2026 ވަނަ އަހަރުގެ ވޯލްޑް ކަޕަށް ބޮޑު ހޭދައެެއް؛ ކޮންމެ ޓީމަކަށް ލިބޭނީ ކިހާވަރެއް؟

2022 ވަނަ އަހަރުގެ ވޯލްޑް ކަޕް ކާމިޔާބުކޮށްގެން އާޖެންޓީނާއަށް 42 މިލިއަން ޑޮލަރު ލިބިފައިވާއިރު، 2026 ވަނަ އަހަރުގެ މުބާރާތުގެ ޗެމްޕިއަނުންނަށް އެއަށްވުރެ ބޮޑު އިނާމެއް ލިބޭނެއެވެ.

ވޯލްޑް ކަޕަކީ އާންމުކޮށް ކްލަބް ފުޓްބޯޅައިގައި ފެންނަ ބޮޑެތި ޓްރާންސްފާ ފީތަކާއި މާލީ މައްސަލަތަކުން އެއްކިބާވެފައިވާ، ކުޅިވަރުގެ އަސްލު ރޫހު ފެންނަ މުބާރާތެއްގެ ގޮތުގައި ބެލެވުނު ނަމަވެސް، މިއީ އިންތިހާއަށް ބޮޑެތި އިނާމުތަކެއް ކަނޑައެޅިފައިވާ މުބާރާތެކެވެ.

2026 ވަނަ އަހަރުގެ ވޯލްޑް ކަޕްގައި ބައިވެރިވާ ގައުމުތަކަށް، ހަމައެކަނި މުބާރާތުގައި ވާދަކޮށްލުމުން ވެސް ބޮޑު ފައިސާގެ އިނާމެއް ލިބޭނެއެވެ. އަދި ކޮންމެ ބުރަކުން ކުރިއަށްދާ ވަރަކަށް މި އިނާމުތައް ދާނީ އިތުރުވަމުންނެވެ. އުތުރު އެމެރިކާގައި ބާއްވާ މި މުބާރާތުގައި މުޅިން އަލަށް 48 ޓީމު ވާދަކުރާއިރު، އިނާމު ފައިސާގެ ޖުމްލަ އަދަދު ވަނީ މީގެ ކުރީގެ ހުރިހާ ރެކޯޑުތަކެއް މުގުރާލާފައެވެ.

2026 ވަނަ އަހަރުގެ ވޯލްޑް ކަޕްގެ އިނާމު ފައިސާ އިތުރުކުރުމަށް ފީފާއިން ނިންމާފައިވާއިރު، މުބާރާތުގައި ވާދަކުރާ ގައުމުތަކުގެ މެދުގައި  871 މިލިއަން ޑޮލަރު ބަހާލެވޭނެއެވެ. އަޅާކިޔުމެއްގެ ގޮތުން ބަލާއިރު، 2022 ވަނަ އަހަރު ގަތަރުގައި ބޭއްވި ވޯލްޑް ކަޕްގެ ޖުމްލަ އިނާމު ފައިސާގެ އަދަދަކީ 440 މިލިއަން ޑޮލަރެވެ.

މި ފައިސާގެ ބޮޑު ބައެއް ބަހާލެވެނީ މުބާރާތުގެ ބުރުތަކުން ޓީމުތައް ހޯދާ ކުރިއެރުމަށް ބަލައިގެންނެވެ. ނަމަވެސް، ކުޅުމުގެ ނަތީޖާއަށް ނުބަލައި، މުބާރާތުގައި ބައިވެރިވާ ހުރިހާ ގައުމުތަކަށް މާލީ މަންފާ ލިބޭނެ ގޮތަށް ވެސް ފައިސާ ކަނޑައެޅިފައިވެއެވެ.

ނަތީޖާއަށް ބިނާކޮށް ދޭ 703 މިލިއަން ޑޮލަރުގެ ތެރެއިން އެންމެ ބޮޑު ބައެއް ލިބޭނީ މުބާރާތުގެ ޗެމްޕިއަން ޓީމަށެވެ. އެގޮތުން މުބާރާތް ކާމިޔާބުކުރާ ޓީމަށް 51 މިލިއަން ޑޮލަރު ލިބޭއިރު، ދެވަނައަށްދާ ޓީމަށް ލިބޭނީ 34 މިލިއަން ޑޮލަރެވެ.

ތިންވަނަ އަދި ހަތަރުވަނަ ހޯދާ ގައުމުތަކަށް 30 މިލިއަން އަދި 28 މިލިއަން ޑޮލަރު ލިބޭނެއެވެ. ކުއާޓާ ފައިނަލުން ކަޓާ ޓީމުތަކަށް 20 މިލިއަން ޑޮލަރު ލިބޭއިރު، މިއީ ގްރޫޕް ސްޓޭޖުން ކަޓާ ޓީމުތަކަށް ލިބޭ އަދަދުގެ ދެގުނައެވެ.

ނަތީޖާއަށް ބިނާކޮށް ދެވޭ އިނާމު ފައިސާ

ގްރޫޕް ސްޓޭޖް: 10 މިލިއަން ޑޮލަރު

ގަދަ 32 ޓީމުގެ ބުރު: 12 މިލިއަން ޑޮލަރު

ގަދަ 16 ޓީމުގެ ބުރު: 16 މިލިއަން ޑޮލަރު

ކުއާޓާ ފައިނަލް: 20 މިލިއަން ޑޮލަރު

ހަތަރުވަނަ: 28 މިލިއަން ޑޮލަރު

ތިންވަނަ: 30 މިލިއަން ޑޮލަރު

ދެވަނަ (ރަނަރަޕް): 34 މިލިއަން ޑޮލަރު

އެއްވަނަ (ޗެމްޕިއަން): 51 މިލިއަން ޑޮލަރު

ނަތީޖާއަށް ބިނާނުކޮށް ދެވޭ އިނާމު ފައިސާ

ފީފާގެ ޖުމްލަ އިނާމު ފައިސާގެ ތެރެއިން 168 މިލިއަން ޑޮލަރު ބަހާލެވެނީ ކުޅުމުގެ ނަތީޖާއަށް ބެލުމެއް ނެތި، މުބާރާތުގައި ބައިވެރިވާ ހުރިހާ ޓީމުތަކުގެ މެދުގައެވެ.

މީގެ ތެރެއިން ކޮންމެ ގައުމަކަށް މުބާރާތަށް ތައްޔާރުވުމުގެ ގޮތުން (ދަތުރުފަތުރާއި، ހުރުމާއި، ޓްރޭނިންގ ކޭމްޕްތަކަށް) 2.5 މިލިއަން ޑޮލަރު ދެވޭނެއެވެ. މީގެ އިތުރުން، ކޮންމެ ޓީމަކަށް މުބާރާތަށް ކޮލިފައިވުމުގެ ފީއެއްގެ ގޮތުގައި 10 މިލިއަން ޑޮލަރު ލިބޭނެއެވެ.

މި ބައިގައި ބާކީ ހުރި ފައިސާ ބޭނުންކުރެވޭނީ ޓީމުތަކުގެ ވަފުދުތަކުގެ ހަރަދުތަކާއި ޓިކެޓް އެލޮކޭޝަން ފަދަ އިދާރީ ކަންކަމަށް އެހީތެރިވުމަށެވެ. މީގެ ބޭނުމަކީ ވޯލްޑް ކަޕް ފަދަ ބޮޑު މުބާރާތެއްގައި ވާދަކުރާއިރު ކުރަންޖެހޭ ލޮޖިސްޓިކް އަދި އިދާރީ ބޮޑެތި ހަރަދުތަކުގައި ހުރިހާ ގައުމުތަކަށް ހަމަހަމަ ފުރުސަތެއް ހޯދައިދިނުމެވެ.