ބާޒާރުގައި ދިވެހި ކަރާ ކިލޯއެއްގެ އަގު 35 ރުފިޔާއަށް އަރައިފި

މާލޭ ބާޒާރުގައި ދިވެހި ކަރާ ކިލޯއެއްގެ އަގު 35 ރުފިޔާއަށް އަރައިފިއެވެ.

ދަތުރުވެރިންގެ މާރުކޭޓުގައި މިއަދު ތޮއްޑޫ ކަރާ ކިލޯއެއްގެ އަގު 35 ރުފިޔާގައި ހުރިއިރު، ލ.އަތޮޅުގެ އިތުރުން ކަނޑޫދޫ ކަރާ ކިލޯއެއްގެ އަގު ހުރީ ހަމަ އއް އަގުތަކެއްގައެވެ. ގޮޅިތަކުން ވާހަކަދެއްކި ބައެއް މީހުން ބުނީ ކަރާ އަގުބޮޑުވެފައިވަނީ، ބާޒާރަށް އެންމެ ގިނައިން ކަރާ ގެންނަ ތޮއްޑޫއިން ކަރާ ނުގެންނާތީކަމަށެވެ.

ރޯދަމަސް ފެށުނުއިރު ދަތުރުވެރިްނގެ މާރުކޭޓުގައި ދިވެހި ކަރާ ކިލޯއެއްގެ އަގު 25 ރުފިޔާގައި ހުރިނަމަވެސް ފުރަތަމަ ހަފްތާ ނިމުނުއިރު ކަރާ ކިލޯއެއްގެ އަގު ހުރީ 20 ރުފިޔާ އާއި 18 ރުފިޔާ އާ ދެމެދުގެ އަގުތަކެއްގައެވެ. އޭރު ބާޒާރުގައި ދިވެހި ކަރާގެ އަގު ދަށަށްދިޔަ މައިގަނޑު އެއް ސަބަބަކީ ގިނަ އަދަދަކަށް އިންޑިއާ ކަރާ މާރުކޭޓަށް ގެނައުމެވެ.

ދަތުރުވެރިންގެ މާރުކޭޓާއި ބާޒާރުމަތީ ފިހާރަތަކުގައި މިއަދު އިންޑިއާ ކަރާ ކިލޯއެއްގެ އަގު ހުރީ 25 ރުފިޔާގައެވެ. އިންޑިއާ ކަރާ ކިލޯއެއް އެ އަގަށް ހުރިނަމަވެސް ކަރާ މަދުކަން ފާހަގަކޮށްލެވެއެވެ. ވިޔަފާރިވެރިން ބުނާގޮތުގައި މާލޭ ބާޒާރުގައި ކުރިއަށް އޮތްތަނުގައި ކަރާގެ އަގު ދަށަށް ދިއުމަކީ ނާދިރުކަމެކެވެ. ސަބަބަކީ ތެލުގެ އަގުބޮޑުވުމާއި ކަރާ ލިބުން ދަތިވުމެވެ.

ބާޒާރަށް ބަލާއިރު މިހާރު އެންމެ އަގުހެޔޮ ތަކެތީގެ ތެރޭގައި ހިމެނެނީ ފިޔާ، ކެރެޓް އަދި އޮރެންޖެވެ. ބާޒާރުމަތީ ފިހާރަތަކުގައި ފިޔާ ކިލޯއެއްގެ އަގު 8 ރުފިޔާއަށް ލިބެން ހުރިއިރު، މިހާރު އޮރެންޖެއް 4 ރުފިޔާއަށް ލިބެން އެބަހުއްޓެވެ.

މާލޭ ބާޒާރުގެ އަގުތަކަށް ބަލާއިރު، ކުރިއަށް މިއޮތް ދުވަސްތަކުގައި އަގުތައް އެންމެބޮޑަށް އުފުލޭނޭކަމަށް ލަފާކރެވެނީ ފިނިކުރި ކުކުޅާއި އެބާވަތުގެ މުދަލެވެ. މީގެ އިތުރުން ތެލުގެ އަގު ބޮޑުވުމާއި ގުޅިގެން ދަތުރުފަތުރުގެ އަގަށް އަންނަ ބަދަލަށް ބަލައި ކުރިއަށް އޮތްތަނުގައި ތަކެތީގެ އަގުތައް އުފުލުމަކީ ކައިރިކަމެއްކަމަށް ބައެއް ވިޔަފާރިވެރިން ފާހަގަކުރެއެވެ.