ޕާކިސްތާން ޓްއާއިން ލިބޭ ފައިސާ ހަދިޔާކުރާނީ ހާލުގައި ޖެހުނު ފަރާތްތަކަށް: ލަންކާ ކްރިކެޓް ޓީމް

ޕާކިސްތާނު ޓްއާއިން ލިބޭ ހުރިހާ ފައިސާއެއް ހަދިޔާކުރާނީ ވިއްސާރާގެ ސަބަބުން ހިނގާދިޔަ ހާދިސާތަކުގައި ހާލުގައި ޖެހުނު ފަރާތްތަކަށް ކަމަށް ސްރީލަންކާގެ ޤައުމީ ކްރިކެޓް ޓީމުން ބުނެފިއެވެ.

ފޭސްބުކްގައި ކުރި ޕޯސްޓެއްގައި ލަންކާ ޤައުމީޓީމްގެ ކޯޗް އަދި ކްރިކެޓް ލެޖެންޑް ސަނަތު ޖަޔަސޫރިއާ ބުނީ، ޕާކިސްތާނުގައި މިހާރު ކުރިއަށްދާ މުބާރާތުން ލަންކާ ޓީމަށް ލިބޭ ހުރިހާ ފައިސާއެއް ވިއްސާރާގައި ގެއްލުން ލިބުނު ފަރާތްތަކަށް އެހީވުމަށް ހަދިޔާކުރުމަށް ނިންމާފައިވާކަމަށެވެ. ކޯޗް ބުނީ ލަންކާ ކްރިކެޓް ޓީމްގެ ކުޅުންތެރިންނާ އޮފިޝަލުންތިބީ ހާލުގައި ޖެހުނު ފަރާތްތަކާއި އަދި އެފަރާތްތަކަށް އެހީވުމަށް އެކިގޮތްގޮތުން މަސައްކަތްކުރަމުންދާ ޓީމްތަކާއެކުގައިކަމަށެވެ.

ޖަޔަސޫރިޔާ ބުނީ ކުޅުންތެރިންނާއި އޮފިޝަލުން ޓީމެއްގެ ގޮތުގައި ތިބީ ހާލުގައި ޖެހުނު ފަރާތްތަކާއެކުގައި ކަމަށާއި، މުބާރާތުން ލިބޭ ފައިސާ އައި މެޗް ފީގެ ގޮތުގައި ލިބޭ ފައިސާ ހަދިޔާކުރާނީ ޤައުމަށް މިވަގުތު އެންމެ ބޭނުންޖެހިފައިތިބި ފަރާތްތަކަށް ކަމަށެވެ.

އެނބުރިޤައުމަށް ގޮސް އަހަރުމެންގެ އެންމެ ފުރަތަމަ މަސައްކަތަކަކަށް ވާނީ ހާލުގައި ޖެހުނު ފަރާތްތަކަށް އެހީތެރިކަން ދިނުމާއި އެހީ ހޯދުން. ޓީމްގެ އެދުމަކީ ކަމާބެހޭ އިދާރާތަކުން ދެއްވާ އިރުޝާދުތަކަށް ހުރިހާ ރައްޔިތުންވެސް ބޯލަނބައި އެންމެން އެކަތިގަނޑަކަށްވެގެން މަސައްކަތްކޮށްދިނުން

ލަންކާ ޓީމްގެ ކޯޗް ސަނަތު ޖަޔަސޫރިއާ

ސްރީލަންކާއަށް މިހާރު ކުރަމުންދާ ވިއްސާރާގައި ބޯކޮށް ވާރޭވެހި ބިންގަނޑު ކަނޑައިގެންގޮސް ހިނގި ހާދިސާ ތަކުގައި 60 ހަށްވުރެ ގިނަ މީހުން މަރުވެފައިވާއިރު، އެތައް ބައެއްގެ ގެދޮރުވަނީ ނެތިގެންގޮސްފައެވެ. މިހާހިސާބަށް އާއިރު 12،000 އާއިލާއެއްގެ ބޯހިޔާވަހިކަން ގެއްލިފައިވާއިރު، ލަންކާގެ ބައެއް އަވައްތަކުގެ އުމްރާނީ ވަސީލަތްތައް ވަނީ މުޅިންހެން ފުނޑުފުނޑުވެފައެވެ.