ޖަރުމަނުގެ ޝެންގަން ވިސާގެ ދެދުވަހުގެ ކްލިނިކެއް ރާއްޖޭގައި

ޖަރުމަންވިލާތަށް ދަތުރުކުރުމަށްޓަކައި ނަގަންޖެހޭ ޝެންގަން ވިސާ މާލޭގައި ހުރެގެން ނެގުމުގެ އިންތިޒާމު ހަމަޖެއްސުމަށް ދެ ދުވަހުގެ ވިސާ ކްލިނިކެއް ގާއިމްކުރުމަށް ފޮރިން މިނިސްޓްރީން ނިންމައިފިއެވެ.

ފޮރިން މިނިސްޓްރީން މައުލޫމާތުދޭގޮތުގައި މި ކްލިނިކް ގާއިމްކުރުމަށް ހަމަޖެހިފައިވަނީ އަންނަ ޖެނުއަރީ މަހުގެ 27-28 ވަނަ ދުވަހު ހެނދުނު 08:00 އިން ހަވީރު 18:00 އަށް އެ މިނިސްޓްރީގައެވެ.

މި ވިސާ ކްލިނިކް ހިންގުމަށް ހަމަޖެހިފައިވަނީ ދެދުވަހަށް ކަމުގައިިވިޔަސް، އެޕްލިކޭޝަން ހުށައަޅާ މިންވަރު ބެލުމަށްފަހު އިތުރުކުރުމުގެ ފުރުސަތު އެބައޮތްކަމަށް މިނިސްޓްރީންވަނީ ބުނެފައެވެ. ލަންކާގައި ހުންނަ ރާއްޖެއާއި ސްރީލަންކާއާއި ބެހޭ ޖަރުމަނުގެ އެމްބަސީންވަނީ ވިސާއަށް އެދޭ ފަރާތްތަކުން އޮންލައިންކޮށް އެޕޮއިންޓްމެންޓް ހެއްދުމަށް އެދިފައެވެ.

މީގެ ކުރިން ޖަރުމަނަށް ދާން ވިސާ ބޭނުންނަމަ ޖެހެނީ ސްރިލަންކާގައި ހުންނަ ޖަރުމަނު ވިލާތުގެ އެމްބަސީން އެކަމަށް ހުށައަޅާށެވެ. ޖަރުމަނުވިލާތަކީ ރާއްޖޭގެ ގިނަ ވިޔަފާރިވެރިން އެކި ދަތުރުތަކާއި ފެއަރތަކުގައި ބައިވެރިވުމަށްދާ ގައުމެކެވެ.