއިތުރުން، އަލިފާނުގެ ހޫނުގަދަވުމުގެ ސަބަބުން ކައިރީގައި ހުރި 3 ގެއަކާއި، 9 އެޕާޓްމަންޓަކަށާއި 2 ފިހާރައަކަށް ވެސް އެކި ވަރުގެ ގެއްލުންތައް ލިބިފައިވާ ކަމަށް ފުލުހުން ބުންޏެވެ.

ޢަބްދުﷲ ރަޝީދު ވިދާޅުވި މި މައްސަލައިގެ ތަހުގީގަށް 776 ގަޑިއިރުގެ ސީސީޓީވީ ފުޓޭޖާއި ފުލުހުންގެ ބޮޑީވޯން ކެމެރާތަކުގެ އިތުރުން އާންމުން ހިއްސާކުރި ވީޑިއޯތައް ވަނީ ދިރާސާކޮށްފައިވާކަމަށެވެ. އަދި މިހާތަނަށް 42 މީހެއްގެ ބަޔާން ނަގާފައިވާކަންވެސް އޭނާ ފާހަގަކުރެއްވިއެވެ.

މި ހާދިސާއަށް ބަލާއިރު އަލިފާން ރޯވެފައިވަނީ ކަރަންޓް ދެ ނަރެއް ޝޯތްވުމުގެ ސަބަބުންކަން ވަނީ ތަހްގީގްތަކުން ހާމަވެފައެވެ. ތަހްގީގްތަކުން އެނގުނުގޮތުގައި ހައުސިން އިމާރާތުގެ ކަރަންޓް ވަޔަރުތައް އިންތިޒާމްކޮށް ބެލެހެއްޓިފައިވަނީ މިންގަނޑަށް ނޫންކަން ވަނީ ފާހަގަވެފައެވެ.

މި ހާދިސާގެ ފުރިހަމަ ތަހުގީގެއް ހިންގުމަށްޓަކައި އިންޑިއާގެ ހާއްސަ ތަހުގީގު ޓީމެއް ގެނެސް، އެ ފަރާތްތަކުން ސައިޓް ބަލައި ދިރާސާ ކުރަންދެން ސީން ރައްކާތެރިކަމާއެކު ބަލަހައްޓާފައިވާ ކަމަށް ފުލުހުން ވިދާޅުވިއެވެ. ފުލުހުން ވަނީ ގޭބިސީތަކާއި އޮފީސްތަކުގައި ދިމާވާ ކަރަންޓުގެ މައްސަލަތައް އަވަހަށް ހައްލުކުރުމަށް އާންމުންނަށް އިލްތިމާސްކޮށްފައެވެ.