ކުޑަކުދިންގެ ދުވަހާއި ގުޅިގެން އާކް އިން ދިއްފުށީގައި ޚާއްސަ ކޭމްޕެއް ކުރިޔަށްގެންގޮސްފި

އެޑްވޮކޭޓިންގ ދަ ރައިޓްސް އޮފް ޗިލްޑްރަން (އާކް) އިން، ދުނިޔޭގެ ކުޑަކުދިންގެ ދުވަސް ފާހަގަކުރުމުގެ ގޮތުން ކ.ދިއްފުށީގައި ޚާއްސަ ކޭމްޕެއް ކުރިޔަށްގެންގޮސްފިއެވެ.

ދިއްފުށި ކައުންސިލްއާއި އަލޯހާ އުފާ ޖަމިއްޔާއާއި ގުޅިގެން އެ ރަށުގައި އާކްއިން ބޭއްވީ "ޔަންގް އެކްސްޕްލޯރާ ކޭމްޕް"ގެ ނަމުގައި ބޭއްވި ކޭމްޕެކެވެ. ނަފްސާނީ އަދި ޖިސްމާނީ ދުޅަހެޔޮކަން އިތުރުކުރުމަށާއި ތިމާވެއްޓަށް އިޙްތިރާމްކުރުމަށް އަމާޒުކޮށްގެން ތިން ދުވަހުގެ މުއްދަތަށް ކުރިއަށްގެންދިޔަ މި ޕްރޮގްރާމްގައި ގްރޭޑް 1-10ގެ 100 އަށްވުރެ ގިނަ ކުދިން ބައިވެރިވެފައިވާ ކަމަށް އާކްއިން މައުލޫމާތުދެއެވެ.

އާކް އިން ބުނި ގޮތުގައި އެ ކޭމްޕުގެ މައިގަނޑު މަޤްޞަދަކީ ކުޑަކުދިންގެ ނަފްސާނީ ދުޅަހެޔޮކަން އިތުރުކުރުމާއި، އެކި އިޙްސާސްތަކާ ކުރިމަތިލާނެ ގޮތްތައް ދަސްކޮށްދިނުމެވެ.

މިގޮތުން، ވާހަކަފޮތް ކިޔައިދިނުމުގެ ތެރެއިން ރުޅިވެރިކަމާއި، ލަދުވެތިކަމާއި، ކަންބޮޑުވުން އަދި ހާސްވުންފަދަ އިޙްސާސްތައް ދެނެގަނެ، އެ އިޙްސާސްތަކާއި ކުރިމަތިލާނެ ގޮތްތައް ކިޔައިދިނުމުގެ ސެޝަންތައް ކުރިއަށް ގެންދިޔަ ކަމަށް އާކްއިން ބުންޏެވެ.

އަދި "އެކްސްޕްރެސިން އިމޯޝަންސް ތްރޫ އާޓް ވޯކްޝޮޕްގެ" ތެރެއިން ކުދިންގެ އެކިކަހަލަ އިޙްސާސްތައް ދެނެގަނެ، ކުރެހުމުގެ ތެރެއިން އެ އިޙްސާސްތައް ފާޅުކުރުމަށް ދަސްކޮށްދެވުނުކަމަށާއި، އޭގެ އިތުރަށް މައިންޑްފުލް މޫވްމަންޓް ސެޝަންތަކުގެ ތެރެއިން ކުދިން ނުތަވަނަވަސްވެ ހާސްވާ ވަގުތުތަކުގައި، ހަމަޖެހުން ގެނައުމަށްޓަކައި ފުންކޮށް ނޭވާލުމާއި ގްރައުންޑިންގް ޓެކްނިކްސް ކިޔާދެވުނު ކަމަށް ވެސް އާކްއިން ބުންޏެވެ.

އަދި ދުޅަހެޔޮ ސިއްހަތެއްގައި ހެދިބޮޑުވުމަށް ހިތްވަރު ދިނުމުގެ ގޮތުން ސިއްޙަތަށް ފައިދާހުރި ކާނާ ތައްޔާރުކުރުމުގެ ހުނަރު ދަސްކޮށްދޭ ސެޝަންތައް ވެސް ކުރިއަށް ގެންދިޔަ ކަމަށް އާކްއިން ބުންޏެވެ.

އެ ކޭމްޕުގެ ތެރެއިން ތިމާވެއްޓާ ގުޅުންހުރި ހަރަކާތްތަކެއް ވެސް ވަނީ ކުރިޔަށްގެންގޮސްފައެވެ. އެގޮތުން ޕްލާސްޓިކް ޕޮލިއުޝަންއާ ގުޅޭގޮތުން ހޭލުންތެރިކުރުމަށް ޚާއްސަ ހަރަކާތްތަކެއް ކުރިޔަށްގެންދިޔައިރު، މައިކްރޯ ޕްލާސްޓިކްއަށް އަހުލުވެރިކުރުމަށް ނަޑަލް ހަންޓް ހަރަކާތްތަކެއް ވަނީ ކުރިޔަށްގެންގޮސްފައެވެ.

އަދި ގޮނޑުދޮށް ސާފުކުރުމުގެ ޕްރޮގްރާމެއް ހިންގައިފައިވާއިރު، އެ ހަރަކާތުގައި ދަރިވަރުން ވަނީ އާންމު ކުންޏާއި، ޕްލާސްޓިކް ވަކިކޮށް، 30 އަށްވުރެ ގިނަ ކޮތަޅުގެ ކުނި އެއްކޮށްފައެވެ. މި ހަރަކާތުގެ ތެރެއިން ކުނީގެ ސަބަބުން ތިމާވެއްޓަށް ކުރާ ނޭދެވޭ އަސަރާއި، ކުނި މެނޭޖުކުރުމުގެ މުހިންމުކަން ދަރިވަރުންނަށް ކިޔައިދީފައިވާ ކަމަށް ވެސް އާކްއިން ބުންޏެވެ.

މީގެ އިތުރުން، ކުދިންނަށް ފަރުތަކާއި ފަޅުތައް ހިމާޔަތްކުރުމުގެ މުހިންމުކަމުގެ މައުލޫމާތު ދިނުމުގެ އިތުރުން ފީނުމުގެ ހަރަކާތްތަކެއް ވެސް ވަނީ ކުރިޔަށް ގެންގޮސްފައެވެ.

މި ކޭމްޕް ކާމިޔާބުކަމާއެކު ކުރިއަށް ގެންދިޔުމަށް ދިއްފުށީ ކައުންސިލް އިދާރާއާއި، ދިއްފުށީ ހެލްތް ސެންޓަރާއި، ފެސިލިޓޭޓަރުނާއި، ވޮލަންޓިޔަރުންނާއި ބެލެނިވެރިން ދެއްވި އެއްބާރުލުމަށްޓަކައި އާކްގެ ޓީމްގެ ފަރާތުން ވަނީ ޝުކުރު އަދާކޮށްފައެވެ.