ޕީއެސްއެމުގެ މުހިއްމު ދެ ޑިޕާޓްމަންޓެއް އޮޑިޓްކުރަނީ

ވަރަށްބޮޑަށް ދަރަނިވެރިވެފައިވާ ޕަބްލިކް ސާވިސް މީޑިއާގެ މުހިއްމު ދެ ޑިޕާޓްމަންޓެއް އޮޑިޓްކުރުމުގެ މަސައްކަތް ފެށުމަށް އެކުންފުނިން ތައްޔާރުވެއްޖެއެވެ.

ޕީއެސްއެމުން ތައްޔާރުވަމުންދަނީ އެކުންފުނީގެ މާކެޓީންގ އެންޑް ކޮމާޝަލް ކޮމިއުނިކޭޝަން އަދި ހިއުމަން ރިސޯސް ޑިޕާޓްމަންޓް އޮޑިޓްކުރުމަށެވެ. އެގޮތުން އެކުންފުނިންވަނީ އެ ދެ ޑިޕާޓްމަންޓް އޮޑިޓްކޮށްދޭނެ ފަރާތެއް ހޯދުމަށް އާއްމުކޮށް އިއުލާނުކޮށްފައެވެ. ގެޒެޓްގައި ކުރި އިއުލާނެއްގައި ވާގޮތުން ސޭލްސް އެންޑް މާކެޓިން ޑިޕާޓްމަންޓާއި އެޗްއާރު ޑިޕާޓްމަންޓް އޮޑިޓްކުރުމަށް ނިންމާފައިވަނީ، ފާއިތުވެދިޔަ ދެ އަހަރުދުވަހުގެ މުއާމަލާތްތަކެވެ.

ދައުލަތުގެ ކުންފުނިތަކުގެ ތެރެއިން ޕީއެސްއެމަކީ އެންމެބޮޑު ދަރަންޏެއް އޮތް އެއް ކުންފުންޏެވެ. މި ސަރުކާރު ވެރިކަމާ ހަވާލުވިއިރު ޕީއެސްއެމްގެ ދަރަނި 261 މިލިއަން ރުފިޔާއަށް އަރާކަމަށް އޭރު، އެކުންފުނީގެ މެނޭޖިންގ ޑިރެކްޓަރަކަށް ހުންނެވި ޒީނާ ޒާހިރު ވަނީ މީގެކުރިން ވިދާޅުވެފައެވެ.

ދަރަނީގައި ހިންގަމުން އައި ޕީއެސްއެމަށް މިދިޔަ އަހަރުގެ ދެވަނަ ކުއާޓަރުގައި ފައިދާ ވެފައިވާކަމަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ވަނީ ހާމަކޮށްފައެވެ. ޕީސީބީން ނެރެފައިވާ ސަރުކާރު ކުންފުނިތަކުގެ ވިޔަފާރި ހިނގާދިޔަގޮތުގެ މައްޗަށް ތައްޔާރުކޮށްފައިވާ ރިޕޯޓުން ދައްކާގޮތުގައި 2024 ވަނަ އަހަރުގެ ދެވަނަ ކުއާޓަރުގައި ޕީއެސްއެމަށް ވަނީ 27 މިލިއަން ރުފިޔާގެ ފައިދާއެއް ވެފައެވެ. އެ ކުއާޓަރުގައި ޕީއެސްއެމަށް ފައިދާވިނަމަވެސް އޭގެ ކުރީ 4 ކުއާޓަރުގައިވެސް ޕީއެސްއެމަށް ވަނީ ގެއްލުންވެފައެވެ. އެގޮތުން 2024 ވަނަ އަހަރުގެ ފުރަތަމަ ކުއާޓަރުގައި ޕީއެސްއެމަށް 5 މިލިއަން ރުފިޔާގެ ގެއްލުން ލިބުނުއިރު، އޭގެކުރީ 2023 ވަނަ އަހަރުގެ ފަހު ކުއާޓަރުގައި ވަނީ 7 މިލިއަން ރުފިޔާ ގެއްލުންވެފައެވެ.

ޕީއެސްއެމާ ގުޅޭގޮތުން އޮޑިޓަރ ޖެނެރަލް މިދިޔަ އަހަރުގެ ފަހުކޮޅު ނެރުއްވި ރިޕޯޓެއްގައި ވަނީ ޑޮލަރުގަތުމަށް ހިންގި މުއާމަލާތެއްގެ ތެރޭގައި ހިނގާފައިވާ ހިޔާނާތުގެ މައްސަލަތަކެއް ފާހަގަކުރައްވާފައެވެ. މިދިޔަ އަހަރުގެ ސެޕްޓެމްބަރުމަހު އޮޑިތަރ ޖެނެރަލް ނެރުއްވި ރިޕޯޓްގައި ވަނީ ޕީއެސްއެމަށް ޑޮލަރުގަތުމަށް ނެގި ފައިސާ އާއި، އާމްދަނީގެ ގޮތުގައި ލިބިފައިހުރި ފައިސާގެ ތެރެއިން 9 މިލިއަނަށްވުރެ ގިނަ ރުފިޔާ ވީއެއްނުވީއެއް ނޭނގި ގެއްލިފައިވާކަމަށް ހާމަކޮށްފައެވެ. މިކަމެއް ހިނގާފައިވަނީ ޕީއެސްއެމަށް ބޭނުންވާ ޑޮލަރު ގަތުމުގެ ނަމުގައި 2020 ވަނަ އަހަރުންފެށިގެން 2024 ވަނަ އަހަރުގެ އޭޕްރިލްމަހުގެ ނިޔަލަށް ކުރި މުއާމަލާތްތަކުގައެވެ.

ޕީއެސްއެމުން ވަނީ މިދިޔަ އަހަރުގެ ސެޕްޓެމްބަރުމަހުގެ ތެރޭގައި ހިޔާނާތުގެ އެ މައްސަލަތައް ބެލުމަށް ފުލުހުން އެންޓި ކޮރަޕްޝަން ކޮމިޝަން (އޭސީސީ) އަށް ހުށަހަޅާފައެވެ.